السلام عليكم ورحمة الله وبركاتة ...

لقد سمعت نداء الاخت ورد الخال بانها تريد بعض المواضيغ الفكاهية وانا معها ايضا لاني الاحظ ان اغلب المواضيع يغلب عليها طابع...... وحبيت ان نبتسم قليلا مع المواقف الطريفة التي تعرض لها الاخوة والاخوات الاعضاء ( وارجو من الجميع المشاركة )

وانا ببداء بموقفي (بعد اذنكم طبعا)...
بسم الله...
هذا الموقف صارلي لما كنت مسافرة شهر العسل .. كنت اتمشى انا وزوجي في مكان عام ومتروس ناس على حظي (مقرودة)وكاشخة تدرون عروس المهم نازلة انا وزوجي مع الدرج ماحسيت الا الناس اسمعهم يقولون سلامات سلامات ، ماتشوفين شر ومن هالكلام اثرني طحت من الدرج يووووووه من الفشلة ماقدرت اقوم وادور زوجي الا هو هناك منحاش وواقف مع الناس وميت من الضحك ولا كنة يعرفني ... المهم قمت وحالتي حالة رجولي وحدة قدامي وحدة وراي وشلون ماادري ههههههه هههه ههههههههههههه لا تضحكون علي هههه وما حسيت بالعوار من الفشلة الا لما رجعت للبيت صارت رجولي تعورني وظهري ..


بس الله انتقملي منه (يمهل ولا يهمل ) بعد الطيحة رجعنا للفندق وكان فية باب من زجاج من كثر النظافة ما يبين ان فيه باب المهم انا قاعدة حزينة ومنفشلة ههههه وهو يمشي ويتذكر الموقف ويضحك وما انتبه للباب ما سمعت الا صوت الضربة الا هو طايح ضرب الباب وطاح هههههه ههههههه
عاد جاء دوري اتشمت فيه ( وابرد كبدي )ضحكت عليه ليييييين بردت كبدي وللحين اضحك هههههههههههه

وسلامتكم ...
يالله عاد ابي كل وحدة منكم تقول اي موقف طريف حصل لها.... عشان اضحك عليكم مثل ما ضحكتوا علي هههههههه
تحياتي لكم
ام الطيحات هههه قصدي ام الوليد..

السلام عليكم ورحمة الله وبركاته
اما انا من المواقف الطريفة الي حصلت معاي اتذكر انه مرة انا وزوجي كنا نتسوق وبعدين اعجبتني نبتة واشتريتها المهم جلست اسبوع وانا اسقيها من فرحتي فيها تخيلو ايش الي حصل بعد كذه
-
-
-
-
-
-
-ههههههههههه
-
-
طلعت بلاستيك مو حقيقية
مع ان شكلها كانه حقيقي لكن من فرحتي مادريت
لحبي الشديد بالشتلات<IMG SRC="http://www.montadalakii.com/ubb/smilies/cwm32.gif" border=0> <IMG SRC="http://www.montadalakii.com/ubb/smilies/cwm32.gif" border=0> <IMG SRC="http://www.montadalakii.com/ubb/smilies/cwm17.gif" border=0>

فكره حلوه يامسلمة وبصراحة ضحكت علي زوجك حتى قلت بس .

مسكين ماامداه يتهنئ بالموقف الي صارلك .

أما انا فالموقف الي اتذكره اني كنت مسافره إلى أحدى الدول وصادفت وحده من السعوديه على العموم جلست اسولف معها قالت لي اني أخاف من الصراصير ومن الحيوانات وكانت عروس عاد جلست اتفلسف عليها واقولها يعني الحرمه لازم تصير ثقل ولا تهتم بهالأشياء وبعدها على طول جلسنا في مطعم على البحر وانا جالسه إلا ذاك الشيء الي جاء مسرع ومر من تحت رجلين وادقها صرخه سمعها كل الي حولي واطيح على ورى انا والكرسي .
عاد انا كنت احسبه كلب إلا هي قطوه لأني ما اطيق الكلابه لو اني كنت داريه كان ما ارتعت وصار الي صار .

ويوم قمت إلا وهي واقفه وتناظرني وقالت لي بعدين ماشاء الله عليك ثقل .
بصراحه ضاع وجهي لا عندها ولا عند العالم الي كانت جالسه الله يستر علينا .
الله لايعيده من يوم .

