مرحبا بنات... كيفكم؟؟
انا عضوة جديدة ولي طلب >>أتمنى ماتردوني<<
عرس اخوي قريب واريد فكرة لزفته طبعا العروس بتكون جالسه عند الكوشه بس ابي فكره كيف ندخله احنا امه او خواته ابي فكره مميزه وبلبس مميز
بلييييييز ماتردوني ابي افكااااار حلوه وجديدة

هلا حبيبتي..
الله يتممله على خير يا رب..
جهزي زفه او شعر للعريس يمشي عليها والام توقف عند باب المدخل وشايله المشلح بإيدها وينفتح الباب وتدخلون انتوا الخوات شايليين مباخر بأياديكم (الا انتوا كم اخت ؟؟ يمكن تخطر ببالي فكره ثانيه..)وتمشون ويدخل هو بعدها ويقابل امه ويسلم على راسها وايدها وتلبسه المشلح ويمسكون ايد بعض وتمشي معاه الين المنصه..
وانتوا تكونون وقفتوا بالمنصه او ممكن تتوزعون وتدورون على الناس تبخرونهم مو ضروري الكل بس اللي قدام او الحريم الكبار لو عندكم طاولات VIP ويسلم هو على راس عروسته ويجلسون..
على فكره العريس ما يمشي بشويش العريس خطوته سريعه شوي..

انتوا الخوات ممكن تلبسون ثياب دقله مطرزه مو شرط تكون بنفس الالوان..

اتمنى اكون افدتك عزيزتي.. ولو تبين اكثر راسليني عالخاص..

اختي دلوعه مشكووووووووره على المرور والرد
اخيرا احد عطاني وجه
ويسلموا على الفكره بس مسوينها ناس ابي فكره تكون مررره مميزه ونزف اخوي كانه ملك ماحد قده وبالنسبه للبس ابي يكون تاريخي ,لدوله,لباس ساحره مثلا
ابي تكون حركه حلووووه في الدخله
وعلى موسيقى بس مادري كيف تكون
اعذريني اختي طلباتي كثير بس ماابي اكلف عليك ردك يكفيني مشكوووووووره كثيرا
لا تتعبي نفسك اذا ماتقدري

هلا حبيبتي

هذي افكار للزفات ومن مجاميعه اتمنى تعجبك..


أفكـار زفة العروس



أولاً : زفة حورية البحــــــــــــــر..


الفكره تم تنفيذها بعرس ربيعتى الى حضرته الاسبوع الى الطاف.... ببدا اولا بالقاعه بشكل عام وبعدين الكوشه واخيرا الزفه او الحركه..
القاعه:
الطاولات كانت مرتبه بشكل منسق وجميل لون الشراشف كان ازرق وعلى كل طاوله وفى المنتصف , كوب على شكل فاز..كبير..وطويل... تقريبا (40سم)(مخروطى)وبداخله ماى وسمكه ذهبيه..

الكوشه:
الكوشه كانت على شكل احجار بحريه والمرجان والطحالب البحريه..وعلى السقف كانوا معلقين اسماك حوالى(15 سمكه على مسافات متباعده.. الكرسى وهذا كان احلى شى.. لانه الكرسى كان مصمم بشكل حلو بحيث اسفل الكرسى مصمم على شكل حوض سمك.. على فكره ترى الاسماك الى فالحوض حقيقيه ..وطبعا الاسماك المعلقه لزينه..عن تصدقون بعد انها حقيقيه

واخيرا :الفكره او الحركه الى نزلت فيها العروسه....
قبل لا تنزل العروس طبعا اطفؤا الاضاءه وظهروا اربع بنات لابسات لباس الحوريات بشعورهم الطويله... وكانت الفساتين بالون الابيض... ونزلوا من نفس المكان الى راح تنزل منه العروسه مع اصوات البحر ..... وعلى الممر كانوا الحوريات يقعدون ويمسكون ايادي بعض ويتحركون بشكل الارجوحه ما ادرى اذا الصوره واضحه بس علشان يخلون الواحد يتخيل انه بالبحر..وبعد ما يصلون عند الكوشه يقعدون على كرسى العروسه... وبعدها تصعد بنت خامسه بيدها صدفه كبير..بداخلها مسكه العروس...

والحين تطلع العروسه مع قصيده بسمها واسم المعرس... وتمشى وبيدها نجمة... تمشى لين ما توصل عند البيت الى حامله الصدفه الكبيره تسلم عليها(تبوسها وتحط النجمه بالصدفه وتاخذ المسكه.. وتكمل شويه بعدين الحوريات الاربع وحده ورى الثانيه تقوم وتبوس العروسه وتروح.. وما يبقى غير العروس على الكوشه....

وتوته توته خلصت الحدوته....



ثانياً : فكرة الأقنــعة التنكريه..



فكرة الأقنعه التنكريه...و بقولج كيف اتنسقينها بعرسج..

طبعاً من الإسم راح يتطلب عليج تواجد الاقنعه التنكريه..إليكم الخطوات اللي بتستخدمون فيها الاقنعه..

و مب أي قناع..في أقنعه حلوه يبيعونا في محلات الأثاث تييج لونها فضيه و راقيه..مثل هوم سنتر..أو the One

المهم..شووووووووووووو الترتيبات اللازمة لعمل الفكره..؟

أولاً : باقتج لازم تكون مرفقه بقناع صغير اللي يكون نص مش كامل...و عليه ريشه بيضه و طويله..

