وستبقى غزة، للإسلام عــزًا ..
بسم الله الرحمن الرحيم
السلام عليكم ورحمة الله وبركاته
(عذرًا لأني كتبت الموضوع بالعامية، لكني حابة أكبر مجموعة من الناس تقرأه، والاحساس يوصل للكل ..)
عَن النُّعْمَانِ بْنِ بَشِيرٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ:
( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى ) البخاري ومسلم ..
بمعنى أن أخواننا المسلمين في غزة جزء مننا، فلازم نكون معاهم، إذا ما قدرنا نحارب معاهم ضد اسرائيل،
على الأقل نسوي الشي اللي نقدر عليه، ونتحرك ويكون لنا دور، مانوقف نتفرج ومايكون لنا داعي ..!
عشان يوم القيامة لما نوقف أمام رب العالمين، ويسألنا ايش قدمنا؟
نقدر نقول احنا سوينا وعملنا، احنا ساندنا وساعدنا أخواننا،
وعشان نبينا وحبيبنا محمد "صلى الله عليه وسلم" يفتخر بنا ويقول: دي أمتي ودول أحبابي اللي جوا من بعدي وماشفتهم في حياتي، لكنهم قدموا شي لديننا الإسلامي..
إذًا ح نبدأ إن شاءالله مع بعض كإخوة نسوي أشياء بسيطة جدًا :
1\ كلنا نبدأ نقاطع وبقوة،
طبعًا كل شي اسرائيلي ويهودي نبعد عنه زي(ستار بكس، ماركس آند سبنسر، ... إلخ) ،،
وكل شي أمريكي كمان نبعد عنه، مو كفاية الصواريخ والقنابل اللي بيعطوها لاسرائيل عشان يرموها على أخواني، ويقتلوهم ويهدموا بيوتهم، ويعيشوهم أسوأ عيشة، كمان أكسبهم فلوس زيادة، يزيدوا بيها عدد صواريخهم !
مايحتاج أعطيكم أمثلة على منتجات أمريكية، كثيرة ومعروفة، إنتوا بس لما تشتروا شي أقروا فين بلد الصناعة أو الانتاج، وإذا أمريكي استبعدوه، وخذوا بداله منتج عربي أو مسلم << منها فرصة إننا ندعم الانتاج العربي والإسلامي، يعني مثال واحد، احنا في البيت نجيب كاتشب ليبيز أو هاينز، آخر مرة رحت جبت كاتشب السعوديةترى طعمه كويس مايفرق lool ..
2\ نواسيهم ونصبرهم،
الشيخ محمد العريفي جزاه الله خيــر، أعطانا رقم غزة، ليه مانتصل عليهم نكلمهم ونصبرهم ونقويهم، والله إنهم مرة يفرحوا، كلمت واحدة من غزة، جلست تدعيلي، وحسيت الفرحة في قلبها، والثانية حياتي انفرطت تبكي وتقول: الله لايذوقكم اللي احنا ذايقينه، الله لا يحرمكم من أحبابكم، تخيلوا تقول: طول ما الدنيا فيها ناس زيكم، احنا بخير ..
مجرد إنهم يعرفوا إن أخوانهم معاهم ولو بقلوبهم بس يفرحوا، ونهون عليهم، وايش نبغى أجر أفضل من إدخال الفرحة على قلب مسلم ..
اللي يحب يتصل عليهم ويصبرهم، هذا مفتاح فلسطين وبعده غزة
( ##### 00970828 )
ومكان المربعات إنت افترض من راسك 5 أرقام وحطها، وح يدق على بيت من بيوت غزة إن شاءالله ..
ترى مرة الفكرة حلوة ،، جربوها..
3\ أضعف الإيمان الدعاء،
ندعيلهم ولو مرة واحدة في اليوم، فرض واحد ع الأقل من الفروض اللي نصليها كل يوم، أدعي فيه في سجودي إن الله ينصرهم، ويحفظهم ويخليهم لبعض، ولايحرمهم من أحبابهم ..
4\ أشياء ثانية كثيــر ممكن نسويها،
وحملات كثير ممكن نقوم بيها، من تبرع بالدم، تبرع بالمال، وهذي ماشاءالله قايمين بها ، وفي تبرع بالدم في المستشفيات، والمولات كمان، منها مستشفى الجامعة في جدة مازالت فاتحة التبرع إلى يوم الأربعاء،
والتبرع بالمال من الحملات في حملة خادم الحرمين الشريفين الله يحفظه ويسعده، ماشاءالله وصلت ملايين، وهذا رقم الحساب على البنك الأهلي:
( 20161333000101 )
وكمان ممكن ترسل رسالة جوال قيمتها 10 ريال، تروح للتبرع ،،
والطريقة أرسل رسالة فاضية للرقم ( 88405 ) .. هذه الرقم لعملاء الجوال، وفي رقم آخر لعملاء موبايلي ..
وستبقى غزة، للإسلام عــزًا ..
أدام الله عليكم الأمن والسلام ..
قلب أختها
رد مع الاستدلال
كتبت بواسطة رغد الاسلام
] بَيْنَ يَدَيْكْ 
الروابط المفضلة