اولا سلام عليكم و رحمه الله و بركاته
ده الجزء التاني الحمد لله لنفس الموضوع و ان شاء الله هنكمل انا و البنات مع بعض هنا لحد رمضان و بعدها نقرر ايه الريجيمات الجديده اللي هنعملها في رمضان و لو عايزين تقرو الجزء الاول ده اللينك بتاعه
http://www.lakii.com/vb/showthread.php?t=342968
انا ساره و عندي 23 سنه وزني كان الاول كان 108 من شهرين و الحمد لله عملت ريجيم الشهرين دول و مشيت كويس و مظبوطه شويه و لخبطت بردو شويتين عشان كلنا بنغلط بس كل ما بقع بقوم نفسي تاني عشان يبقى اسمي نجحت و الحمد لله خسيت لحد دلوقتي اكتر من 20 كيلو يمكن لو كنت ملخبطتش شويه في النص كنت خسيت اكتر بس لو من عمل الشيطان و انا الحمد لله راضيه عن نفسي اوي باللي وصلتله و عندي عزيمه ان شاء الله لحد رمضان اخس اكتر من كده و انا طول عمري بعمل ريجيم و اخس شويه و ارجع ابهدل الدنيا اول ما وزني يثبت و بزهق بس المره دي ثبت فترات كتييييييييره بس كنت بصبر و الاقي فجاه الميزان نزل مره واحده و اكتر مره حصل معايا كده الميزان ثبت اسبوعين و بعدها في 10 ايام 8 كيلو مره واحده مع اني كنت بمشي على نفس الانظمه بتاعتي فعايزه اقول لكل واحده بتعمل ريجيم و عاوزه تغير من نفسها فعلا الصبر الصبر الصبر هو ده اللي بيوصل الاكل اللي ملينا نفسنا بيه سنين مش هنصحى من النوم نلاقيه راح فيها ايه لما اتعب اسبوع في ريجيم و معكش خالص و يبقى ريجيم جامد و اجي اوزن اخر الاسبوع الاقي نفسي خسيت كيلو ماشي هي حاجه تزعل بس كيلو ده احسن من مفيش و اديكي قلتيه ده غير ان حتى لو مخستيش اكيد البطن مرتاحه احنا دايما نتعامل مع الريجيم على انه حرمان مع ان كل واحده فينا لازم تتعامل على انه نظام حياه عشان حطو في دماغكو ان حتى لو خسينا بقينا 50 كيلو و بطلنا ريجيم و رجعنا ناكل هنبقى في 3 شهور زي ما كنا لان جسمنا هرموناته قابله للتخن و الا مكناش تخنا من الاول اصلا فلازم نتعود على الريجيم انه نظام حياتنا لينا مره واحده في الاسبوع ناكل اللي نفسنا فيه و باقي الاسبوع مظبطين اكلنا حاجه مش وحشه في سبيل اننا منشوفش نظرات مش عجبانا في وشوش الناس و نلبس اللي احنا عايزينو
عارفين امبارح كان قرايبي عندنا لما شافوني بيقولولي انتي كده على اخر السنه ان شاء الله تروحي تعملي فيديو كليبس فقولهم يا جماعه مش اوي كده انا يارب ابس اقدر اكمل و اخس تاني فقالولي انتي مجنونه انتي اصلا اول مره تخسي كده في حياتك و لوحدك كمان من غير دكتور عشان انا كنت بروح لدكاتره كتيير و واحده فيهم قالتلي بصي الريجيم ده اراده فاللي توصل للي انتي وصلتيله مش بعيد عليها توصل للوزن المثالي الكلمه بستطني اوي و ادتني عزيمه اني اوصل يعني اوصل ان شاء الله و يارب توصلو معايا عشان فعلا التخسيس الجماعي ده احسن انواع التخسيس عشان بيضيع الكسوف و بنتكلم مع بعض زي ما احنا عايزين و نشجع بعض و ده اللي هيدينا الاستمراريه
المهم عشان طولت عليكو انا حبيت اقولكو على اخر ريجيم عملته الاسبوع ده انا قال ايه يا جماعه بقالي شهر مثلا عماله اسمع ناس تتكلم على ريجيم التمر و اللبن و اقول ابدا ده صعب مقدرش المهم لاني مزنوقه في الوقت جدا قلت اجرب و لاني طبعا خايفه من التمر يتخني لانك المفروض تاكلي اي نوع تمر زي ما انتي عايزه مش لازن الناشف فكنت قلقانه منه فعملت اول يوم و قست تاني يوم لقتني خسيت كيلو في يوم واحد مقستش تاني و الحمد لله انا خلصت ال10 ايام بتوع التمر و قست لقيت نفسي خسيت 6 كيلو و الحمد لله وحاسه بنفسي بصحى كل يوم مرتاحه و بطني مش بتوجعني و شبعانه كمان و عشان اكون صريحه اول يومين في الريجيم ده او 3 ايام بالكتيير صعبين شويه عشان اولا تمسكي نفسك من الاكل و لا سلطه و لا حاجه و ثانيا عشان الجسم بيكون بقاله فتره متعود