السلام عليكم و رحمة الله و بركاته ..

كيف حالكم يا بنات .. ان شاء الله كل عام حيين. و طيبين .. ومن العايدين الفايزين

معليشى تاخرت عليكم . لكن اعذرونى .. انتو عارفين اواخر رمضان و الظروف .

على اى حال نكملوا قصة اللوسة (اللى شورها ما تبيش تكمل .. صارلها زى الببسي كولا)

انكملوا:

دباير اللوسة بالاضافة الى الفلفل اليابس طبعا عبارة عن:

بصل مجفف...............
و طماطم شمسى..........

او



و كرويه........................................
و كسبر.........................................
و ملح..........................................
و الثومة (البعض لا يحبذها بالثوم)......


اختكم رواد ما عندهاش من دباير اللوسة الا الفلفل اليابس.
الطماطم الشمسى احيانا اجده فى بعض المحلات الكبرى , الا من بختى المرة هاذى ما لقيتاش .
و طبعا البصل (بححححححححححححححححح) حتى هو ما فيش .

و انى خلاص . صممت .............. لوسة يعنى لوسة .. و كان تجى من تحث الارض.!!!!!!!!

نضت قشرت كم راس بصل و قطعته جوانح ..
و قليته فى الزيت لين ولى لونه احمر ...
باهى البصل حلينا مشكلته .
الطماطم كيف؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اللهم بلاش الطماطم و خلاص.

كملت قليت الفلفل اليابس فى زيت البصل .

و بعدين رحيتهم بالماكينة مع بعض


و حطيتهم فى فازوو.......


و حطيته فى الثلاجة .. طبعا اللوسة ناقصة هلبة ..
قلت اللهم تقعد هكى لين نلقى الطماطم باش نكملها على خير .....
و فى هذه الاثناء ... مرة مرة نمشى للفازووو و نطلع منه شوية و( نشوفلها شغلها).

تعرفوا؟؟؟؟؟؟؟؟؟؟؟
تمحمطت و تقطعت .




يا ارزينى فى اللـــــــــــــــــــــــــــــــــــــــــــــــ ـــــــــــــــــــــــــوسة


طريقة عمل اللوسة :

المقادير :





فلفل امبلبل (احمر) مجفف فى الشمس.

طماطم مجفف فى الشمس.

بصل مقطع جوانح و مجفف فى الشمس.

كروية و كسبر

ثوم (حسب الرغبة)

ملح.

الطريقة :

يقلى الفلفل و الطماطم و البصل فى نفس الزيت ثم يفرم بفرامة اللحم و يضاف اليه الكروية و الكسبر و الثوم .

يضاف اليه باقى زيت القلى و يحفظ فى برطمان او حافظة جافة .

يجب مراعاة استخدام ملعقة جافة و نظيفة عند الاخذ منها . و عدم ترجيع المتبقى الى نفس الوعاء,

ملاحظة: اللوسة ممكن ان تبقى محفوظة بهذا الشكل لمدة عام او اكثر. (هذا كان قعدت)
و السلام عليكم و رحمة الله و بركاته
و كل عام و انتم بخير .
انتظروا الجديد ................

السلام عليكم ورحمة الله وبركاته

إشى اشى ع اللوسة واللى مدايرة اللوسة ، ماشاءالله عليك فالحة بجد

مادامك إديرى فى االلوسة معناها طيابة درجة أولى

تعرفى عمرى مادرتها زمان عمتى الله يرحمها دارتنا بازين باللوسة محلاه مش عادى

وحتى أمى ادير فيه لكن أنى لا

خلاص أهو الأبلة الفالحة ما قصرتش وإن شاءالله ندير اللوسة ونتبننوا الماكلة على أصولها

لكن تبى الحق حسها طيرتهالى اللوسة كان هكى عنادها هلبة ياودى ربى يعطينا وسعة البال

هيا نشوفك يا حلوة بنوض نصلى العشاء

جزاك الله خيرا وتو نولى إن شاءالله تعالى غر بس ما تقلقيش منى

مع السلامة

السلام عليكم ورحمة الله وبركاته

رواد وينكم اختفيتوا مش مبين حد ندوى بروحى من الصبح

هيا تعالى ديرى طلة

نشطوا الموضوع

السلام عليكم و رحمة الله و بركاته
كيف حالك يا مغتربة
ما شاء الله على الكسكسى .. تسلم ايدك.