والله مواقف جدا مضحكه وهاكم الموقف الي صارلي في ايام الدراسه في حصة الرسم كان ماعندنا شغل خلصنا رسم وقعدت اترجح بالكرسي ياما رحت جدام وياما رجعت ورى المهم ما وعيت الا وانا طايحه والكل حوالي يضحكون والي تقولي سلامات وموقف ثاني مع زحمة البنات حوالين الابله بدلا من اقولها ابله قلت يبه يبه بس الحمد لله تداركت الموقف بسرعه هاه اشرايكم والله شكثر بس مو متذكره منها الا القليل <IMG SRC="http://www.montadalakii.com/ubb/smilies/cwm44.gif" border=0>

------------------
اللهم انت ربي لا اله الا انت خلقتني وانا عبدك وانا على عهدك ووعدك ما استطعت اعوذ بك من شر ما صنعت ابوءلك بنعمتك علي وابوء بذنبي فاغفر لي فانه لا يغفر الذنوب الا انت

السلام عليكم
فكرتك حلوه كثير انا بشارك لكن الموقف مو لى بطولة ولد من اهل زوجى 00
كنا فى عيد الاضحى دخل الولد على امه يبكى سالته
امه: فى احد ضربك ؟
قال لها: لا
قالت له :اخوانك ما لعبوك معاهم ؟
قال لها : لا
وهو يبكى والدموع تنهمر من عيونه
قالت له:طيب ليه تبكى وش صار لك ؟
قال لهاوهو طبعا يبكى ويالله يخرج الكلام:
الرسول (عليه الصلاه والسلام)
-

-


-


-

-


-

-مات
انصدمت امه من الكلام اللى قاله 00000
قالت له:يا حبيبى الرسول مات من زمان‍‍‍‍0
قال لها وهو متاكد من كلامه : لا الرسول مات امس
حاولت تفهمه بجميع الطرق المتوفره عندها ما نفعت ولا طريقه وهو على حالته يبكى وفعلا كان حزين وجالس فى البيت مايخرج مع الاطفال 00
و لكن لكل بدايه نهايه00
اتضح ياعزيزاتى فى النهايه انه كان يتابع مسلسل يحكى عن حياة المصطفى الكريم وفى نهايه المسلسل مات الرسول عليه الصلاه والسلام 00والولد على باله مات فى نفس اليوم
جلست اضحك عليه من كل قلبى ما خلينا احد ما قلناله لا وبعد عينه قويه
اقوله : الرسول مات امس ها
يقول لى وهو معصب : ترانى ما امزح الرسول
( عليه الصلاه والاسلام) مات امس انا شفته
المهم لا تستغربون الولد توه فى اولى ابتدائى 0
يعنى ماينلام

------------------
يارب لك الحمد كما ينبغى لجلال وجهك وعظيم سلطانك

بصراحة أنا نسايه بالمرة ولما قرأت الموضوع أعجبني وقلت لازم أشارك وافتكرت موقف حصل قبل فتره قصيرة
كنا في عزيمة وكان المجلس مليان حريم وفيه وحده جالسه وشايفه نفسها ومأحد معبي عينها كل شوى تفتح الشنطه وتطلع المرايه وتشوف شكلها المهم هذي المرة لما فتحت الشنطه كان فيه ولد صغير بس فضولي راح بغى يشوف أش أتخرج من الشنطه ولما حط وجه في وجهها من شدة الفضول عطس وعاد تعرفون عطاس الأطفال يكون مليان رذاذ جاء كله في وجه الحرمه بس تدرون وين الموقف الطريف في أنا لأني ما قدرت امسك نفسي من الضحك وكل ما طالعت فيها تذكرت الموقف وضحكت وصرت انتضر متى نرجع البيت
صحيح انه بايخ بس وقتها كان عاجبنى مدري ليه ....................

هلا بالحلوات والله كنت فى حاله كابه الله لايوريكم المهم فتحت النت وشفت ها العنوان وضحكت من المكتوب الله يخليكم فرجتوا همى الله يفرج همكم
انا معى اثنين الاول مع اختى ايام ....المهم دخل دبور فى الغرفه وانا ما احبهم واخافهم المهم وقف على الدريشه وقلت بينى وبين نفسي خلينى وبسرعه اضربه بالكتاب الى عندى ايامها كانت امتحانات المهم وبسرعه ضربته وما مات وعاد كان يطيير وحسبته ياي يلدقنى وانى ارجع على وراء وهو يلحقنى الا وما احس الا انى براس اختى يعنى طحت على راسها المهم هى قامت مفزوعه وتطالع شو الي صاير خبرتها دبور وما صدقت الا طاخ طيخ وانى انضرب واضحك والله ايااام
المقلب الثانى فى الغربه عااااد اتمشى انى وصاحبتى اليمنيه وايام ثلج وشوى وهى زحطت رجلها وحبت تمسك فيه وانا عبالى فار وهى عاوزه تبعدنى عنه المهم رجعت بسرعه وهى ما حصلت الى تمسكه وقعت اخخخخخخ المهم اليهال ما خلوها وقاموا يلرموها بكرات ثلج ليش لانى ميته ضحك عليها ومو قادره اوقفهم ولا اهدهم
بعدين وبعد ما شبعت ضحك ساعدتها على الوقوف وهاوشت اليهال
واللهفكرتك حلوه ويالله بعد ننتظر المشاركات<IMG SRC="http://www.montadalakii.com/ubb/smilies/cwm27.gif" border=0> <IMG SRC="http://www.montadalakii.com/ubb/smilies/cwm27.gif" border=0> <IMG SRC="http://www.montadalakii.com/ubb/smilies/cwm27.gif" border=0> <IMG SRC="http://www.montadalakii.com/ubb/smilies/cwm27.gif" border=0> <IMG SRC="http://www.montadalakii.com/ubb/smilies/cwm27.gif" border=0>

------------------
اللهم انى اسالك العفو والعافيه والمعافاه الدائمه فى الدنيا ولاخره

جزاكم الله خيرا...ومن مواقفكم خرجت بفوائد...

