السلام عليكم
كيفكم بنات وش اخباركم وشلونكم وش علومكم وش وش .................
اليوم حبيت اغير جو معكم بمناسبة قدوم الإمتحانات قلنا نعيد الذكريات والمواقف اللي تصير فيها
واجناس واحوال الناس معها واستعدادهم لها
الزبدة في الموضوع كل وحدة تقول حالها مع الامتحانات وكيف نفسيتها
عن نفسي في الامتحانات كل شي يتغير ..............سبحان الله حالة نفسية
الشهية للأكل مفتوحة 24 ساعة الثلاجة ياعمري فتح وصك تقولين مجاعة ادور شي اكله ولو تكلمت كان صاحت صياح
وما يفوتني أي موعد للأكل حريصة والجلسة مع الأهل والبسطة والتقهوي وشرب الشاهي والقهوة معهم والتبسط لإبعد الحدود ولو قالو شي روحي ذاكري قلت خلوني اخذ راحة شوي من كثر المذاكرة اللي مقطعتها كله هروب والله منها لا والمشكلة الكتاب في اليد لاصق منظربس
اهلي يمكن ملو مني المشكلة اذا جت العطلة تنقطع العلاقة معد اشوفهم كله تسدح ونوم
والثقافة شفتوا شلون تزداد أي شي يطيح تحت عيني لازم اقراه باهتمام وحرص الا كتاب المدرسة
مايفوتني شي اشياء عمري ماشفتها اناظرها
حتى النت يحلى فتحه والتفرج فيه
اشتهي اطبخ
اشتهي ارتب في البيت واحوس وادوس ..........سبحان الله عجب
واذا جد الجد وجاء الليل والخوف تو القلب يطلع وتبداء المذاكرة الصح على حسب المادة والله حلوة والقى فيها متعتي وميولي اكيف معها واقراها كلها بحرص واهتمام حتى لو كانت طويلة وصعبة وتشوفين برادات الشاهي وهات يا شرب والحمدلله تجي النتيجة الغالب مشرفة
اما إذا صارت المادة غثيثة وطويلة وما احبها تبدى الحالة النفسية السابقة وادور أي شي يلهيني وتجي انواع الإستخفاف وتصرفات غريبة وخفه العقل ما تتوقعين تصدر منك هاذي يسمونها هستيريا الإمتحانات
واذا قرب الفجر وحانت ساعة الصفر يبدا التحذيف وقراءة المهم حذف على كيف كيفك تصدقون عاد احيانا وكم مره يوفقني ربي ولا يجي اللي حذفته
اتذكر مادة ثقيلة وملازمها طويلة وما ينفهم منها شي يا كافي وادخل الجامعة وبعض ملازم هالمادة جديدة ما فتحتها والله من شريتها وانا ما ادري وش فيها واشوف البنات حريصين على وحده ويقرون ياربي والله جاني خوف قلت وش تقرون ما اتوقع تجي ذي فهمتو ا منها شي قالوا كل شي وارد وانا اناظر فيهم منتب صاحين مب جايه وش فيكم ؟ وندخل القاعة والحمدلله شكل الإستاذ مثلي ما فتحها ولايدري وش فيها ويوم طلعنا قلت شفتوا قايله لكم احساسي ما يخيب
الا على طاري الاستعداد فيه شي نسيته تدرون من استعداداتي اني يحلى لي التكشخ والتزين أخر شياكة
يعني تلقيني حريصة افكر وش البس بكرة واجهز كل شي افتح الدلاب واتنقى حتى البكل والجزم اجهزها وشوف وش اللي يناسب أخر اناقة خصوصاً اذا صار الإمتحان صعب قايله لكم ادور شي يشغلني عن المذاكرة
واستغرب والله من بعض البنات يجون يمكن شعرهم ما سرحوه من قو المذاكرة احسها مبالغة وشوله التعقيد ياكافي
الحمدلله كلنا نجحنا وش فرقنا عن بعض
يالله عاد كل وحه تكتب عن نفسها ولا تفشلوني هاذي اول مشاركة لي في منتدى الإخاء
اقول لاتوقعون الحين عندي امتحان الحمدلله تخرجت وانطقيت في البيت ...وسلامتكم
الروابط المفضلة