يانات كيفكم ....... شو أخباركم ....... بصراحة من كتر ما أنا بحب فلسطين وريحة فلسطين وتراب فلسطين
حطلب منكم هالطلب وياريت تتجاوبوا معاي ....
كل وحدة من فلسطين تكتب من أي بلد وقضاء وين وإيمته آخر مرة زارت فيها فلسطين ...
وكيف شافت فلسطين في آخر زيارة .... وهل هي مشتاقة إلها ولا لأ .... ؟؟؟؟؟؟؟؟؟؟؟ وشو أطيب أكلة بتحبها من الأكل الفلسطيني ؟؟؟؟؟

وطبعاً بقدروا يشاركوا خواتنا العزيزات من بلادهم مافي مشاكل ...


أنا من قرية بيت فوريك قضاء نابلس ... وسكّان نابلس ... وآخر مرة زرتها في شهر 6 وضليتني فيها شهرين
وكانت أكثر من رائعة بس لولا الضرب اللي صار في ذاك الوقت ... وأنا بحبها ومشتاقة إلها على طول حتى وأنا فيها ............ وأطيب أكلة بحبها من فلسطينا ( المسخن - المفتول - ورق عنب وكوسا- المنسف لأ ما بحبه) .
عشان فيه لحمه وعضم وانا ما باكلها ...

وأتمنى يتجاوبوا معاي الاخوات الرائعات .........
لإنو بصراحة بس أعرف إنو وحدة فلسطينية بحب أتعرف عليها لأجل بلدي الحبيب .
اللهم انسر المسلمين في كل مكان ... اللهم انصر شعب فلسطين وانقذ الأقصى الشريف .. يارب العالمين ... اللهم عليكم باليهود فإنهم لا يعجزونك .. اللهم عليك بهم فإنهم ظلمة ..كفرة .. مغتصبون .. اغتصبوا أرضنا رغماً عنا .. فأذلهم وأبيدهم يارب العالمين ... حرمونا من العيش في وطننا الغالي .. اللهم احرمهم العافية والأمن والاستقرار.. اللهم انصر اخواننا في بلدنا الحبيب الشباب .. والنساء .. والاطفال .. والشيوخ .. فاسرائيل لا تفرق بين أحدهم منهم بل تريد إبادتهم جميعاً .. اللهم اجمع شملنا مع جميع أبناء بلدنا على أرضنا (أرض الاسراء والمعراج) .. اللهم اشفي جراحنا ... وخفف غربتنا .. وأعدنا الى بلادنا سالمين غانمين .. وانصرنا على أعداء الدين ..
والمسلم وصاحب الضمير الحي يقووووووووووووووول آمين ... آمين .... آمين .... آمين ... آمين ...

سبحان الله وبحمده .... سبحان الله العظيم

شو يا بنت نابلس .. طيب انت وين هلأ
شوفي مرت اخوي نابلسية يعني بلديات..

انا في فلسطين بس مش في بلدي ..

آخر مرة شفت جنين آه في 78 عمر صح.. ومشتاقة لكل شيء فيها..
طبعا المسخن الجنيني لا يعلى عليه .. بس اكثر شيء بحبه العكوب... ومفتقداه في غزة...
بس هذا اللي عندي هلأ.

هلا بالغاليين،،
انا ساكنة بغزة بس من يافا أصلا يافا المنشية و عمام بابا لسه هناك باقيين بس نقلوا ليافا العجمي ،، أخر مرة رحت هنك يمكن قبل 6، 7 سنين ما احلى ريحة شوارع يافا ،، ياه عن جد بلدة عتيقة اصيله كل شي فيها بيذكرني بالاصالة يمكن كانت هاي أول و اخر زيارة ،،،،..........
و نفسي أروح هناك امشي بشوارعها يمكن انا ما انولدت هناك بس الحنيني للاصل برده..
اكتر اكلة بحبها من الاكلات الاصيلة اللبن المعقود بموت فيه و بحبه كثيييييييييييييييررررررررر
بس شو هو العكوب وعود ؟؟؟؟؟؟؟؟

شو بدك بالعكوب يا دعاء .. شرحة صعب نوع من النباتات
بس كثير طيب مع اللبن المعقود... شهيتك صح.

انا كمان بسال من وين انت يا بنت نابلس قصدي هلق وين انا من مدينه مختلطه فليبه على يافا ونابلس والضفه ممنوعه علينابس اخوال ابي من نابلس وما بنروحها كتير وحتى قلقيليه وطول كرم ما بنروحها ممنوع الا بالسرقه

اهلا بفلسطينيات المجد....انا فلسطينيه مع اني عشت في بلد مختلطه بس تزوجت بالطيبه بجانب طولكرم وقلقيليه هده الأيام بيسمحولنا نزورهم والله اعلم الى متى .اما نابلس فصعب وطبعا قبل زرنا بيت لحم وغزه وجباليا وبيت لاهيه ونابلس وما احلى رمضان بنابلس والفطور هناك ورام الله وعجه كمان كنت فيها مش زمان الله يهون علينا ويقربنا من بعض

أهلاً بك بنت نابلس
أنا من قضاء صفد، قرية فرّادي.
عمري ما زرت فلسطين ولا بعرفها إلا من الصور. عمري ما كان حتى عندي جنسية فلسطينية.. ما عندنا بلد، من وين الجنسية؟

أتمنى زيارتها والشعور بأني في بلدي.. وما بعرف إن كان هذا الشعور رح أحس فيه أم لا بوجود المغتصبين، الله يقلعهم من جذورهم!