1-تأثير الإعلام السيء على أطفالنا..والذي أصبح المصدر الأساسي لثقافاتهم والذي امتد الى ثقافتهم الدينية.
2-المتكبر مثل الواقف على الجبل يرى الناس صغارا ويرونه صغيرا .
3-أن الأم هي القدوة الأولى لصغارها فلتضع في اعتبارها أنها لابد أن تربي أولادها على القوة والشجاعة ولن تكون كذلك مادامت تخاف من الحشرات.


---------
مختارات من مجلة مساء…
**********************
قالت أمي:أن أختك اتصلت بالتلفزيون..قلت:بماذا!!قالت:بالراديو أقصد..قلت:بالفديو(مازحة)..قالت:نعم..بالفديو..لالاب التلفزيون..لالا(بالتليفون)..ثم قالت:أعوذ بالله أشباههم تتسامى!!.قلت :تقصدين أسماؤهم تتشاب؟قالت/نعم..ما هذا اللسان المعوج.
----
حكى لي أحد الإخوة أن صديقا لأبيه اسمه:سعيد مبارك اتصل بهم ذات يوم عيد:
-السلام عليكم.
-وعليكم السلام..من المتصل؟
-سعيد مبارك..
-عيدكم مبارك علينا وعليكم.
-قل للوالد سعيد مبارك
-الله يبارك لك..من نقوله.
- ياأخي قله كلم سعيد مبارك.
- --------
اتصل أحدهم ببيتنا فرد عليه أخي الصغير فقال المتصل:هذا مصنع شوكولاته؟..قال أخي الصغير:يا ليت.
---------

هلا والله ... مواقفكم تضحك كركركر
اشكركم على تفاعلكم مع موضوعي .. واسمحوا لي بتعقيب بسيط.....

* امولة: ياميت اهلين وسهلين
ههههههحلوة ياامولة موقف يموت من الضحك هههههه
الله لايعميناهههه
على فكرة يوم اسقيتي
النبته ماطلع فيها ورد هاهاهاهاهاي
__________________________

* اسيرة الغربة:
حبيبتي اسورة بعدين لا تتفلسفين هههههههه الله لا يفشلنا ههههه
منو الحين الثقيل انتي والا هي هاهاهاهاها
موقف حلو يااسورة تسلمين .
__________________________

* ام اميرة:
يوووووووه طااااحت ههههههههههه
ثاني مرة اقعدي عاقلة في الصف لا تتمرجحين على الكراسي هههههههه
وتسلمين على المشاركة الحلوة
________________________

* ام سيف:
مشاء الله على ولدكم عسى الله يخليه لاهلة
مو نفس عيال هالوقت يبكون على ( البوكيمون

وشرفتيني بالمشاركة الحلوة ياام سيف..
___________________________

* ام حاتم:
الله لا يكسحنا ولا يفشلنا فيه مثل عندنا يقول ( اذا بغيت فضيحة الرجال جيب له حرمة، واذا بغيت فضيحة الحرمة جيب لها جاهل )
الظاهر انة تطبق المثل مع الحرمة المتكبرة هههه
بس برّّد كبدك فيها صح هاهاهاهاها
اسعدتني مشاركتك ياام حاتم ..
__________________________

* ام عائشة: ياهلا وسهلا ..
شفتي ذنب الدبور الضعيف اللي بتضربينة اخر شي انتي اللي انضربتي هاهاهاها
وبعدين موقفك مع صاحبتك اشهد انك منتي براعية فزعة هالحين صاحبتك تبي تتمسك فيك عشان ماتطيح وتنحاشين عنها المفروض تطيحين معها نيهههههههاي
مشاركة اكثر من حلوة ..
__________________________

* حنين:
شكرا على المشاركة ولو اني كنت اتمنى ان يكون فيها لك موقف ....
____________________________

مواقفكم حلوة ....واسفة اذا ضايقت احد بردودي
واتمنى ما تزعلون مني ... هي لمجرد الضحك معكم فقط....

ام الوليد.

السلام عليكم اخواتي 00 الصراحه الموضوع عجبني مرررررررررره وحبيت اشارك حتى لو كنت متأخره شوي 0 انا عندي مواقف كثيره بس اكيد ما اقدر اقولها كلها المهم هذا احد المواقف :
كنت في احد الايام ابغى اتصل على صديقه ودوبني ماخذه رقمها والمشكله اني ما كتبته(يعني حفظته من فلاحتي )وجيت اتصل ويوم رد علي واحد قلت له هذا بيت فلان قال لي : لا هذا بيتنا!!!