السلام عليكم ورحمة الله وبركاته
الموضوع دة عجبني وقلت لازم نشترك كلنا فيه لانه
فعلا حاجة جميلة لو نفذناها
افلا يتدبرون ؟
هل تقرأ القران ؟
اكيد
هل تتدبره ؟
ما الفرق ؟
----------- مشروع مصحف وورقه و قلم ------------
القران للتدبر مش للقراءه
كل سنه فى رمضان نمسك المصاحف و هاتك يا قرايه
و تختم مره و اتنين و تلاته و يمكن تكون حافظ منه كمان ماشاء الله عليك
بس ايه اخبار التدبر ؟؟
يمكن تيجى فى بالك آيه قرآنيه جميله و تفضل فاكرها شويه و تتأثر بيها لمده لا تزيد عن ساعات معدوده
و قد تقفز فى ذهنك آيه عند حدوث موقف معين يذكرك بآيه فى القران الكريم
بتحب اوى الآيه اللى بتحسها او بتخبط فى قلبك
طول عمرك فاكرها و ترددها و عايش بيها
بس هى ليه آيه واحده او اتنين
هى حياتك للدرجه دى خاليه من المواقف المؤثره و الاحداث القويه و خاليه من الضعف و خاليه تماما من الاحتياج و الحزن او حتى خاليه من الاصدقاء و الاهل و السعاده و العمل
بنفتكر القران فى مواقف معدوده جدا زى الموت و الحروب و الحزن و الصبر
مع ان القرآن حياتنا كلها فيه سبحان الله
ا
المهم
نفسك تعيش بالقران
نفسك القرآن يغير حياتك ؟
نفسك تحيا بالقرآن ؟
حابب القرآن بس مش عايز تنساه ؟
تحب تكتشف روعه و جمال القرآن الكريم ؟
حاسس ان القرآن فعلا معجز بس مش عارف تحس الاعجاز ده فى حياتك اليوميه ؟
مصحف و ورقه و قلم
ايوه
بالبساطه دى
و احنا بنقرأ القرآن الكريم فى آيه تخلينا نبكى و آيه تخليك تبتسم لانك تذكرت الجنه و تخيلتها
و آيه تهز فيها راسك و محدش عارف انت فهمت منها ايه
محدش حاسسها زيك
محدش حاسس اللى انت حاسه
و آيه تحب تقولها بأعلى صوت للعالم كله
و آيه نفسك تعلقها فى اوضة نومك من كتر ما انت عايزها شعار لحياتك
حياتك اللى مليانه حياه
حياتك اللى فيها و فيها متعدش
و فى آيات نسرح فيها و نتخيل و نفكر لغاية ما دماغنا توقف و تعجر عن التفكير
و آيه تانيه تخليك تترعش من الرعب
و آيات تحس انها بتقولك استحمل و اصبر عشان الجنه
ياااااااااااه مليان القرآن الكريم الرائع المعجز سبحان الله العظيم
ازاى مش بنحتفظ بالآيات دى و ازاى بنسيبها تتنسى و تعدى علينا بسرعه كده
ده كلام الله سبحانه و تعالى
لازم يتحفر فى قلوبنا
مش هقولكم زى ما الدنيا محفوره فى قلوبنا بالبنط العريض
انتو عارفين الدنيا عامله مهرجان حفر فى قلوبنا
ربنا يهدينا
الله المستعان
الحمد لله الذى هدانا لهذا و ما كنا لنهتدى لولا ان هدانا الله
الحمد لله رب العالمين
خطوات تنفيذ المشروع :-
1
- احضر مصحف واضح و حجمه مناسب
2- هات كشكول حلو و كبير و محترم
3- محتاج قلمين تلاته ملونين و خطهم كويس
4- احضر استيكرز او اى ادوات لتزيين الصفحات فى كشكولك
5- حدد ساعه فى اليوم او نصف ساعه للتدبر فى القران
6- اجلس فى مكان هادىء و مرتب
7- انت دلوقتى مستعد نفسيا ان تبدأ فى قراءه القرآن الكريم
8- توضأ
9- ابدأ قراءه و اول ما تقابل آيه تشعر بروعتها و جمالها و طبعا القران كله رائع اكتب هذه الآيه فى كشكولك و هكذا كل ما تقابل آيه تشعر بها و تحبها و تريدها شعار لحياتك اكتبها و طبعا قم بتقسيم كشكولك الى اجزاء و اكتب اسم و رقم الآيه الكريمه و كن منظم و اجعل كشكولك تحفه فنيه تحب النظر اليها
10 - بعد الانتهاء من ورد التدبر قم بقراءه ما كتبت و اكتشف الروعه و احفظ منه آيه و اعمل بآيه فى الاسبوع مثلا و اختم القران خاتمه خاصه للتدبر
عشر خطوات جميله و سهله
و
بعدين ده احنا ياما ذاكرنا فى الجامعه و حفظنا و فهمنا كتب كتيييييييييير مليانه كلام دكاتره و عباقره و اساتذه
كلام مرتب على كلام مش مفهوم على كلام مش فاكراه كان ايه .كل ده عشان امتحان اخر السنه
جه الوقت بقا اللى نذاكر فيه كلام ربنا الخالق المصور الحكيم العليم سبحانه و تعالى و نفتح كتابنا اللى بجد كتابنا القران الكريم
و نتدبر و نفهم عشان امتحاننا اللى احنا فعلا فيه فى الدنيا
و آخرها جنه ان شاء الله
ملحوظه : احضار اقلام ملونه و اختيار كشكول جميل ماهى الا وسائل للتحفيز و الشعور بجمال ما ستفعل و اختيار المكان و الهدوء يساعدك على التركيز
بعد ان تقوم بهذا المشروع ستستمع الى القران بشكل مختلف و ستجد له تأثير مختلف تماما فى قلبك
و عند القراءه العاديه ستجد نفسك اذا لم تقصد التدبر تقرأ بتركيز اكثر و هتلاقى نفسك بتختار آيات و غصب عنك هتحتفظ فى دماغك بالايات التى تأثرت بها
و طبعا مفيش سرحان تانى و اى حته هتسمع فيها القرآن مش هيمر عليك عادى تانى
----------------------------------------------
لو حبيت الفكر اعمل حاجتين
- الدعاء لصاحب الفكرة بظاهر الغيب
--------------------------------
2- ادعو اصدقائك
جعله الله فى ميزان حسناتكم
رد مع الاستدلال
كتبت بواسطة مشتاقة لامي
الروابط المفضلة