استراحه للذكريـــــات ( الكل مطلوبين )
السلام عليكم
اخواتي وعزيزاتي
بالتأكيد ان لكل واحده فينا ذكريات طريفه أو غريبه
حصلت لها مع بدايه دخولها وتعرفها على الشبكة العنكبوتيه
وتكون السوالف فيها شيقه وتوسع الصدر
فياليت يكون هالموضوع إستراحه لإسترجاع الذكريات من الجميع
راح أبدأ بكتابة مواقفي المضحكة
اللي حصلت معاي خلال الخمس السنوات الماضيه
من بداية تعرفي على هالعالم العجيب
بلاوي سويتها هذيك الايام جدا مضحكة ولها ذكريات
حلووووة رغم اني اسميها ايام الجاهلية لكن سبحان الله احن لهذيك الايام
أحس حياة الدلاخه أحسن وناسه
راح أذكر لكم بعض المواقف اللي أتذكرها وكل ماخطرت على بالي اموت ضحك
احدى المرات في منتداي الرئيسي في ذاك الوقت
اول منتدى عرفته الحين تسكر نهائيا
وحده من بنات المنتدى جزاها الله خير نزلت مشاركة
جايبة لنا رابط منتدى غير إسلامي تبينا ننصح وندعوا الي الله فيه ,
اخذت رابط المنتدى فتحته قعدت اتصفحه
يكتبون فيه ممثلين واعضاءه مره رايحين فيها يأست
من ان حالهم ينصلح وبدال ماانصحهم كانت النتيجه اني
سجلت بأسم ممثلة مادري إذا تعرفونها اسمها (زهرة الخرجي) الله يهدينا وياها
وأول موضوع نزلته طلب ترحيب وكان العنوان على ماعتقد
(الممثلة زهرة الخرجي تطلب الترحيب)
والأعضاء من دلاختهم صدقوا وكثييير جو ورحبو فيني
ويقولون مو مصدقين زهرة ويانا ومادري ايش
وجتني كوم من الرسائل الخاصة كلها مدح وإعجاب
تهبلت رحت نزلت موضوع عنوانه (أسألوا وزهرة الخرجي تجيب)
نسيت الهدف اللي دخلت المنتدى علشانه
جو الأعضاء واحد يقول ليش ماعاد مثلتي ويا عيال المنصور
ووحده تقول لي ماذا تعني لك الممثلة الفلانية والله ماذكر بالتحديد
وش هي الأسئلة بس من هذا القبيل
احترت قلت كيف اجاوب على أسئلتهم
رحت لصديقتي قلت لها السالفه وشكيت لها الحال
قالت لي قولي لهم اني تكسرت والحين امشي على كرسي متحرك
علشان جذي ماعاد مثلت مع عيال المنصور خخخخخ
بعدها تحرك فيني الخير ندمت قلت ليش أحسسهم ان
التمثيل شيء عادي مو حرام رحت رديت على موضوع إسلامي مؤثر
شكرت صاحب الموضوع و قلت لا شكل زهرة بتوب
ونزلت مشاركة أعلنت توبتي
صدقت اني زهرة خخخخخخخ
مادري كيف كان تفكيري
المهم اليوم الثاني دخلت للمنتدى لقيتهم
خلاص كشفوني وطردوني من المنتدى خخخخخ
الله يغفر لي كذبت كثييير
ولا بعد لي حالات كثيييرة وشخصيات متعدده بعدد المنتديات اللي اكتب فيها
في احد المنتديات سجلت بإسم (حزينة) شفت أسماء أعضاءه تميل للحزن
قلت مع الخيل ياشقرا وكان في مفهومي ان العضو
اللي يكتب بإسم حزين لازم يكون حزين ويبين للكل انه حزين
دخلت لموضوع وشفت فيه اعضاء قاعدين يمزحون ويضحكون
قلت لهم لاحول ولاقوة الابالله تضحكون وآنا حزينة
وفي احد المنتديات كنت مسويه شخصية رجال بإسم (محماس)
وأذكر لي رد بهذا الإسم كان على
موضوع بنت كتبت عن بكاء الرجال وانه مايجي بسهولة
رديت عليها وقلت لها مو على كل حال الرجال مايصيحون بسرعه آنا دايم اصيييييح
....
وفيه مواقف دلاخه كثيييييييرة صارت معاي في نفس منتداي الرئيسي
أذكر واحد اسمه كان بالإنجليزي وتحت أسمه مكتوب الميدالية الفضية
يعني وصف لحالة العضو مثل عضو فعال وعضو نشيط
وهو حاصل على الميدالية الفضية وآنا الله يرحم الحال يالله اعرف الحروف الإنجليزية
ظنيت انها ترجمه لإسمة بالعربي
وإذا جيت ارد على مواضيعه أكتب له اخي الميدالية الفضية
ومااسميه بغير هالإسم خخخخخخخخخخخخخخ
كآفة انواع الدلاخه
أكتفي بهذا القدر
واكيد كلكم صدرت منكم مواقف
وتصرفات مضحكة مازالت عالقه في أذهانكم
فلتتكرموا وكل وحده تسترجع شريط الذكريات وتزودنا
بإنتظار تفاعلكم ابي الكل يشارك
أختكم
أم بسبوسة
رد مع الاستدلال
الروابط المفضلة