يمــه تجي ولا أنا أزحف وأجيك
يوم انشدوني عن دمـوعي وأنا أمــك
جاوبتهـم وابعدتهـم عـن طواريـك
ما ابغى أجرحك في كلمة تزيـد همـك
ما أبغى أقول إن السبـب من تجافيـك
يوم لمست الصدر في يــوم ضمــك
نسيت أنا اللي حـولي وقمت أبكيـك
ما دري إنت عايش وارتجي لمس جسمك
أو ميـت وأقـول يرحمــك واليـك
يـا مـا سِهرت وزاد غمـي لغمـك
ما ارتاح ليمن تهتـني فـي لياليــك
يـا مـا لما طولت نومـك أشمــك
وأتأكد إنك عايشٍ لـي وأرجيــك
ويـا مـا ازعلوا مني خوالك وعمـك
ويا ما هجرت أقرب قريب ضحك فيك
ويـا مـا ذرف دمعي إذا سال دمك
براءة الأطفال مـا هـي بتنهيــك
ويا ما انتظرتك عند بابي وأنا أمـك
وأقول في يـوم تجـي وأحييــك
أخاف مـن يـوم يجينـي يغمـك
ويجيك علمي مع عزيـز يعزيــك
أنا علـى الله داخلـه ثـم لـمك
ارحم قليـب تالي الليل يشكيـك
فكر في من صابها الضيم وظلمـك
واذكر حشاً ضمك وعسر المساليك
ودي أشوفك قبل يومي ويومـك
لـو مرة بالعـام الله يخلـيـك
ما أبيك تقطعني إذا أمري يهمك
بقعد معك وأضحك وأسولف وأحاكيك
يا وليـــدي اذكر كلمة قال فمك
لا قلت كلمة يــوه قلبي يلبيـك
واذكر زمان به فراشـي بجنبـك
ولا شكت قلت يماه وأسليــك
ولا اشتد ما بك فوق كتفي أزمك
ما أرتاح لحظة لين ربي يعافيـك
والختم لا جتك الرسالة وأنا أمك
يُمّــه تجي ولا أنا أزحف وأجيك
من شريط توقيـــع للشيخ ناصر الأحمد
سبحان الله وبحمده سبحان الله العظيم
عن عبد الله بن عمرو بن العاص رضي الله عنهما قال : قال رسول الله صلى الله عليه وسلم : (( ما على الأرض رجل يقول لا اله الا الله , والله أكبر , وسبحان الله , والحمد لله , ولا حول ولا قوة الا بالله , الا كفرت عنه ذنوبه ولو كانت أكثر من زبد البحر )) رواه الترمذي
الروابط المفضلة