ثانياً : لازم يكون لج انتي بعد قناع .. على حسب فستانج إذا ابيض يلزم فضي و إذا ذهبي .. يلزمج ذهبي و يكون القناع (( نص ))..

ثالثاً : و انتي طالعه للناس اطلعي من الكوشه نفسها..لأنها حركه حلوه..و تكونين لابسه القناع...لين ماتوصلين لإخر الممر بعلى الكوشه..و عقبها شيلي القناع..و عاد الناس بكون فيهم فضول..يشوفون مكياجج..
و الموسيقى اللي تدخلين عليها لازم تكون مناسبه بعد..و فيها شوية اكشن..

رابعاً: عقب ماتشيلين القناع انزلي من على الدرج...و امشي بين الناس..مب بالنص...قومي و امشي بينهم..بس يعتمد على الفستان إذا خفيف عليج سوي هالحركه ..و انتي ماره بين الناس..مدي ايدج و سلمي عليهم.. عاد بستانسووووووووووووووون..انهم سلمو على العروس..

خامساً : و بعد هاللفه كلها ارجعي للكوشه...

سادساً : خوات العروس لازم يكون لهم قناع على الوان فساتينهم...و يرقصون على اغنيه..مناسبه بعد ماتقعد العروس و اتخلص زفتها..

سابعاً : نرجع للتوزيعات..حبذا لو كان على كل طاوله توزيعات فيها اقنعه..و مشغولات يدويه ثانيه حلوه..

ثامناً : حبذا لو الكوشه يكون فيها خيال شوي...شرات القلعه أو ديكور معين مناسب..

تاسعاً : تقدرين اتوزعين مليكان على بوابة الدخول للناس و على المسرح...و لابسين لبس غجري..و هم لابسين اقنعه تنكريه..و تقدرين تتنازلين عن الفكره لو ماتبينها..

عاشراً : الأضواء لازم اتكون خافته..و يكون على العروس و ضوء فلاش مسلط قوي..و يكون هالضوء شغال عليها .. لأن يعطيها جاذبية غييييييييييييييييير..و في حركات حلوه الحين قامو الناس ايبونها..مثل شلال عند ممر دخول الناس...على الأطراف...و في العرس اللي انا حظرته..شفت انهم يايبين شلال كاكاو..و حاطين يمه فراوله و اللي يدخل عادي ياخذ فراوله و يغمصها بالكاكاو و يااااكل..كانت حركه روووووووعه..
ثالثاً : فكرة الطفلة النائمــــــــة (( زفة جميلة ))


تطفاء الانوار ثم يوجه
(سبوت لايت) على مقدمة الممر حيث ترقد طفلة - حوالي 6/7 سنوات -
تلبس لبس أميره تزين شعرها بتاج ناعم وتوضع عصاه على شكل العصاة
السحرية (يعني عصاه بلون فضي أو ذهبي براق، حسب لون الديكور في
نهاية طرفها نجمه) تبدا الموسيقى [يجب أختيارها بعناية حتى تتناسب
مع الموقف أو المشهد] عندما تبدأ الموسيقى
(تمثل) الطفلة بأنها كانت نائمة وتستيقط بحيث تنظر حولها وللسماء
وكأنها تبحث عن شىء ثم تقوم وتمشى وتدور حول نفسها وهي تنظر للأعلى
وكأنها تبحث عن شيء ثم تتعثر رجلها بالعصاة السحرية فتنظر لتحت قدمها
وترى العصاة السحرية وتلتقطها وترفعها للسماء ثم توجهها للبوابه، هنا
تتوقف الموسيقى ويفتح الباب (من الممكن هنا أستخدام مؤثر الدخان) وتطل
العروسة من البوابة .. من الممكن أن تكون دخلةالعروسة على شعر
أو على موسيقى ناعمة حتى تصل
لمقدمة الممر ثم تقف قليلاً حتى ينتهي المقطع الشعري أو الموسيقي.. وتبدأ


رابعــاً: فكرة زفـــة


في البداية كلمت العروس وأستاذنتها أني اعمل الزفة " كنت خايفة ماتوافق " بس الحمد لله وافقت وعلى طول كلمت محل لتجهيز الزفات وطلبت منه يجهز لي زفة بس يضيف لها في البداية مؤثرات ويخليها مرعبة شوي يعني صوت رياح قوي ودقات ساعة مررررة قوية ولما تنتهي المؤثرات يحط موسيقى إبهار يعني موسيقى ملفتة وقوية.. وبعدين الشعر باسم العروسين ثم الموسيقى اللي راح تمشي عليها العروس واخيرا أغاني لما توصل العروس.. وكان هذا الشريط

وبعدين جهزت فساتين البنات اللي راح يكونون في الزفة وكانت زي فساتين الأميرات يعني بيضاء طويلة مع أكاليل ورد على الرأس.. وكانوا 8 بنات

ولما بدأت الزفة أولاً انزفوا البنات على زفة عادية خاصة بالأطفال وكان لهم طبعاً ترتيب معين بحيث أنه 2 يوقفون في أول الممر وبعدين 2 عند الدرج اللي عند المنصة و2 يمين ويسار الكوشة واخيرا 2 وحدة كان معاها البخور والثانية كانت واقفة جنبها. ووقفوا قدام الكوشة شوي لين خلصت زفتهم. وكانت الإضاءة عليهم..
طبعاً كل وحدة من البنات كان معاها شي في يدها يعني شموع وورد وأعمدة المغانسيوم اللي تولع.

