ادخلي وسعي صدرك.....
مواقف محرجة
موقف1
مرة كنت منسجم مع النت وحاط السماعات في أذاني اجل في خشتي المهم خاش جو وقعد ابوي يصوت لي بقوووووه ويوم دريت انه يصوت لي عقب ما انبح صوته قمت من مكاني كني مقروص واروح يمه ما دريت الا بهاك الشي اللي يتلني مع وراي اثرهن السماعات نسيتهن مع الربكه وانا اجيك مصلفط على ظهري واروح لأبوي اللي كمل على ظهري بمقفى الزبيرية وعقبها حرمت السماعات مرررررررره
موقف2
كان عندي في سنه من السنين زميله نشبه وماصله ماكنت اواطنها وكانت دايم تتصل علي ومره من المرات رن التلفون وقلت اوووووووه عسى مهيب هي ورديت وانا ما ودي قلت ألو وقعدت انتظر الرد وسمعت الصوت والا مهيب هي قلت هلا ساره والله مابغيت ارد احسبك النشبه خلود ضيقت صدري هالبنت قالت ليه وش فيها ؟ وقعدت افضفض اللي في قلبي عليها وشوي والا يوم تغير الصوت وصار كنه صوت خلود قلت وجع من انتي قالت : انا خلود عقبها زعقت ورميت السماعه في الجدار من القهر
موقف3
حنا مجموعه بنات في الكلية كان عندنا حفل كبير في المدرسه ومشاركين فيه وتاعبين عليه المهم جتنا وحده اعلامية وخذت اسامينا وقالت ان الاسامي بتنزل في الجريدة يوم الخميس عشان تغطية الحفل ونطير من الفرح ونقعد نعلم كل وحده بالخبر ونحتري يوم الخميس لين جا ونروح نجمع زميلاتنا ونجيب لكل وحده جريدة ونقول شوفوا بالله اسامينا كيف طالعه ومنوره الجريدة ويفتحون الجريدة مره ومرتين وثلاث وعشر وما حصلوا شي وقعدوا يعلقون علينا ويضحكون ووجيهنا ذاك اليوم متفشله ويوم تأكدنا لقينا الدعوى تسكيت عقبها كرهنا شي اسمه حفلة او جريدة طز فيهم ونشاطاتهم كخخخخخ
موقف4
المدرسة كان عندها رحلة ترفيهية وكان من عاداتنا انا واخواتي ما نشارك في أي رحله ما تعودنا الا من البيت للمدرسه وبس المهم جتنا وحده وقالت انها سجلت أسامينا في الرحله وان حنا بنروح ترددنا الين شفناها ملزمه ومتحمسه جا موعد الرحله ورحنا للباص المزحوم وركبنا فيه اللي واقفه عند باب الباص مالقت مكان واللي جالسه على طرف الكرسي شوي وتجي المصريه الصواق ( مهيب السواقه ) ومعها ورقه تعد الاسامي عاد حنا واثقين مره كل اسم تقوله نتوقع ان اسامينا هي اللي بعده واسم ورا اسم وخلصن الاسامي ولا لنا أي طاري وجع وش صاير ؟ وكلها ثواني الا والمصريه ترفع صوتها معصبه : البنات اللي ما سمعوووووش اساميهن برااااااااااااااااا
مش نآآآآئصيييين زحمممممه .. وننزل من الباص والعالم تضحك ووجيهنا طايحة في الارض
موقف5
مرة كنت قاعد أطالع التلفزيون ودق الجرس ورحت أفتح الباب ولا أشوف ذيك المسكينة بالعباية والقفازات وأنا على بالي مطوع وأطلع خمسة ريال من جيبي وأعطيها،ما أخذتها وصارت تطالع فيني بنظرة حادة كالسكين وأنا مدري وش السالفة شوي ويطلع من ورا العباية صوت يقول:مسيرةٍ يا وليدي.أثرها صديقة الوالدة، وأنا طاح وجهي طيحة ما بعدها طيحة وأدخل البيت ووجهي مثل الطماط والمشكلة اني اضطريت أوصلها بيتها.
