السلام عليكم ورحمة الله وبركاته

جئتكم بمقالة لفتاة كتبتها في الرجل الشرقي وموقفه من المرأة حابه أعرف
رأيكم فيها هل هي منطقية وواقعية ؟

أترككم مع كلماتها :

في مجتمعاتنا الشرقية ...في منتصفها بالتحديد ... عند إخواننا الرجال ....... تحدث كثير من الامور اللتي تنافي منطق اصحابها ...

وتجعلنا كثيرا نقف عند اصحاب هؤلاء الاراء ... كيف منطقهم ينافي حقيقتهم .....
عذرا أخي الرجل .... ولكن يحدث كثيرا .....
هناك عقدة إسمها هي ...
تجده كثيراً يبرر أفعاله بجملة واحدة ... النساء ناقصات عقل ودين ... وينسى أن يقف عند معنى الحديث ....
يقحم أوامره في فمها غصب ..
ومو حافظ إلا أية وحدة ويرددها " الرجال قوامون على النساء "

تجد رجل ... عنده عقدة من شيء إسمه المرأة ....
كل شيء يقف عندها لابد إن يكون مختلف ....
أخطائها كبيرة ... وغير مفغور لها أن تذنب ...
ولكن عندما يخطأ الرجل .. مافي غير جملة وحدة تتكرر ..
الرجل شايل عيبه .... وينسى تماماً أن ربي يحاسبهم على أخطاءهم وذنوبهم بشكل متساوي ...

تجده أول مايتزوج .. أول سؤال يسأله زوجته ...
كم عرفتي قبلي .... يغضب إذا كان لها ماضي ....
وهو يجلس يتشدق بعلاقته وغراميته ...

إذا علم أن أخته عندها في الماسنجر رجل ....
يقيم مشنقتها ...
بالرغم من أن الماسنجر عنده مافي غير البنات ....

تجدهإذا سألته زوجته أين تذهب ... قال وش يخصك ...

أنا رجال ..
لاتتدخلين في خصوصياتي ...إنسان غامض الأخ !
.... وهو لازم يعرف وين تروح ووين تجي ...
وش تسوي لين جلست في البيت حتى ..
وإذا راحت في بيت أهلها وش سوت ووين راحت ...

تجده مايفكر في إنه يطبق السنة الا إذا فكر ياخذ على زوجته ضرة ... قال أنا أطبق السنة ....
وماتذكر يقتدي بالنبي صلى الله عليه وسلم في معاملته لأهل بيته .. ...

اذا قالت له زوجته والا امه : الله يخليك ساعدني في المطبخ .. تملكه الغضب ... وماتذكر ان الرسول كان يساعد زوجاته ....
يعني هذا من السنة ...
والا تطبيق السنة مايجي الا في التعدد ...

تجده يشوف امه والا زوجته وهي تعاني في شغل البيت ...
وهو حاط رجل على رجل ... ويتفرج على التلفزيون ويكشها لين جت في وجهه .. ويصرخ عليها ..
مالقيتي تشتغلين الا وانا موجود...
يرمي اغراضه في كل مكان ولايكلف على نفسه انه يحط كل شيء في مكانه .. حتى كاسة الموية .. مايجيبها ...

ولين جابوا خادمة .. وسمع زوجته تصرخ عليها ...
قال .. بس حرام عليك ... ارحموا من في الارض يرحمكم من في السماء ... كأن الرحمة تجوز على الخادمة وبس ...

تجده عنده في جواله سعاد وحنان .. و ميرفت ..
وقبل مايتزوج هند ... وليلى ...
يمشي يتكلم عنهم في كل مكان وبكل ثقة ..
حتى انه احيانا يقول سوالفه لزوجته المسكينة ...
ويستحي يقول لزوجته عند امه وخواته ياحبيبتي ...
وينقلب وجهه احمر ..
لين جاء اسم امه والا زوجته بالغلط عند اي احد من الرجال ...
ونسى ان نساء الرسول صلى الله عليه وسلم ... وبناته .. نعرف اساميهم وحدة وحدة ..
رضى الله عنهم ..
واذا دقت عليه صاحبته وهو مع ربعه ..
رد عليها بصوت عالي ... وجلس يتغزل فيها ...
وزوجته محرج عليها ماتكلمه ابد وهو برى البيت
...وخاصة اذا كان بالدوام والا في الديوانية ....
وان حصل شيء مهم ودقت عليه ... يكلمها بجفاف ..
ويسكر بسرعة ....

