د.شريف عرفة......
مفيش حاجة اسمها واقع

كان واجبا على ان اعرف الاخرين به وبثقافة البرمجة اللغوية العصبية(هي فن و علم الوصول بالإنسان لدرجة الامتياز البشرى التى بها يستطيع أن يحقق أهدافه و يرفع دائماً من مستوى حياته) التى يسعى الى نشرها، و بالفعل اخذت موعدا و كان لقاء مع د. شريف عرفه الكاتب المتخصص فى البرمجة اللغوية العصبية و التنمية الذاتية .
--عرفنى ب د.شريف عرفه؟؟
انا خريج كلية طب اسنان جامعة القاهرة و رسام كاريكاتير فى مجلة روز اليوسف من 7 سنين.بدأت كرسام كاريكاتير نفسه يغير المجتمع من حوله لكن بعد فترة طويلة اوى اكتشفت ان الكاريكاتير السقف بتاعه النقد و السخرية بس مبيقدمش حلول .
---اصلا مين مؤسس العلم ده؟؟
ريتشارد باندلر و د.جون جريندر وده انا درست تحت ايده و معتمد منه..
__وايه اللى دفعك لتدريسها؟؟
انا كان همى اصلح المجتمع و السلبيات الكتير فى تعاملات الناس فلما لقيت البرمجة اللغوية العصبية هتفيدنى فى ده اكتر اتجهت للتعمق فيها

--د.شريف كلمنى عن كيفية تخطى الفشل او التفكير بايجابية؟؟
قوليلى كام واحد واخد لقب بطل العالم بالنسبة للناس التانية كلهم او كان واحد واخد جائزة نوبل ؟..اكيد مش كتير.
عشان الانسان يكون ناجح لازم يعرف ان ده صعب وتكون حاطط فى دماغك انك هتكون من القلة فى المجتمع و مش واحد من القطيع،،و هتكون متميز ، وعشان اكون انسان مش عادى او متميز لازم اتعب اوى.النجاح صعب و محدش هينجح وهو واقف مكانه.مثلا فى ناس بتتحجج بالظروف و المشاكل اللى بتواجهم فى الحياة، لازم يفكروا فى حلول بدل ما يشتكوا.
ازاى اتوقع انى هنجح من غير مشاكل .


-- و ازاى نحول الفشل لنجاح؟؟
اديسون مخترع المصباح الكهربائى جرب 999 مرة قبل ما يوصل لاختراعه ولما هاجمه الناس قال انا جربت999 محاوله لا تؤدى الى اختراع المصباح و اتعلمت منهم فنجحت،هو ده تحويل الفشل الى نجاح،لو جالك سؤال فى امتحان ومعرفتش تجاوبه ده فشل ،هل بعد كده لو جالك السؤال ده مش هتعرف تجاوبه؟ خلاص اتعلمت و التعليم نجاح وفى كلمة مهمة اوى بتقول ان الفاشلين هم ناس توقفوا قبل النجاح بخطوة.يعنى انت عمال تجرب كتير و فى المرة اللى فكرت تقف فيها هى دى المرة اللى كنت هتنجح فيها.
افتكر فشل حصل فى حياتك وانت اتصرفت غلط فى الموقف ده ،لو الموقف ده اتكرر بحذافيره هل هتتصر نفس التصرف اكيد لأ؟ انت كده عرفت حاجة مكنتش هتعرفها لولا وقوعك فى الموقف ده.انت كده ناجح.
كل موقف فى مكسب و خسارة لو ركزنا على الوحش هنتعب .السعادة او التعاسة دى اشياء جوانا احنا اللى بنخلقها ...مفيش حاجة اسمها واقع.
--هايل طب وبالنسبة للثقة فى النفس ازاى انا اثق فى نفسى وقدراتى؟
اولا لا تجعل تقبل الناس لك مقياسا لاحترامك و تقبلك لنفسك..
تقبل فكرة ان بعض الناس مش متقبلانى ده شىء طبيعى جدا ،هقولك حاجة فى ندوة من ندواتى قلت للناس اللى بيحب جمال عبد الناصر يرفع ايده..طيب اللي بيحب
جيفارا.. أو غاندي.. أو ..أو .. و كان طبيعي جدا ان مفيش شخصية الناس كلها بتحبها او بتكرهها... .
احنا مينفعش نرضى كل الناس لان الناس مختلفين،فى واحد بيحب اللون الزرق وواحد بيحب الاصفر منا يا هكون ازرق او اصفر
فى نص كلمة للكاتب الكبيرأحمد رجب بيقول فيها : الارض مليئة زنادقة وملاحدة و عبدة بوذا و عبدة بقر فلو عملو استفتاء على ربنا و حاشا لله طبعا لن يحصل على 99 فى المية !!
لو الناس مش متقبلاك اعرف ان لا يمكن الناس كلها هتتقبل واحد ،خلى فى بالك ده ،تانى حاجة افصل بين تقديرك لنفسك و تقدير الناس ليك .
تالت حاجة اتعلم مهارات التواصل مع الاخرين وبالتالى هعرف اتعامل احسن مع الناس و مش هكون خايف ان حد يرفضنى طب ما يرفضنى..
فاقد الشىء لا يعطيه ...لو انا مش متقبل نفسى و حاسس بالتقدير الذاتى الناس هتشوف ده