بعد ماانزفوا البنات وترتبوا طفت الإضاءة وصارت القاعة ظلام مررررة.. البنت اللي معاها البخور نزلت على طول والثانية عملت كأنها الأميرة النائمة يعني جبنا لها مخدة كبيرة مرة ولونها عنابي عشان تتناسب مع الديكور اللي كان أبيض وعنابي ونامت عليها فوق المنصة وبعدين ولعنا الكشاف ووجهناه على البنت اللي نايمة وشغلنا شريط الزفة طبعا في البداية كانت المؤثرات هادئة وبعدين بدأت تصير قوية وهنا قامت البنت وكأنها خايفة وصارت تدور على المنصة كأنها تبغى تهرب وهي تدور طريق تهرب منه تلقى شي في الأرض وكنا حاطين لها عصا سحرية في أعلاها نجمة والحلو فيها أنه كان فيها زر صغير في الأسفل يخلي النجمة تولع بأضاءة حمراء ولما البنت لقيت العصا صارت تتفرج فيها وبعدين ولعت النجمة " البنت ضغطت الزر " وصارت العصا تؤشر على الباب اللي بتطلع منه العروس, يعني كأنه العصا صارت تتحكم في البنت.

وبعدين فتح الباب اللي بتطلع منه العروس وبدأت الموسيقى القوية وكان جهاز البخار عند باب العروس وانفتح مع بداية الموسيقى بعدين طلت العروس على المعازيم ووقفت مكانها شوي لين خلص الشعر ثم مشت على الموسيقى الهادئة لين وصلت...






فكرة زفة خلية النحـــــــل


حركه حلوه لزفة خلية النحل يمكن تستغربون بس هي يديده..

و ماقط شفت حد مسوي شراتها لاني انا ألفتها بنفسي..

انا كنت مسويه لها تصميم بس مادري كيف احطه..المهم..

شكل الكوشه مثل الخليه مالت النحل فيها ورد و أفرع لنباتات..

و شيفونات .. يالله عاد انتووو اتخيلوووها..

و الأطفال اللي يمشون يدام العروس يكونون لابسين شرات النحله..

و شايلييين معاهم عصي..

اما العروووووووووس...هي اللي بتكووون ملكة الحضور و النحل طبعا..
مع موسيقى مثيرة طبعا..

و هي ماسكة سلة و اتوزع للحضور قطع فيها اشكال لخلية النحل و فيها عسل..
و لما توصل الممر يعطونها الباقة...
و يشيلووون السله عنها ..



خامساً: فكرة سنــــــــين عمري,,


فكرة لزفة العروس وهي ان تكون مراحل تطور ونمو العروس من
يوم ما تكون طفلة :
هذة الفكرة هى ان تكون قدام العروس خمس بنات

الاولى صغيرة ولابسة فستان
الثانية اكبر ولابسة فستان< مرحلة ابتدائية>
الثالثة في المرحلة المتوسطة ولابسة لبس المدرسة
الرابعة عباية وشيلة مع كتب جامعية
الخامسة لابسه لباس تخرج
والسادسة العروس

ويكون الدخول تدريجي الاولى الثانية والثالثة الرابعة الخامسة
العروس هى السادسة ويوقفون لين نقطة ويروحون وتظل العروس وحدها
جربوها وان شاء الله تعجبكم






سادساً : زفة الادغـــــال..



تكووووووووون القاعة للحتفال كلها لونها اخضر بحيث المر مغطر بووورق
الاشجار ووووووووويكون كراسىالمعازيم لونهم الاخضر الفاتح وووووووووتكون
طاولات المعازيم بلون الاخضر العشبى وتكون بوسط الطاولة شموع لونها ابيض
وووووواخضر وووووووووووووتكون نازلة من السقف مثل الاعشاب والخيوط وكانها
الادغال ووووووووووووووووويكونون قسم الخدمة من الفتيات اللى على المعازيم
يكونون لابسين لبس طرازان لوووووووووونة اخضر طوووووووويل ووووووووووووووتكون
بطاقة الدعوة مكتوبة على وووووورقة شجر لتعطينا انطباع ووكاننا بالادغال عرفتو
هذا بالنسبة للقاعة اما بالنسبة للعروووووووووس تكون تدخل على اول شى
اصوات رعد رعد رعد ووووووووووووووواصوات مطر ورعد ومطر وووووووووووبعدين
ااااااااصوات عصافير عصافير ووووووووووبعدين القاء شعر بصوت شاعر
يمدح فية جمال العروسة واهلها وووووووانواثتها وووووووبعدين تبداء الزقاريييييييييييد
واصوات عصافير مرة ثانية وووووووووبعدين اغنية احلام
(شى غريب اللى نشوفة شى غريب شى خيالى شى اروع من الخيال
القمر نازل على الارض ومنير مقبل يمشى ويتدلل دلال لا اله الا الله ........
لا قمر لا شمس لانجم وفل هذى شمس الصبح ووووواقمار الليال )...............





