أولا السلام عليكن يا أخواتي في الله ورحمة الله وبركاته
أحب أشكر منتدانا الرائع على كل المواضيع المفيدة اللي يقدمها وأحب أقول إنه بصراحة بدع وأحلى ما فيه العضوات والأخوات الرائعات اللي يحبوا الخير للجميع .. المهم ...
مافي أي مجلس حريم أو أي مجلس الرجال يخلو من الكلام عن مشاكل تساقط الشعر بسبب أو بدون أو من قلة نمو الشعر وطبعا كل وحدة تطرح الوصفات اللي عندها من لبن وعسل وزيت السمسم والنخاع وغيره . وأنا كمان عندي لكم زيت ماله اسم لأنه مخلط ولا تسألوني إيش فيه ما أعرف الحاصل إني ما شفت زيّه في حياتي ، أنا أخوية طول عمره يجري ورى أدوية تكثر الشعر واحتمال تكونوا سمعتوا في دواء اسمه (ريجن) يكثر الشعر فعلا ولكن الشرط هو إنك تستخدمينه طوال حياتك( طبعا مافي امل) خصوصا مع شعب ملول زينا .
والله ما حاولت إني أكتب عنه إلا بعد ما شفت إنه في ناس كثير تعاني من هذه المشكلة وما كنت أدري عن القسم ولأني شفت تأثيره على نفسي وعلى غيري والله على ما أقول شهيد أحب إني أشارك فيه الفائدة معاكم كلكم .
والله إنه سحر من جد يكثر الشعر كأنه باروكة والله شفته على صديقتي كده اللي يشوفها يفتكرها موصلى تدرون ليش لأنه ماكان كثير كان عادي وبعد ما استخدمت الزيت هذا لمدة 6 أشهر صار شيء ثاني طبعا الأثر بدأ يبان من الشهر الأول بس لأنه شعرها طويل ماشاء الله أخذ وقت وانت بتلاحظينها بنفسك .
وإذا عندكم أي استفسار أنا تحت أمركم يا أخواتي
أختكم
Tedy

أنا عارفة إنكم سمعتم عن زيوت كثير تكون كويسة بس مو على قد الكلام بس هذا الزيت (حاسة نفسي مدير إعلانات فاشل) غير بقولكم السبب .. كان عندي وحدة زميلتي في المدرسة شعرها يا لطيف الحمدلله الذي عافانا وعافاكم فروتها باينه من قلة الشعر واشتكت لي صدفة فقلت لها على الزيت إني أنا باستخدمه ، فقالت إنه حتى بنتها الصغيرة 6سنوات نفس وضعها المسكينة فقلت لها جربيه وبإذن الله يفيدك .استخدمته لنفسها 3 مرات بس لبنتها 6 مرات مع العلم إنه يستخدم مرتين واحدة في الأسبوع فاستخدمته حسب الطريقة اللي أعطيتها هي ، المهم بعد 3 أسابيع حسيت إنه الفروة بدأت تختفي تحت الشعر فقلت يمكن يتهيأ لي إلا هي قالت لي إنه بنتها نبت شعرها وبدأ يطول وحتى هي الناس صاروا يسألوها عن سبب هذا التحسن في شعرها . وحتى صديقتي كان شعرها مو خفيف عادي حلو فاستخدمته بس استمرت عليه وبعد مدة لا تقل عن شهرين ونص بهرت العالم ما شاء الله صارت إذا حطت كلبسات الحديد اللي تمسك الشعر وقفلتها تنفك من حالها ومرات تنكسر وما تقولوا إنه لازم تستمري عليه طول حياتك لا بس ألين ينمو الشعر ويبدأ يطول خلاص توقفيه حسب ما يناسبك وتعتني فيه بالطريقة اللي تفضليها صديقتي هذه استخدمته قبل 9 سنوات وماشاء الله شعرها زي ما هو وبعدها استخدمته لزوجها وبناتها . أخواتي كلامي هذا أمانة أتحاسب عليها أمام الله يوم القيامة .