موقف6
كان عمري تقريبا 13 سنه وكان الوقت هو ايام عيد الأضحى . المهم نادوني اهلي انا وولد عمّي وعطوني طعمه وقالوا لنا روحوا وعطو هالطعمه لـ( .....) انا استغربت أول مره اسمع بهالعائله ولا ادل بيتهم قال ولد عمي : ماعليك أنا أدلك بيتهم وانت عطهم . قلت قدام يالله المهم رحنا ويوم وقفنا في اول الطريق قال لي ولد عمّي : تشوف ذاك الباب اللي متقشع لونه ؟؟ حنا طبعا عند بيوت طين وولد عمّي كان يأشر على احد البيوت رديت عليه وقلت له : أي واحد هذا ؟؟ قال : لالا ذاك مهوب اللي وراه ولا اللي وراه ولا اللي بعده اللي عقبه .. قلت طيب علمني اذا وصلنا قال منيب جاي معك .. حنا متفقين انا ادلك وانت تروح لهم وانا الصحيح وافقت توني ادري اني على نياتي المهم رحت لذاك البيت وطقيت الباب وطلع لي رجال وش حليله أستقبلني بذيك الابتسامه وكلامه ينقط عسل وقال : هلا حبيبي كيف الحال ؟ رديت عليه وانا اناظر الأرض كلي خجل ومصدق عمري لأن اول مره واحد يدلعني وقلت له بخير الله يسلمك عمو .. عمو الله واكبر ياللي الحين جاي من الاردن المهم قطعت ترحيبه اللي ينقط عسل وقلت له هـذا بيت ( .... ) وفجــأه ؟؟؟ انقلبت الابتسامه الى تكشيره واحد كأنه يسمع صوت واحد يحك اظافره على السبوره او على كبوت السيارة ( يلعن ام التشبيه ) والعسل اللي كان ينقط من كلامه انقلب الى أسيد وقال لي بصوت كنه كنداسه منشقه من الصوقه : إييييييييييييه ؟ انا والله خفت وقلت في نفسي يمكن الرجال عنده انفصام في الشخصيه والا طب عليه ابو الحروف وعدل الابتسامه المهم قلت له : طيب ياعمو خذ هذي الطعمه .. ومن زين الطبايع عطيته مع الطعمه أسمي الثلاثي ورجعت لولد عمّي اللي كاتم الضحكه وما عطيته بال ورحت للبيت ويوم دخلت البيت يألوني أهلي : هاه وديت الطعمه ؟؟ قلت ايه وقلت لهم القصه ، ويوم قلت اللي صار كاه قالوا لي عسى ما قلت له اسم عائلتنا ؟ قلت : أفا عليكم بس وذي تفوتني عطيته اسمي الثلاثي بعد ، قالوا الله لا يجزاك خير هذي عيارتهم مهيب عائلتهم ويزعلون منها مررره وعرفت عقبها ليش ولد عمّي واقف في آخر الدرب ولا جا معي الهيس المهم ما امداني ابرمج معلومه ولد عمي الا وهاك الطعمه اللي ملفوفه في مصير في خشتي وعقبها حرمت اني اوزع طعم في حياتي...