سابعاً: زفــــــــــــــــــة عالــم الثلــــــــــــج



يكون الممر مغطى بالقطن الابيض لتعطى انطباعة كانها ثلج ووووتكون على
اليمين واليسار من اشجار صغيرة لعيد راس السنة التى تعلق عليها
اضواء صغيرة وتكون بين الممرات مثل مجسمات كرات ثلج عملاقة ومجسمات
بالقرب من الكوشة على شكل رجل الثلج وووووويكون جميع الكراسى بلون
الابيض وووووتكون الطاولات المعازيم عليها مجسمات اشجار وعليها اضاءة بسيطة
تغنى عن الشمعة لتعطى جووووووووو ان القاعة كلها موجود بجوووووو الثلج
ووووووووووتكون العروووووس خارج القاعة وتسكر ابواب قاعة الاحتفال
وووووووووووتشغل الموسيقى واول شى تقول مثل دقات الساعة اللى
تكون بحتفالات ليلة السنة دن دن دن دن دن دن دن ووووووووبعدين تفتح
ابواب القاعة وتدخل العروس داخل عربةملكية على شكل عربة بابا نويل
وتكون مسحوبة بحصن وووبعدين تبداء اغنية راشد الماجد اللى تقول
(وش هالذى عينى تشوفة مثل البدر او طلعة الشمس الله يامحلى وصوفة على الحسن هذا ابصم بخمس)
تكون العروس لابسة فستانها الابيض الجميل ويكون قبعة العروس قبعة
بابا نويل الحمر مزينة بقلوب لونها ابيض واحمر تشب اضاءة على راس العروس
وووتكون العروس مكياجها بالاحمر يطلع رهييييييييييييييييييييييب ومسكة العروس
ووووووووورود حمراء ووبيضاء وبينها قلوب تشب اضاءة ووووووووووووووووووتوصل
العروس بالعربة اللى قبل الكوش بشوى ووووووبعدين تنزل من العربة وتذهب
الى الكووووووووووووووش وكانها ملكة الزمان وكل زمان.............


حركة ثانـــــــــية..

في عرس سمعت عنه كانت العروس لابسه فستان نازل منه كور مثل كور الثلج وكان يجنن..
والكوشة مصممة على اساس انها كهف ثلجي وفيها كور الثلج نازله مثل اللي على فستان العروسة وكان ينزل من الكوشة مثل الثلج الابيض وكانت الكوشة من تصميم مصممة اماراتية لما شافت فستان العروس صممت الكوشة...
...و التوزيعات ممكن اتكون فيها صور رجل الثلج..و حركات ...






ثامنا:زفــــــــة قلـــب القلـــــــــــوب


تزف العروس على اغنية على بن محمد (ياحظة )وبعدين يدخل مجسم على شكل قلب حب احمر
ويكون له عجلات من تحت لتحريكة وتكون 2من الفلبينيات ويكون لبسهم لونة احمر سادة
يدزون القلب حتى يوصلونة الى منتصف القاعة وووووبعدين يفتح القلب من النص يكون
لة مثل الباب وتخرج العرووووس ووويكون مثبت على الاطراف جهاز دخان عشان تخرج
العروس من القلب وبعد مايختفى الدخان تتمشى العروس وينثر على العروس قصاصات
من الاورق الاحمر والابيض والذهبى على شكل قلوب صغيرة الى الكوش ويكون على
الاطراف الممر قلوب متناثرة بلونين الابيض والاحمر ووووووووتكون الكوش لونها ابيض
والمراسى لونهم احمر على شكل قلب ووووتكون كيكة المعاريس على شكل قلوب
كبيرة جد وتكون عدد ادوارها من خمس ادوار الى عشرة ,,,,,,,,,,,





فكرة زفة الفراشـــــــــــــــــــة


الكوشه عباره عن حديقة فيها فراشات معلقة في الجدار وازهار كثيره
وكرسي العروس على شكل مرجيحة ثابته وعليها ورود وعلى يمين العروسه كرسيين
صغار وعلى اليسار نفس الحكايه
اما الزفه يدخلون اربع بنات صغار عمرهم سبع سنوات لابسين اجنحة فراشات وماسكين
عصيان على شكل قلوب ولهم زفه خاصة عباره عن صوت ماء وعصافير ويمشون الى ان يجلسوا على الكراسي الصغيرة الي جنب الكوشه وبعدين تكون عند الكوشه بنت لابسه جناح
فراشه أبيض لان الاي قبل لابسين اجنحة ملونه اما الفراشه البيضاء ماسكه صندوق على
شكل فراشه وداخل الصندوق مسكة العروسه وبعدين تمشي على الجسر الى ان تصل
الى بداية الجسر بعدين تدخل العروسه من البوابه وتمشي الى بداية الجسر ثم تفتح الصندوق
وتأخذ مسكتها وتلف الفراشه البيضاء ومعها الصندوق فيه ورد وتنثر الورد على الجسر
والعروسه تمشي وراها الى ان تصل الى الكوشه

ثـــــــــــــــــــــــــــــ ــــــم...