تجده لين تعرف على فتاة ... حلل لنفسه الغزل ...
وان يجلس مع بنت الناس .. ويشوفها ...
ومايرضى على وحدة من خواته ان يصير معهم كذا ....
على بنات الناس معليش .. بس اخواته محشومين ...
واذا ناقشته قال لك ... محد جبرهم يسوون علاقات
ونسى ان في الدنيا كل شيء سلف ودين
وزي مايلعب على بنات الناس .... بيجيه يوم ربي يسلط عليه من يتحرش بخواته ...
ومن دق باب الناس .. يجيه يوم يندق بابه ...

اذا طفش في يوم ومايبي يتحمل مسؤولية قال لك ابي اتزوج مسيار... ولين جاءه واحد يخطب منه اخته مسيار
... طرده من البيت ..

تجده يتكلم عن الدكتورة الفلانية .... والمهندسة الفلانية
ويتكلم باحترام عن النساء الاجنبيات العظيمات ..
واذا قالت له بنته او اخته ابي ادرس هندسة ولا طب ...
عطاها بالعقال ...

تجده يمشي في كل مكان ويذم بنات ديرته ...
ويكتب قصايد في عيوبهم ...
واذا شاف واحد يمدح امه والا زوجته قال عنه مهوب رجال ...

الى متى ستظل المرأة هي العنصر الخفي تحت الستار .. هي امك .. وزوجتك .. واختك ... وابنتك ....
ومازلت تخجل منها وتعاملها هكذا .

.
.
ياليت أسمع أرائكم بصراحة
وموضوعية هل هذا النوع موجود فعلاً
أم أن الفتاة ستعتبر حانقة على الرجل الشرقي ؟
بإنتظار تفاعلكم

أوف أوف أوف
أختي سحر يشرفني اكون اول من ردعلى موضوعك

لكن صدقيني انتي تتكلمين عن رجل شاذ


الرجل الشرقي الآن اصبح اكثر تفتح وعقلانية وتفهم

صح الرجال في الماضي كانوا نسخة طبق الاصل مما ذكرتي لكن الآن لا

والدليل: شوفي المرأة دخلت كل مجالات الاعمال
نرى الدكتورة..والمهندسة...وسيدة الاعمال...والصحفية ...ووووووالخ

وأكيد انهم وراهم رجال متفهمين وشرقيين طبعاً


هذي وجهة نظري

واختلاف وجهات النظر لايفسد للود قضية

أختك//أم تركي

اصراحة انا مو معك ياامك تركي

الرجال الشرقيين نسبة ضئيلة عندنا صاروو متخلفين عذرا على هذي العبارة
وزدادو حقد على المراة

صحيح اني انا ليس منهم ولكن رأيت الكثير والكثير الي اوجع قلبي منهم

انتي تقولي قبل كانوا كذا انا اقولك قبل كانوا يهبلون اقلوبهم على بعض كل واحد يوقر ويحترم زوجتة
الحين يدوس عليها واذا صارت السانها طويل باس وطئت اقدامها من الخوف
اعذريني يااختي على هذا الكلام ويعذروني الرجال..
ولكن نقف وقفة هنا ..
ليس كل الرجال مثل ماقالت الاخت سحر بل يوجد العكس
يوجد الحكيم العاقل الحنون المتفهم
لانه لو لم يوجد لكان النساء مطلاقات وقاعدين في بيوتهم
ولكن المقصود البعض من الرجال
وارجووووووووو رجاء ان يغيرو هذي النظرة والا بفقع عيونهم
ارحموا المرأة وارجعوا لها كرامتها لانها فقدتها بسببكم...

