طريقه سهله تعينك على الصدقه
السلام عليكم ورحمة الله وبركاته
اليوم قراءت موضوع لوحده من الاخوات تسئل عن طريقة تعينها على الصدقه بحكم انها ماتقدر تخرج كتير
فحبيت اقولكم طريقتي , اتوقع كتير يعرفو الطريقه بس حبيت افيد بيها الي ماتعرفها
الطريقه مرررره حلوه وسهله وعمليه انا اسويها بحكم اني في نيوزيلندا و طبعا مافي مساكين في الشارع
الطريقه هيا انك تخصصي حصاله او علبة وحطيها في مكان واضح بحيث ماتنسيها وكل يوم تشوفيها عشان تفتكري تتصدقي مثلا حطي الحصاله فوق التسريحه او على كومدينتك
وكل يوم حطي في الحصاله ريال او اكتر حسب استطاعتك ويسير مره في الاسبوع او كل ماتخرجي تاخدي الفلوس وتتصدقي بيها
او ممكن تحطي الفلوس في منديل واعطي ابوكي او اخوكي وهما رايحيين صلاة الجمعه يودوها في صندوق تبرعات المسجد او يعطوها لااي مسكين في الطريق
وممكن كمان انك تخلي الحصاله فتره ماتصرفي الي فيها وبعد فتره لما يسير فيها مبلغ معقول يسير تكفلي بيها يتيم او تساهمي في بناء مسجد
, طبعا تعطي الفلوس لجمعيه خيريه , حتى لو ١٠٠ او ٢٠٠ ريال تقدري تتصدقي بيها للجمعيه الخيريه
كمان في طريقه تنفع للي تكون موظفه , هدي الطريقه اختي الله يشفيها يارب "مريضه بالسرطان باالله ادعولها بالشفاء" هيا الي قالتلي عليها
هيا مديرة مدرسه واتفقت مع زميلاتها انهم يشتركو في جمعيه لمدة سنه وحده بحيث اخر السنه يستلمو ٤٠ او ٥٠ الف
طبعا كل وحده تساهم في الجمعيه حسب استطاعتها ممكن وحده تدخل ب٥٠٠ ووحده ب ١٠٠٠ شهريا وكدا
وبعد مايستلمو الفلوس يتفقو مع جمعيه خيريه تبنيلهم مسجد في اي دوله , طبعا اختيار الدوله يكون حسب فلوسك
يعني ممكن تختاري مسجد في قريه في السعوديه او في اي دوله في افريقيا او اسيا المهم الجمعيه تتصرف
انت بس اعطيهم الفلوس و اختاري الدوله ومساحة المسجد
هدي الفكره ممكن يشتركو فيها مجموعة موظفات , او ممكن تقترحيها على اخواتك او عيلتك
بحيث انكم تتعاونو على الخير وكل واحد يدخل الجمعيه حسب استطاعته
يعني اهم شي النيه وان شاء الله تاخدي الاجر لانك ماتقدري تخرجي كل يوم فهادي استطاعتك
اتمنى الافكار تكون مفيده
لاتحرموني من دعوه بظهر الغيب
رد مع الاستدلال
الروابط المفضلة