بالنسبه للطريقه الزفه بالبدايه ممكن تخلون الزفه تبدا قبل دخله العروس بصوت رياح قويه وعواصف وبرق ورعد ...ثم دقات ساعه....ثم صوت خطوات واضحه وعاليه جدا ...ثم صوت فتحة الباب ...وهنا يفتح الباب لللعروسه كي تدخل في زفات بالبدايه يحبون يحطون شعر وهذي اول ماتدخل العروس من الباب وتظل واقفه الين مايخلص الشعر ....ثم تبداء زفتها ..في فكره شفتها تكرررت مرتين ..وهي يوضع كوب عصير طوله متر او متر ونص ويكون ملين عصير معين ويكون في مصاصا اول مايدخل العريس والعروسه يشرب هو ثم تشرب هي بعده من نفس المصاصه ((حركه جديده))...ممكن العروس واثناء مشيتها يجي طفله صغيره وشايله معها سله مليانه ورد وترمي العريس والعروس الورد منها على الحضور .....طبعا لازم قبل دخول العروس تترسون لهم الممر ورد تغطون فيه الارضيه او الممر اللي بتمشي فيه العروس
وممكن انك تجيبن ((مادري ايش اسمها))اللي يرتكز عليها الرسام ويرسم فوقها تجيبن مثلها بس تكون حلوه او تودينها لاحد يشتغل عليها بالوان تتناسق مع الوان الكوشه وتجيبين دفتر
فخم وهذا عشان صاحبات العروسه وقرايبها يكتبون لها كلمه وتضعينها عن باب دخول القاعه
واذا جت العروسه تحطينها بالكوشه عشان اول ماتطلع الكوشه هي وعريسها يكتبون كلمه الختام لهذي الليله
وممكن تجيبين واحده ثانيه قبالها وتحطين عليها صوره مكبره للعروسه مع العريس يوم ملكتها ((خطوبتها او صوره حلوه لها مكبره ))

وعلى فكره الحين نازل موضه الكوشه الهندي ممكن تسوي الكوشه وتلبسون اذا جت العروسه لبس هندي وتسون رقصه موحده انتي وبنات العيله قبل دخول العروسه .
الشخصي ببعض الزفات اللي عجبتني بالترتيب:
1-راشد الماجد جدد اغنيه قديمه لفريد الاطرش ((دقوا المزاهر جنان ))خلاها كلمات خليجيه بنفس اللحن وروعه ((اسم الاغنيه احلى ليله))
2-عبد المجيد عبد الله ((محروسه)) شي راقي وحلوه
3-محمد عبده ((الحمام واليمام)) شي تحسينه ملكي قمه الروعه..

************فكرة ثانيـــه*************

تصمم القاعة والكوشة وتزين بالفراشات وتزف العروس على انغام اميرة الورد ( لان هذه الاغنية فيها ذكر الفراشات ( وهي متوفرة كما ذكرت بدون موسيقى ) ويكون امامها 5 بنات بزي فراشات يباع في الاسواق يرقصون ويحركون اجنحتهم والعروس تتبختر وتمشي حتى تصل للكوشة ويمكن ان ترش العروس الورد اثناء زفتها او يرش عليها الورد...



زفــــــــــــــة السندريـــــــــــــــــــــــ ــــلا


عندي حركه و اتمنى انه تعيبكم
اول شي تكون البنت لابسه القحفيه مال الساحره وكنا مسوين عند الديجيه اصوات اول شي صوت مشية الريل وعقب صوت دقت الباب وتكون البنت ميوده عصاه ودق الباب وتطلع بنت صغيره تجوفها الساحره وتسوي حركه براسها (مو عايبتنها البنت (تهز راسها لا)) وعقب ترد الساحره تدق الباب وصوت باب يتبطل وتظهر العروس ع اغنية من تكون السندرلا غيرج انتي والله انتي وتنزل العروس شرات السندريلا تحيه للساحره والساحره تنفخ باللماعي لي ف ايدها وينتثر اللماعي وعقب تمشي العروس ع اغنيه اجنبيه واول ما توصل عند الكوشه في بنات ينقعون الشلق لي بالاوراق والنفاخات البيضه وكااااااااااااااااااان عرس ولا احلى ......




الزفــــــــــــــــــــه البحــــــــــــــــــــــــــ ـــــريه...

يمكن أقدر أفيدكم شوي من الأعراس اللي رحتها ، أول شي تزيين الطاولات و الكراسي في الصاله بلون نفس لون البحر يعني يكون أزرق و دخلين وياه لون ثاني يكون ابيض و تنثرين فوقه لامع أزرق بيطلع وايد حلو و تقدرين اتحطين فوق الطاوله صحن اوعلى قولتنا ( طاسه ) شفافه و فيها ماء و لامع و يا سفينتين صغار في الماء و يكون عليهم اسمج و اسم المعرس كل وحده عليها اسم .. او يكون مثل فازه صغيره و في داخلها سمــج الزينه حقيقي..
وبالنسبه لدخلة العروس اتحطين موسيقى أمواج البحر و يا طيور ( في منها وااايد عند محل بيع الأشرطه أنا عندي واحد ) واتخلين وحده قبلج تدخل اتكون لابسه لبس كأنها حوريه بحر و تتمشى على راحتها و هي تنثر الامع و يا الورود على الأرض ولازم اكون الليتات كلها مطفيه بس موجه عليج و على اللي بتدخل قبلج ، و بعدين تدخل مجموعة بنات شايلين شموع لونها أزرق حاطينها في ماء ، وبعدين وقت ما ادخلين انتي أول شي اتحطين صوت الموسيقى مالت القوات البحريه الاجنبيه ما اعرف شلون اوصفها ) وبعدين اي موسيقى مثل تايتنك اتكون وااااايد حلوه و يكون وراج اولاد اصغار لابسين لبس البحريه يوزعون أوراق لونها ازرق مكتوب فيها شعر عنج و عن العرس و يا حلوى على شكل امواج او سفينه ويا تحفه اللي اكون داخلها ماء ازرق و مكتوب في الداخل اسمج و اسم المعرس في داخل الماء ( وهاي التحفه السوق متروسه منها ) و انشاء الله يعجبك


والفكرة الثانية

..

