النهاردة كنت بقرأ في سورة النجم ووقفت عند قول الله تعالى:

" فَأَعْرِضْ عَن مَّن تَوَلَّى عَن ذِكْرِنَا وَلَمْ يُرِدْ إِلَّا الْحَيَاةَ الدُّنْيَا 29 ذَلِكَ مَبْلَغُهُم مِّنَ الْعِلْمِ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ وَهُوَ أَعْلَمُ بِمَنِ اهْتَدَى 30 "


معنى الآية بعيد عن عنوان الموضوع

الآية معناها ابعد عن الإنسان الغافل عن ذكر ربنا ومش عايز إلا الدنيا...والدنيا دي هي آخر طموحاته

فسبحان الله جه في بالي المعنى ده..

لو الواحد كل اللي حواليه كده .. يعمل ايه؟؟

الحل أنك تكون
self motivated
الكلمة دي خدناها في ثانوية عامة للي فاكرها : )

معناها..
تخلي الدافع ذاتي من جواك
كن أنت مُحرِّك نفسك
فماتنتظرش العون من حد

كان في حد صالح بيعينك ... خير وبركة
امسك فيهم وماتبعدش عنهم!
"وَاصْبِرْ نَفْسَكَ مَعَ الَّذِينَ يَدْعُونَ رَبَّهُم بِالْغَدَاةِ وَالْعَشِيِّ يُرِيدُونَ وَجْهَهُ وَلَا تَعْدُ عَيْنَاكَ عَنْهُمْ تُرِيدُ زِينَةَ الْحَيَاةِ الدُّنْيَا وَلَا تُطِعْ مَنْ أَغْفَلْنَا قَلْبَهُ عَن ذِكْرِنَا وَاتَّبَعَ هَوَاهُ وَكَانَ أَمْرُهُ فُرُطًا "
من سورة الكهف



ماكانش في حد جنبك ...مش فارقة!
لأن كده كده أنت ماضي في طريق ربنا وهتمشي فيه لوحدك



وسبحان الله من شكر ربنا سبحانه وتعالى لعبادتك أنه لو وفقك لعبادة أو فعل حسنة أنه يزيدها حسنا في عينيك
"... وَمَن يَقۡتَرِفۡ حَسَنَةً نَّزِدۡ لَهُ فِيهَا حُسۡنًا إِنَّ اللَّهَ غَفُورٌ شَكُورٌ "

ليه ربنا بيفعل معاك كده؟
عشان يشجعك تستمر... بس أنت اللي بتقف!

فنقولك تاني
خليك self motivated !!

يعني لوعايش في صحرا ومش معاك إلا مصحف بس
لا معاك صاحب صالح ولا شيخ يعلمك دين

هتوقف عبادتك على حد ؟؟

هتضل لو اقتصرت على كده؟؟

فكذلك أنت هتكون في القبر وحدك
وهتحشر لربنا لوحدك
وهتمر على الصراط لوحدك

الناس اللي حوالينا ما هم إلا أسباب للثبات
لكن رب الأسباب ربنا سبحانه وتعالى أحق أننا نعلق آمالنا عليه


اللهم اجعلنا أفقر خلقك إليك وأغننا بفضلك عمّن سواك

منقول

وكذا يداك
جزاك الله خيرا