نداء لكل الأخوات المصريات ، حابة أسألكم عن الأسواق التي تبيع الأغراض الخاصة بالمرأة الحامل والبيبي وجهاز الوالدة بعد ماتولد بأسعار حلوة من ملابس ومفرش للسرير وسلال وعلب مناديل وأرواب وغيره وغيره في القاهرة وشكرا..

عزيزتى جمانة مبروك على النونو وبالتوفيق
بس للأسف أنا من إسكندرية وعموما المحل اللى اعرفه اسمه Lovely فاتح جديد وفيه حاجات حلوة....واتمنى تلاقى مساعدة من الأخوات

الف مبروك يا جمانه البيبي
بصي يا ستي في محل رائع اسمه لاف اند كير في عباس العقاد يبيع ادوات الطفل المولود وكذلك الام ( مدينه نصر-في اول شارع عباس العقاد علي اليمين تدخلي يمين من بعد محل بغداد للادوات الكهربائية حتلاقيه محل كبير دورين )

صيدليه العزبي في الدور الارضي في جنينه مول ( مدينه نصر-في وسط عباس العقاد بعد محل شيخ البلد للكشري تدخلي يمين في شارع البطراوي ستجدي جنينه مول ) صيدليه رائعة بها كل مستلزمات الام والطفل

وهناك محلات البلاستيك تشتري منها السلال وبانيو البيبي والنونيا وغيرها باسعار رخيصة جدا ( الشريف للبلاستيك له فروع كثيرة ولكن في مدينه نصر- في عباس العقاد في فرع علي الشمال بعد شركة يونيون اير للتكييف )

سوبر ماركت الفا به قسم لاحتياجات البيبي ( الفا ماركت في مدينه نصر-عمارات العبور علي شارع صلاح سالم )

اعذريني ان كل العناويين في مدينه نصر لاني ساكنة هناك وعارفة المنطقة كويس وان شاء الله تجدي كل الي انتي عايزاه