الطاولات كلها بمفارش بيضاء .. او عليها شبك صيد..او في وسط الطاوله تحطين فوانيس قديمه او داخلهم شمعه(الفكره من فندق البستان روتانا كل احد تكون عندهم مأكولات بحريه والجو كله يكون بحري)
او تقدرين اتحطين الربطات اللي على الكراسي بالون الازرق....
او قبل لا تطلعين يطلعون بنتين كبار شايلين صندوق قديم..او يمشون فيه لوسط الممر قبل الكوشه... وتكون القاعه مضلمه والضوء الازق مسلط عليهم.. يفتحون الصندوق تطلع بنت لابسه لبس حوريه او على شعرا طوق ورد.. تطلع من الصندوق واتسير تجلس على الكوشه ..بعده انتي تطعين على صوت البحر او موسيقى مناسبه للبحر او حواليكي بنات لابسات لبس حوريات


ألف ليلة وليلة

الزفه عباره عن مؤثر صوتي حوار يدور بين الجارية التي تنقل



للأمير أخبار المدينه حيث تقول له ..

بلغني أيها الملك السعيد
ذو العقل الرشيد
أنه كان في قديم الزمان
وسالف العصر والأوان
بنت بارعة بالجمال
يعجز عن وصفها القيل والقال
ولم يوجد لها في هذا الزمان مثال
ذات طرف كحيل
وخصر نحيل
أن أقبلت فتنت
وأن أدبرت قتلت
تأخذ القلب والناظر
كما قال فيها الشاعر

طبعا هنا لابد من وجود شاعر يصف هذي البنت اللي روت أوصافها الجارية للملك ..

كـان ياماكـان عفـوا ماهـي أسـطـورة.............ولكن قصة من واقـع لكـم اليـوم بحكيهـا
كـان فيـه بنـت آيـه بالحـلا وسـوره....................وجما ل الكون ياعالـم كلـه بيـن أديديهـا
أذا أقبلت تنحنـي لهـا الـروس معـذوره...............مثـل الأميـره بعرسهـا الكـل يحييـهـا
هــذي ( ) الـلـي للقـمـر صـــوره....................... ...وربي بهذي الدنيا مافيـه زيـن يضاهيهـا
شعرهـا الأسـود مثـل الليـل بـغـروره...................ورم وشها سهام مسلوله تصيب اللي طمع فيها
و طبعا عذي اضافات عالزفه عشان اتكون احلا..

من ناحيه دخلت العروس يكونون واقفين بنتين على جوانب المدخل ومعهم نفس المراوح او المهفات الكبيره زي حقت الجاريات ويبدون يهفون على خفيف على العروس ويمشون معها لين يوصلون الكوشه ...طبعا هذا الشي ينطبق على اللبس وعلى كل حاجه حتى الكوشه نفسها يكون الديكور مطابق للزفه...راح يطلع شكلها حلو بالمره ..


زفــــــــة العروس و المعرس بالبروجكتـــــر زفه حلوه و جريئة

زفه بشاشة عرض وبروجكتر: ويكون العرض بعد حضور المعازيم يبداء في عرض صور العروسين بجيع مراحلهم العمريه والمناسبات اللى مرت عليهم تقريباً , حتى عقد قرانهم وتكون شاشة العرض موضوعه على الكوشه وستخدام البروجكتر يتم عرض الصور بعد كذا يصور العروسن من لحظة خروجهم من الغرفه الخاصه( طبعاً هذا ما يشوفونه المعازيم لكن يبث لهم على شاشة العرض ) فيهم الى ان يصلون الى القاعة .

ثانياً: زفة سوتها بنت جيرانا وكانت مرررره حلووووه وهي طفو جميع انوار القاعه و ولعوا شموع على كل الطاولات ثم دخلت العروس لكن بدون زغايد على اغنيه عادية توصف العروس دون العريس وفي نص الممر وكانها سمعت زغاريد ثم التفت وشافة المعرس داخل مع اهله ثم شغلو اعنيه فيها الشوق والوله ( طبعاً معموله خصيصاً للعروسين مع ذكر اساميهم) ثم ترجع العروس وتاخذ المعرس من اهله وتنثر الورد ويمشون الين الكووووشه



الجاريـــــــــة و الفانوووس
**ابتدي أول شئ في الكوشه:

الكوشه كانت عباره عن منظرالكهف من الخارج ( في صحراء)
و الديكور كله عباره عن صخور، فيه على جنب جمل و نخله و دلو
و الجانب الثاني في شلال صغير ينزل منه ماي، حتى الكرس
من صخر ممر الكوشه مزينه بباقات الورود،
و خلف الكرسي يعني في نصف الكوشه فيه مثل بوابه صخريه
(اذا تذكرون كهف علي بابا،،،لمن يقول "افتح ياسمسم" و ينفتح الباب...مثله بالضبط )