هلا أم تركي
أنا الأسعد بردك والموضوع ما طرحته إلا للنقاش
ومعرفة مدى واقعية المقال للكاتبة

الرجل الشرقي الآن اصبح اكثر تفتح وعقلانية وتفهم

أكيد صار أكثر تفتح لأنه صارت عيونه أوسع وصار يبصبص على الرايحة والجاية
وعقلاني طبعاً لأنه لازم يحسبها صح فأي شيء تطلبه المرأة لازم يشوف هو
في مصلحته أو لا
ومتفهم يسمح لها مثلاً بالوظيفة عشان نتصرف هي على البيت
ويتخلص هو من المسؤلية

والله ياأم تركي أنا ما أعمم ولا صاحبة الموضوع
لكن النماذج هذه نشو فها بالواقع ونحب أن يرى الرجل بعض أخطائه
ليصلحها
وشيء أكيد أنه يوجد من هو راقي بالتعامل مع المرأة ويعتبرها نصف
المجتمع
شكراً لمرورك وتعجبني صراحتك

ام اويري

حياك أختي
إتفقنا إن هذه النماذج موجودة
لكن مو لدرجة الحقد على المرأة لا
أنا أشوفها سوء تعامل وسوء أخلاق وإلا لو الرجل إلتزم بالتعامل مع المرأة
مثل تعامل القدوة الأعلى محمد صلَّ الله عليه وسلم لكان الوضع أحسن بكثير
وقلَّت تلك المشاكل والصراعات بين الرجل والمرأة

انتي تقولي قبل كانوا كذا انا اقولك قبل كانوا يهبلون اقلوبهم على بعض كل واحد يوقر ويحترم زوجتة

الحين يدوس عليها واذا صارت السانها طويل باس وطئت اقدامها من الخوف

أكيد يختلف حسب العصر والزمان
لكن توصل الأمر أنك تفقعين عيونهم لااااااااا حرام يكسرون الخاطر
أسعدني ردك المرح وشكراً لمرورك

والله ياأخت سحر سامي صح لسانك كل الي مكتوب عن الرجل الشرقي صح مليون بلمية ومو ضروري نعمم أكيد في رجال عاقلين ومتفهمين ويحترمون المرأة ولكن......أنا عبشوف أيامنا هذه أسوء من أيام أجدادنا صدقوني كان الرجل يحترم المرأة أكثر مع انو كان غير مثقف بلنسبة لرجل هذا الوقت أصلا كانت نسبة الطلاق قليلة جدا والآن نشاهد في أروقة المحاكم الطلاق أكثر من الزواج

يسلمك الرحمن ويحفظك يالغالية

اختي الحبيبة سحر سامي كلامك صحيح بس مو الكل

بجد انا اخواني والحمدلله وماشاءالله اكثر من العسل معاي تاركين لي الحرية بحدود
وعندهم ثقة في كثير وابدا ما عمرهم قالوا لا او انهم استغلوا انهم اولاد بالعكس

وعندي اخ واحد متزوج بس صراحة ما عجبتني شخصيته مرة تارك زوجته تعمل كل شئ دون اي محاسبة صح ما تعمل غلط بس متى ما تبغى تطبخ تطبخ واذا ما ودها تركها لو حتى شهر ويجئ يتغدا عندنا لانه سكان فوق بيتنا وتطلع مع صديقاتها لو ان شاء الله ترجع الفجر والكلمة كلمتها بحسه يخاف مرة على زعلها وهي مطنشة مرة و لاهمها
صراحة انا اتمنى رجل يأمر وينهى مش ظل راجل بجد والله

ازواج اخواتي شخصياتهم حلوة يحترموا اراء اخواتي بس احس لهم هيبة انا بحب الشخص الي له هيبة بحس انه راجل بجد

الصرحه كلامك صحيح يا سحر سامبي بس لاننكر انا في نسبه ضئيله من الرجال عكس كذا
واشاكره لك

أنا مع هذا الكلام الا من رحم ربي وهذا شئ يرجع للتربية اذا تربى على احترام الأنثى وان الذكر والانثى متساوين بالثواب والعقاب وان فيه حدود للدين لابد انه مايتعداها أكيد راح يكون عكس الكلام اللي مكتوب

لكن اذا ماتربى صح وكانوا والديه مقصرين معه بالتربية وكل شئ عادي مافي حلال أو حرام واذا كان والده يهين أمه وكانت اخته في البيت مهانة وهو كل طلباته مجابة أكيد بيتربى على هذا الشئ ولم يتعود على ان يقال له هذا الشئ حرام مايجوز عيب أكيد راح ينطبق عليه هذا الكلام