على الريجيم فطبيعي مقللين السكريات فجاه البلح سكرياته كتيير فحسيت بتعب اول يومين فسالت دكتور قريبي قالي يابنتي استحمليه عشان التمر ده هايل فيه كل اللي الجسم بيحتاجه فيتامينات و معادن و سكر و حديد و بروتينات و دهون عشان كده سيدنا محمد كان بيوصي بيه و القرآن اتكلم عنه كتيير بس عدي الايام الاول عاوزه اقولكو اني امبارح عملت وجبه فري واحده عشان افصل الاسبوع كلت واحده بطاطس صغيره مشويه مقدرتش و الله بالعافيه خلصتها و بطني حسيت اكني واكله خروف و مش قادره فانا فعلا عاوزاكو تعيشو معايا التجربه بتاعتي و اكررها تاني و انا ان شاء الله هعمله لحد رمضان و كل اسبوع وجبه فري واحده اللي عاوزه تبدا معايا اهلا بيها تقولي على وزنها و طولها و سنها و اكيد اسمها طبعا عشان نعرف نتكلم طول اليوم و نشجع بعض عشان هو محتاج اراده و ناس مصره و زهقت من شكلها و عاوزه فعلا تتغير لو فيكي الصفات دي يبقى يللا بينا نتحدى الدهون
الريجيم المفروض ان البنات قالو 21 تمره في اليوم و 3 كوب لبن خال الدسم بس انا الصراحه عملته 15 تمره بس و 3 كوب لين خال الدسم و كنت مش بقسم وجباتي فطار و غدا و عشا كنت بقسمها تمره كل ساعه و اللبن على 6 وجبات زي ما انا عاوزه كل وجبه نص كوب و ده اللي قلهولي دكتور عشان كده بتخلي جهازك الهضمي كل شويه شغال عشان يحرق اللي بتدخليه فنسبه حرقك بتزيد ولو جعتي اوي كلي 2 مش واحده بس متكتريش
و دلوقتي كمان غيرت الاسبوع ده و عامله ريجيم جديد و هرجع ان شاء الله تاني لريجيم التمر بس لازم كنت افصل في النص عشان اخس اكتر و ربنا يعينا كلنا
رجيــــــم خــــــاص ينزل 6-7كيلو في اسبوع
ريجيم خاص محدد لمده اسبوع يساعد على انقاص الوزن من 6 - 7 كيلو جرام . وهو مجرب
اليوم الأول :نفس الوجبه تكرر
( الأفطار + الغداء + العشاء )
- قبل كل وجبة عصير ليمون .
- 2 بيضه مسلوقه .
- شريحه توست او ربع خبزه سمراء .
اليوم الثاني :نفس الوجبه تكرر
( الأفطار + الغداء + لعشاء )
- قبل كل وجبة عصير ليمون .
- 1 بطاطا مسلوقه حجم وسط .
اليوم الثالث :
( الأفطار ) :
- روب خالي الدسم + خيار + طماط .
( الغداء + العشاء ) : نفس الوجبه تكرر
- ربع كيلو سمك او ربع دجاجه ( منزوعه الجلد و مشوي ) او علبه تونه مصفاه من الزيت و مغسوله جيداً بخل و الليمون .
- شريحه توست او ربع خبزه سمراء .
- قبل كل وجبة عصير ليمون .
اليوم الرابع :
( طوال اليوم )
- 8 برتقالات حجم كبير او تفاحات او يوسفي او كمثرى توزع طوال اليوم .
اليوم الخامس :
( طول اليوم )
- 6 علب لبن او روب خالي الدسم .
اليوم السادس :
( الأفطار )
- بيضه مسلوقه .
- تفاحة او برتقاله او يوسفي او كمثرى ثمرة واحده .
( الغداء + العشاء ): نفس الوجبه تكرر
- لحم بوفتك قطعة 250 جرام بدون دهن.
- عصير برتقال بدون سكر .
اليوم السابع :
( طول اليوم )
- 8 موزات موزعه على ثلاث وجبات .
هذا الريجيم ينقص من 6 إلى 7 كيلو جرامات بالاسبوع الواحد مع ممارسه الرياضه ويفضل رياضه المشي .
تحياتي ،،،منقووول ومجرب.......وان شاءالله يفيدكم
لا زم تعملوا معاه رياضة اختي عملت هذا الرجيم ونقصت 4 كيلوا عشانها عملتو من غير رياضة إنشاء الله إذا اعملتيه بالرياضة تنقصي 6_7 كيلو
طبعاً ده كلام اللي منزله الدايت و الله اعلم بس هنشوف لو 3 كيلو في الاسبوع ده بالنسبالي يكون كويس بردو عشان ابقى ريحت من التمر و اللبن و فيه تنويع شويه و بعدها اشوف هعمل ايه ان شاء الله و بدايه الريجيم ده النهارده يوم 29/8/2007 و ينتهي يوم 4/9/2007 ان شاء الله الميزان هقيسه 5/9 الصبح بدري
مستنياكو يا بنات و لو واحده عايزاني اقولها على ريجيماتي التانيه اللي عملتها انا في الخدمه
شدو حيلكو فاضل 14 يوم على رمضان الوقت كالسيف هنقطعه هنقطعه
الروابط المفضلة