**و في القاعه:

كانت شاشه تعرض فيها صور العروس المعرس مراحل حياتهم،
لمن كانوا صغار وبعدين لمن كبروا و بعدين صور الملجه.
و إذا الصور اتفشل مافي داعي

**حان الآن موعد الزفه:

تدخل القاعه بنت صغيره مع مؤثر صوتي، وتكون لابسه لبس شرقي(نفس الجاريات)
و في ايدها فانوس. تدخل كأنها ضايعه و ماتعرف المكان و خائفه،
وتظل تمشي بهذه الطريقه لين ماتوصل للكوشه، و على الكوشه يزداد خوفها لأنها تسمع أصوات غريبه
(طبعا هذا كله مع المؤثر الصوتي) وتظل ادور على مكان تلجأ إليه،،،
فتنحني على جره كبيره من الفخار و تظل تمسح في الجره لين ماينفتح الباب الصخري
وراء الباب يكون منظر لكنز من الذهب و بعد دقائق تخرج العروس
من الكهف، و بعدين تمشي العروس على الكوشه و تنزل تحت لين الممر و ترجع للكوشه




زفة العصـــــــــــــــــافير,،..

كان ديكور الكوشه عباره عن قفص ومزين بعدد كبير من العصافير الملونه ( طبعا زينه ) ..

و بجوانب الكوشه في قفصين بعد,,بس فيهم عصافير حقيقيه...

و الزفه هي .. ان تدخل العروس على موسيقى فيها اصوات العصافير و موج البحر..

في البداية اثنين من الأطفال يكونون شايلين اقفاص فيها عصافير بعد..يمشوون جدام العروس.

و العرووس باقتها اتكون فيها عصافير او حمام ابيض..المهم مش حقيقي طبعاً..المهم..

لما توصل العروس مع الاطفال فوق الممر..تبع الكوشه..يفتحون الاطفال الاقفاص و يخلون العصافييير تطير امام الجمهوووووور...

طبعا الاضواء تكوون ملونه على الوان العصاافير..

و مكياج العرووس يكون بعد ملون كأنه قوس قزح..و وااااايد رووووووووووووووعه..و تم تنفيذها بعد..


فكــــــــرة عارضات الأزيــــــــــــاء..


هذي فكرة سوتها وحده من اهلنـــا...جابت عارضتين ازياء .. و ممكن تستغنون عنهم بخوات العروس..يمشون مشة عارضات الازياااااااااء..وطبعا يدخلون قبل لا تدخل العروس بموسيقى عرض الازياء المشهوره انتو تعرفووون كيف موسيقاهم...

و بعــــــــدين هي تدخل وراااااااهم كأنهاااااا هي بعــــــــد تعرض ازياء..بس عاد ..مثل كل مصمم..يختم عرض ازياءة بفساتين اعراس...

فكــــــــــرة الورووووووووووووود الموزعه..


هي شويه فيها حركه من حركات الهنود...انج توزعيييييييين طاســـــــه بس من النووع الحلوووو و اللي منقش على اطرافها الدائريه...و داخلها ماااااااااي و داخل الماي ورد منثر...طبيعي..و مفتت طبعا..

بس عاد لا تترسون الطاسه كلها ورد خلو الماي شويه يبين..المهم..

قبل لاتدخل العروس يدخلون طفلتين ماسكين سله فيها ورد يمشون شوي وينثرون على المعازيم الطفله اللي من صوب اليمين تنثر على المعازيم اللي من صوبها والثانيه كذالك تنثر على المعازيم اللي بجهتها لين يوصلون للمسرح بعدها تدخل طفله ماسكه باقة الورد ..
وتوقف عند المسرح وتجي العروس وتمشي لين توصل للطفله وتبوسها على راسها وتاخذ منها الباقه ..

أما بنالسبــــة للمعرس..

يوم يدخل المعرس تدخل وراءه طفله ماسكه سله في ورود بعد كل ورده مغلفه مع بيت شعر وتوزعه على المعازيم

فكرة بسيطه و سهلة التنفييذ..على موسيقى كلاسيك..أو هنديه..


فكـــــــــــــرة قص شريط البالونــــات،،



يدخل اول شيء طفل وطفله ماسكين يد بعض ... الطفل ماسك ثلاث مخدات من الاصغار مربوطين فوق بعض ومربوط فيها بلونات منفوخه بالغاز بشريـــــــــــط.. أمـــــــــا الطفله ماسكه قفص عصافير داخلة ورود مجففه..
ويوقفون على المسرح ..بانتظار العروس..

بعدها تجي العروس وتقص شريييييييييط البالونات المنفوخه بالغاز وتبطل القفص وتطيــر العصافير ..

فكرة ثانيه عن البالونات..


ان اتكون فوق الممر اللي بتمشي فيه العروووووس...مجموووووعة بالونااااااااات كثيييييييييييييييييرة على شكل قلووووووووووووب...و منفوخات بالغاز,,يعني البالونات اطير,،

و طبعا مربوووووطه بشريييييييييط...

و طبعا لازم الكوشه يكون فيها نوع من البالونات...أو قبل لايدخل الضيوف تكون مسوين حركه بالبالونات عند واحد خبير...

المهم قبل لا تيي العروس..يمشي طفل لابس الكندوره و متعصـــم يعني لاف الغتره على راسه...و شايل مخده حمرا و عليها مقص ملفوف بشريط حلووو...