و الله انتى اللى فيهم
الباين بيكسدونى الجماعة
هادو شكلعم لا يحدفوا و لا يجيبوا حتى الرشاد.

انى رديت عليك فى موضوعك .
بالله قوليلى . ام دنو وين مغطسة يا زعمة؟؟؟؟؟؟؟؟؟؟؟؟؟؟؟؟

وعليكم السلام ورحمة الله وبركاته

الله يديم عليكم هالقعدة

حبيباتي اللوسة هي الهريسة صح ؟

طعمها حااااااااااااااااااااااااااااااار؟

السلام عليكم ورحمة الله وبركاته مشاء الله عليكم كلام حلو عجبنى هلبه كل هدا صار فى رمضان وانى مصكرا الجهاز فرحت بهدرزتكم وكان تبو اى حاجه قلولى وكل عام وانتم طيبين وتقبل الله منا ومنكم

وعليكم السلام ورحمة الله وبركاته

نورتى القعدة يا زهورة

الله يديم عليكم هالقعدة

الله يديم عليك صحيحتك و عافيتك.

حبيباتي اللوسة هي الهريسة صح ؟

طعمها حااااااااااااااااااااااااااااااار؟

طعمها فعلا حااااااااااار و لكن اللوسة تختلف عن الهريسة

الهريسة تصنع من الفلفل الاحمر بدون تجفيف و يفرم مع الثوم و يضاف اليها الملح و الكروية و الكسبر الجاف.

اما اللوسة فهى كما تقدم ذكره فى هذا الموضوع.

الهريسة تستخدم للتقديم كمقبل او مضاف الى السندوتشات . لكن اللوسة غالبا ما كانت تستعملها جداتنا فى طبخ اطباق معينة و خاصة الشتوية منها .

ايضا اللوسة تخزن من ضمن التخزين الغدائى السنوى الذى كانت جداتنا تحرص عليه كل الحرص ,لان طبيعة اطباقنا الليبية يغلب عليها اللون الاحمر و الطعم المتبل و الحار.

شكرا لك زهور .. و خلينا نشوفوك

السلام عليكم و رحمة الله و بركاته

و عليكم السلام ورحمة الله وبركاته
اهلا بيك يا اختى ام عمر .. الموضوع نور بوجودك.

كل هدا صار فى رمضان وانى مصكرا الجهاز فرحت بهدرزتكم

امالا شنو .. احنى مش راقدين ...هههههههههههههه
و احنى فرحنا بطلتك يا اهلا و سهلا

وكان تبو اى حاجه قلولى

يا حبيبتى تفضلى اعرضى افكارك و اقتراحاتك باش نستفيدوا كلنا يا غالية

وكل عام وانتم طيبين وتقبل الله منا ومنكم

و انتِ بصحة و سلامة .. و غفر الله لنا ولكم
و خلينا نشوفوك يا ام عمر .. ما تهربيش.
و السلام عليكم و رحمة الله و بركاته

اهلين يارواد راهو قلبي وعقلي معكم لكن الضرف اصعب عندي اصغار مرضي مع بعضهم تعرفي جاء الصقع وجاء معه ربي يحفضكم المرض وانتي يارواد تخلط عليك ورداتي علي اوخيتنا ام عبدو بام عمر مش مشكله كلنا اوخيات ونتونسوا ببعضنا وانشاالله نستفيدوا منك ياأم عبدو انستي وشرفتي معنا والفضل يرجع لوخيتنا رواد

خير يا رواد بالله قريت الموضوع قلت هدم الجماعة ليبين

شن الجو اموركم طيبة ان شاء الله

بالله قوليلى المنتدى هدا فيه شباب ولا نقلب وجههى لان فى صديقة خبلتنى قالتلى فيه شباب وشارك وكلام من هدا



ومنورة على موضوعك


وتو نعطيكم طرقة الدحى المقلى اكيد ما تعرفوهاش


هى نشوفوكم بخير ان شاء الله


ويا ويلها يطلع المنتدى متع بنات بس نهارها احرف