موقف7
انا واحد اقدر المباريات.. واذا ودي اتحمس واتفاعل مع المباريات لازم اخذ لي علبة لبن لتر المهم جت مباراة قويه وانا ابي اتحمس معها رحت للثلاجه ولا لقيت لبن وانا والله منيب فاضي اروح اشتري من البقاله والمباراة بدت قلت يالله امشي حالي باي شي وقعدت ادور في الثلاجه الين لقيت ببسي قلت اتعبر به ورحت للملحق لأن عندي شباب يبون يشوفون المباراة عندي المهم جيت ولا المباراة بادية من زمان باديه والاغضاره المهم انا انسجمت مع المباراة وخشيت جوها الحماسي ومعي الببسي واحسبة لبن ( متعود ) واقعد اخض فيه واخض فيه واخض فيه لو انه لبن كان صار جبن من هالخض وواحد من ربعي قاعد جنبي ومستغرب ليش اخض ببسي كذا ؟ ووالله وافتحه على جهة التلفزيون والرسيفر ولا ندري الا بهالببسي اللي طار على التلفزيون والرسيفر ودخل الببسي على الكرت وحرقه علينا وانقطع الارسال ؟؟؟ عقبها ماقعدت ولا دقيقه الا والشباب طالعين ولا قالوا حتى مع السلامه .. يبون يلحقون على المباراة في المقهى يمشون 3000 االاف
موقف8
مره من المرات وقفني واحد في الشارع وقال لي انه يبيني اروح معه للبيت علشان احمل معه ثلاجه في سيارتي يبي يوديها لبيت ثاني توه مستاجره وطبعا انا وقتها كنت طفران بالسيارة وقلبي حبوب وافقت فزعة معه وركبت الرجال ورحنا لبيته وخرطت الريوس عند عتبة الباب اقرب للتحميل ورحنا وحملنا الثلاجه ووديناها ويوم جيت ارجعه قال لي معليش ياخوي ياليت والله لو تكرمت نشيل الفرن ؟؟ واستحيت وقلت يالله مهوب عايق يرجال وشلناه ويوم رجعنا قال فيه حاجه اذا ماعليك كلافه الغساله ؟؟؟؟؟ وانا ماش بديت احس بنوع من القفله وقلت يعين الله ونشقلها ويوم رجعنا قال والله فيه بعض الاغراض البسيطه ياليت والله لو نوديها ؟؟ انا انهبلت والمشكله اني قاعد احمل معه واشيل وانزل لوه معطيني 100 ريال كان شويه ومع هالدرج سرداد مرداد ولا جاني الا الغثا وقولته عقب هاك الردود وبكل برود : معليش يا ابني اتعبناك معانا ؟؟ وانا اللي ادق سلف وانا العن الساعه اللي وقفت فيها
موقف9
كنت في مجلس وكنت استحي مره وفي المجلس ناس ما اعرفهم وكنت منزل راسي وعندي بيالة شاهي ويوم خلصت البياله مد يده اللي قدامي ( علشان اعطيه البياله ويصب لي ) انا مع الربكه مديت يدي وسلمت عليه ؟؟؟؟ ويوم دريت انه يقول تقهو ضاع وجهي وفشلت واحمرت براطمي مهوب خدودي وبس
موقف10
مشكلتي اني انسى دايم والنسيان هذا يسبب لي احراجات كثيره . ومره من المرات كان معي واحد راكب في السياره ووقفنا نبي نسلم على واحد مبطي ما شفته ، طبعا نزلنا وقعدنا نسولف معه ويوم طولنا قلت : يالله عن اذنكم واقوم واسلم على الرجال ثم اسلم على خويي معه ؟؟ وخويي اشوفه مبلم قاعد يناظر ما استوعب عاد انا دقيت سلف ومشيت وما دريت الا وخويي يشّر ويزاعق يبيني ارجع والمشكله اني فشلت معه اكثر لأنه يحسبني اصرفه ؟؟
موقف11
انتم خابرين الدراسه اذا بدت صاروا الناس محتاسين كلن يبي يشتري المقاضي يعني قام عز المكتبات في هالوقت عاد انا كالعاده وصوني الاهل على مقاضي مدرسية ورحت للمكتبه وفي بالي اشياء واجده وانتظرت العالم الين يخفون وكنت اهوجس وتفكيري مهوب معي ويوم لمحت العامل حق المكتبه يناظرني قلت فرصه مدامه فضى خن اقوله لو طلب واحد وانا اناظره واقوله : موهمّد ابغى دفتر زوّار ؟؟؟ كشّر وقال دفتر ايس ؟؟ قلت دقتر زوار ماتفهم !! عاد واحد وراي ذب وجهه علي وقال تبي الدفتر من الجهراء والا افضل خليجي ؟ وقعد يضحك انا عاد برمجت كلامه وعرفت اني مضيّع قلت لالالا اقصد دفتر واجبات وتفشلت وخذت الدفتر وجاني هاك الآدمي اللي يتطنز وقال ماودك اوقع لك فيه قبل لا اروح ؟ ياشينه يستخف دمه ابو الشباب قلت له تلايط بس واترك عنك الملاحه الزايده لا اهنّـق خشتك الحين بكم بقس ( ايه هيّن تراني قايلها ) هههه
م
ن
ق
و
ل
رد مع الاستدلال
الروابط المفضلة