و يوقف عند البالونات بانتظار العروس...و عقب ما توصل العروس...تبوس الطفل و تمسك المقص و عقب اتقص الشرييييييييييط و هوووووووووووووووووووب البالونات كلها اطييير...

و شكلهم و هم يطيروون فظيييييييييييييييييييع و حلووو...

فكرة ثالثة..

بدل ماتكون البالونات منفوخه بغاز يكونون معلقيييييييييين بشبك شفاااف...فوووق...و لما توصل العروس يفتحون الشبك عليها و تطيح عليها البالونات...بس عاد مب اي بالونات..لازم اتكون شوي ثجيله عشان ماتنفجر على العروس و اتخاف....

واذكر بعد

في زواج اخوي قبل كم سنه سوينا زفة للعصير دخلوا العاملات مع الباب الكبير ثنتين ثنتين حاملين صينية العصير ووحده تروح يمين ووحده يسار وكان عددهم كثير حلوة كانت الحركه مرتبه.. وكانت بعد فيه زفة للقهوة على يلا صبوا هالقهوة وزيدوها هيل ... جايين بدلال قهوة ويصبون للضيوف مع التمر اللي يجيك انواع واشكال اللي عليه سمسم ومطحون الفستق وجوز الهند ومعاه عود اسنان .

وعند خروج المعازيم كانت العاملة اللي عند العبايات تعطي كل وحده تاخذ عبايتها ورده جوري ..

وفيه زواج قريبتي كانوا في الاستقبال خوات العريس وبنات اخواته لابسين فوق ملابسهم لبس ساتان لونه عنابي وموديله شبيه بالفراشه ومن قدام طابعين صورة اخوهم المعرس وأول مابدا الرقص كانت الاغنية الاولى ترحيبيه بالضيوف وبعدها اغنية للمعرس ورقصوا وهاللبس عليهم وبعدها راحوا ونزلوه وكانت تحته ملابسهم حقت الحفله وكانت الحركة مررره حلوووه

و حركه شفتها بزواج كانت حماة المعرس حامله صندوق حلوو لونه خشبي وحاطه فيه شوكلاتات منوعه ومرتبه في هالصندوق مثل الكاكاو اللي يجي على شكل هلله وتغليفته ذهبي مرتبته فوق بعض وجنبه شكولاته نوع ثاني مغلف .. ناسيه انواعهم بس كانت تمر على المعازيم ومعاها هالصندوق وهي فاتحته وتقدمه على الغطاء من جوا حاطة بطاقة واضحة صورة بنتها الصغيرة ومكتوب بيتين تهنئه للمعرس يصير عم هالبنت والحركة حلووه تقدرين تسوينها اهداء منك مثلا او من احد صغير ...


وفيه كمان زواج ابن خالتي ماانزفت العروس وسووا حركه بنص الزواج طفوا الانوار واشتغل شعر زفه ومباركه للمعرس والعروس والكل توقع ان العروس راح تطلع بس طلعوا ست بنات صغار لابسين فساتين لون ابيض اعمارهم من 4 ابتدائي الى 6 ابتدائي ونزلوا على الدرج حبه حبه مثل العروس وبعدها اشتغلت اغنية حلوة للعروسين ورقصوا على الممر رقص حلوو ومرتب اذهل الحضور ماشاء الله عليهم لين وصلوا لمنصة الرقص وكانت عليها انوار ليزر ملونه ورقصوا وكانت الحركة حلووه وغيرت روتين الزواج


بالنسبة للعشاء سمعت عن البنات في المنتديات انك تحطي نافورة الشكولاته في البوفيه مع فواكه وبساكيت واشياء ثانيه حركة جديدة وسمعت عنها في زواج كنت حاضرته بس مارحت صالة العشاء .


اتمنى حبيبتي اكون افدتك ولو بشي بسيط انا حاسه فيك وبشعورك عشان كذا قلت اكتب لك اللي شفته واتمنى تعجبك ماتكون قديمة ...

والله يسعد العروسين .. ومبروك مقدماً


اختك/ سعوديهـ كول

زفات جميله ولو كنت اتمنى الابتعاد عن الموسيقى
غاليتى حلا الكون
شاهدى الفهرس المثبت به العديد من الافكار

اخواتي:دلوعه,سعوديه,رنا
مشكوووووووووورين على الردود
افكاركم حلوه اكيد راح تفيدني
تعبتكم معاي
خلاص حطيت ببالي فكره ان شالله نعملها
بس عندي طلب اذا معكم<<<<<ماصدقت خبر حد رد عليها
تعبت وانا ادور ازياء رومانيه وموسيقى مناسبه للزفة مثل ""موسيقى مسلسل الفوارس,البواسل,الكواسر,العبابيد"""
ادري طلباتي كثيييير بس طالبتكم الفزعه تعبت وانا ادور
لكم خااااالص شكري واجركم على الله

بناااات بليييييييييييز ابي موسيقى لزفة تكون تاريخية رومانية
موسيقى مثل لما يدخل الملك والحرس
ارجوووووكم لاتبخلوا علي ابيها ضروووووري

السلام عليكم ورحمه الله
اتمنى لك التوفيق في حياتك واتمنى انك تقولي لي علي زفات تكون بسيطه وسهله وفي نفس الوقت افكار جديده
لان بعض الناس في بعض الاماكن بتتعرض للنقد بعض الاحيان
بس افكارك مره حلوه واشكرك جدا