--فى معظم كتاباتك بتركز على ان مفيش ظروف ..يا ريت تشرح اكتر الموضوع ده؟
لو واحد ساب شغله، او رئيسه فى العمل طرده المفروض انه هيحس بالتعاسة لأن الظروف اللى حواليه بتجبره يكون تعيس لكن لأ الحكاية مش كده ،التعاسة دى مش جيا من الموقف هى جيا من الحوار الداخلى بينه و بين نفسه هيقول ايه؟ معنى ان انا اتطردت ان انا غير كفء و انى فاشل و الناس مبتحترمنيش و بالسبب ده بيشعر بالتعاسه.
طيب تخيلى لو خرج من الشغل و قال لنفسه يا ساتر اخيرا خلصت من الراجل المقرف ده ، اخيرا انا حر،ساعتها هيحس باحساس مختلف ساعتها.
الظروف اللى حوالينا مش هى اللى بتعمل احساسنا ،اللى جوانا هو اللى بيخلينا نستدعى شعور السعادة او التعاسة.لما تلاقى نفسك تعيس اعرف ان المشكلة جواك مش فى الظروف.
احنا بنتعلم ازاى نعالج مشاعرنا بفن التحكم بالمشاعر.

--طب وايه هو سر العلاقات الناجحة؟
عامل الناس كما يحبون ان تعاملهم ،لأن لكل انسان ليه شخصيته و طريقته..هتكلم الروسى بالروسى و اليابانى باليابانى،،عاملي كل شخص بالطريقة المناسبة له ه مش المناسبة ليكي انتي.
---و ايه حكاية مناطق الراحة او ال comfort zones؟؟؟
الانسان لما يبعمل نفس الحاجات مدة طويلة وبيتعود عليها وعلى نتائجها،بيخاف اوى يعمل غيرها،او انه يجرب يعمل حاجة جديدة و مختلفة ..هى دى مناطف الراحة،انك تريح دماغك و تفضل فى مكانك.
مفيش انسان ناجح و واقف فى ال comfort zone بتاعته،لأ طلع و جرب ونجح .
لازم تضغط على نفسك عشان تنجح،لازم تجرب ومتريحش دماغك و الا هتفضل مكانك.



و ايه جديد د.شريف عرفه؟؟


انا عامل تطوير لفكرة ال nlp عن التحكم فى المشاعر ودى بتناسب العرب اكتر لأننا كلامنا كله احاسيس و مشاعر غير الناس بره،يعنى احنا ممكن مندخلش محل عشان بنكره صاحبه.. فلو قدرنا نوجه مشاعرنا صح هنكون ناجحين اكتر مع نفسنا و مع الاخرين.وفى كتاب اسمه ( لماذا من حولك اغبياء؟) ده من تأليفى وده نزل فى معرض الكتاب . وعلى فكرة انا ليا فقرة كل اسبوعين فى برنامج شبابيك بتكلم فيها عن ال NLP

---عايز تقول حاجة تانية؟؟
احنا بنعيش في الدنيا دي حياة واحدة بس.. خليها تبقى أفضل حياة ممكنة.