أكثر أكلة بحبها، المسخن

والله حبيبات ألبي الله يزيدكم يارب ويخليلي إياكم ما تتصورا أديش فرحت لما شفت إنكم فلسطينيات
أختي وعود الخير: يا بنت البلد الصامد .. المناضل .. البطل جنين ... أم الأبطال يا نيّالك إنك آعدة بفلسطين عقبالي يارب أرجع وأستقر فيها ... دخيلك سلميلي على جبال بلادي .. وهوا بلادي ... أنا حالياً بالكويت وغنشالله لما ينجل الوضع برجع عالضفة بإذن الواحد الأحد القادر على إنو يرجّعلنا بلادنا ويهدي أوضاعها يارب .

الفتاة الطويلة.. .. يا روحي إنتو الأساس وعايشة بالطيبة كمان ترى ما زرتها بس سمعت عن جمال الطيبة كتير ... وانشالله تتسهل الأمور وتصيري تشوفي كل المناطق (وبكفيكي إنك رحتي قلقيلة وطولكرم وأنا لهلأ ما رحتهم ) مو حلو الطمع ؟؟؟؟ (بمزح حبيبتي) وبتيجي نابلس ولما أرجع انشالله حعزمك وتيجي عندي عنابلس يارب .

الحلم العربي: يا عيني على بنات يافا وجمال يافا ...أنا هلأ بالكويت بس انت عايشة وين بغزة أعتقد ؟؟؟ لإنك بتحكي الضفة ممنوعة عليكم ... الله يقطع اليهود ما همي قطّعو الطرق وما خلو شي ... الله يفرجها عالكل وأشوفك بنابلس وبعزمك عندي ولو بتحبي كمان حياكي الله عندي على طول ....

دعاء فلسطين : أنت يا ستي يا بنت يافا والنّعم والله بيافا وأهلها وإنتو الأصل ... بعرف إنو بنات يافا معدّلات وما بتعرفي العكوووووووووب ؟؟ معقولة هااي ؟؟؟ ياستي العكوب النبتة اللي بيجي شكلها شبه شكل الشجرة تقريباً بس صغيرة طبعاً وشبه حبة الزهرة لما بتقطعيها وعليها شوك .. بس أنا بالمرررررررررة ما بحبها...
(مو زاكية لا تجربيها لإنها ما بتنعمل إلا بلحمة )....

الأخت الرائعة إيمان علي: ترى والله من شطارتك وذكائك عرفت إنك فلسطينية بدون ما تحكي بس هلأ اتأكدت .. خسارة كبيرة انك ما شفتي بلادنا (أرض الإسراء والمعراج) والله جنة الله عالأرض .. ما بعرف شو بتحسي لما بتدخليها وتعيشي على أرضها .. تعلّقت فيها تعلّق مو طبيعي مع إنو أهلي بالكويت لكن مابدي غير أرجع عفلسطين فيها سحر بتسحر ناسها وبالأخض اللي بكون شبعان من الغربة ...
يارب نرجع أجمعين ونصلي في الأقصى الشريف....... ومسجد عمر بن الخطاب ... اللهم آمين .
على فكرة لقد شرّفني الله بزيارة أطهر بقاع الأرض الاقصى الحبيب وصلّيت فيه وفي مسجد عمر بن الخطاب .. انشالله عقبالكم وعقبال اللي اتمنى إنو ينولها ياااااااااااااااااااااااااااارب .

حبيباتي وعود الخير ودعاء فلسطين وين ساكنين انتوا بغزه الصمود ..
في الشجاعية ... ولا الزيتونة .......... لي أعز وأغلى صديقة عقلبي تزوجت في غزة وعاشت هناك ...
وياريت تطلعوا تعرفوها وتوصلولي أخبارها ... وفي كمان صديقة انقطعت أخبارها عني من زماااااان كمان
برضو اتزوجت في غزة وعاشت على طول فيها ..
الله يحميكم يارب من هالأوضاع ..والتنقلات الصعبة .. بس أعتقد هلأ ارحم من أول شوي .. بس البرد الله يعينكم
استودعكم الله الذي لا تضيع ودائعه .........

بنت نابلس .. من عندك سلمي لي على الكويت.. ارض الطفولة والصبا والذكريات الحلوة..
انا في الشجاعية ودعاء في النصر.. ورندوش في الرمال أنت تؤمري واللي بنقدر عليه بنساعدك
بس عندي عتب
مين قال العكوب ما ينعمل الا باللحمة.. جربت تعمليه عجة .. او مع بصل بزيت الزيتون.. يا بنت نابلس ..
ولو ما نابلس ارض العكوب...