أخواتى الحبيبات .. و عروستنا الحلوين

كل أخت من الأخوات بتكون مقدمة على الزواج .. طبيعى بتهتم بتأثيث شقة الزوجية و عشها السعيد بأذن الله

و اكيد خلال التفكير و التأثيث فعلياً للمنزل بيكون فى خبرات كتير بتكتسبها من خلال تجربتها فى البحث و الأختيار لكل التفصيلات بدايةً من التجهيزات الأساسية من أرضيات و دهانات حوائط .. حتى المفروشات و الأكسسوارات الاخيرة لديكور المنزل

و انا أتمنى أن نتشارك فى خبراتنا عن تجهيز شقة الزوجية و لكن فى نطاق أقل تكلفة بأفضل شكل متاح

فليس بالضرورة ان تكون التكلفة باهظة او أستخدمنا أغلى الأنواع فى تجهيز الشقة حتى يصبح عش جميل و أنيق .. فمن الممكن حتى مع وجود ميزانية متوسطة أو محدودة أن نسعد انفسنا ببيت انيق و جميل بكل أركانه

يعنى أتمنى ان تكون فكرة دردشتنا الأساسية هى كيف نؤثث عش الزوجية بأقل الأسعار و بأقل تكلفة و الوصول لشكل جميل يسعدنا بالنهاية

مع جودة معقولة للأنواع المستخدمة

أتمنى ان كل أخت قدر أمكانها تنقل لنا خبرتها بالتفصيل فى أختياراتها و ما هى أفضل محلات ببلدها و مدينتها تعاملت معها بأقل سعر قدرت توصل له و تحديد الأماكن ان استطاعت حتى نستفيد جميعاً من خبرتها فى الشراء و التجهيز تفصيلياً

و ما هى اختياراتها التى أكتشفت بعد فترة أنها اخطئت بها سواء لخامات معينة او نوع معين أستخدمته فى تاثيث شقتها .. أو محل ما كانت بضاعته مبالغة بالسعر بالمقارنة مع ما أشترته .. سواء فى المفروشات أو انواع الارضيات او الدهانات أو الأكسسوارات

و أن تحكى لنا كيف أستطاعت التوفير فى التجهيزات مادياً قدر أستطاعتها و خطوات التنفيذ

هنا كمان موضوع لاختنا الغالية yomizo
.•:*¨الى بنات مصر المقبلات على الزوااااااااج¨`*:•.
بيه معلومات جميلة فى مرحلة التجهيز خاص باخواتنا المصريات

و أن شاء الله الموضوع هنا عام لكل الاخوات .. حتى يكون عندنا خبرة لكل مدينة و كل دولة كيف تجهز العروس منزلها باقل التكاليف و من افضل الأماكن


بانتظاركم اخواتى .. و أن شاء الله لى عودة حتى أضع ردى لكن بانتظاركم أولاً

ماشاء الله موضوع رائع غاليتي

ولو اني عروس من تسع سنوات

يعني ايامي الموضه كانت غير

لكن ماشي الحال نقول خبراتنا للبنوتات الجداد

1-
بالنسبه لي لقد اثثت شقتي من الستائر الى تنجيد الكراسي الى الصوفات الى السجاجيد

بانواع غالية من الاقمشه و المفروشات ...و صرفت مبالغ كبيره ندمت عليها كثيرااا بعد ذلك

تعرفت على اماكن تبيع منتجات متاشبهه باسعار اقل كثيرااا واكتشفت ان الستائر

من الممكن ان لا تكون غالية الثمن ..

فمن الممكن استعمال او خياطة قماش رخيص ولكن الاختيار الجيد و الذوق الحسن

هو ما يظهرها

فالستائر لا تتعرض للاستهلاك الكبير

كالصوفات و المجالس التى نحتاج لها اقمشه غالية وتتحمل

2-

خبرتي في الديكور كانت قليله فلم اختر دهانات جيده بالوان حديثه فظهرت الشقه

باهته بلون واحد وكان الابيض


3- السجاد الغالي والجيد يفرق كثيرااا مع الديكور ...

و لانني وضعت سيراميك فكان اختياري للقطع الصغيره ناجح

4-

اخطأت كثيرااا عندما وضعت سيراميك في غرف النوم لما يوحي به من بروده ..

كما انه سهل الاتساخ

والاهم انه غير فخم في غرف النوم

5-
المطبخ عندي كان حجمه مناسب و صراحة ولله الحمد احسنت تصميمه

لانني احضرت وزرقه وقلم وبدات اكاتب ما ساضعه من ادوات به

واماكن التخزين التى اتمنى تواجدها

6-

الاكسيسوارات اهتممت بها قبل زواجي و كلما كانت تعجبني

تحفه او مفرش او اكسيسوار كنت اخزنه

لذا عندما تزوجت لم ارهق كثيراااا لاني كنت اختار التحف القيمة

التى لا يتاثر موديلها بالزمن

ووفر عليا هذا كثيرااا من المال والجهد


اتمنى ان اعوض هذه الاخطاء في الفيلا التى نقوم ببناءها ..

و انفذ ما اكتسبته من خبره في الديكور

تسلمى حبيبة قلبى على مرورك الغالى على قلبى

ولو اني عروس من تسع سنوات
يعني ايامي الموضه كانت غير
لكن ماشي الحال نقول خبراتنا للبنوتات الجداد

و ماله خلينا نرجع ايام الخطوبة من تانى و نبقى بنوتات من تانى

بالنسبه لي لقد اثثت شقتي من الستائر الى تنجيد الكراسي الى الصوفات الى السجاجيد
بانواع غالية من الاقمشه و المفروشات ...و صرفت مبالغ كبيره ندمت عليها كثيرااا بعد ذلك

تعرفت على اماكن تبيع منتجات متاشبهه باسعار اقل كثيرااا واكتشفت ان الستائر
من الممكن ان لا تكون غالية الثمن

فعلاً غاليتى هو ده اللى خلانى اطرح الموضوع .. خاصة ان معلوماتك عن فكرة الاماكن الأرخص وفرت تقريبا اكثر من النصف لى عند تجهيزات اختى
و علشان كده حبيت نتشارك خبراتنا فى النقاط اللى ندمنا عليها

بالنسبه لي لقد اثثت شقتي من الستائر الى تنجيد الكراسي الى الصوفات الى السجاجيد
بانواع غالية من الاقمشه و المفروشات ...و صرفت مبالغ كبيره ندمت عليها كثيرااا بعد ذلك
تعرفت على اماكن تبيع منتجات متاشبهه باسعار اقل كثيرااا واكتشفت ان الستائر
من الممكن ان لا تكون غالية الثمن ..
فمن الممكن استعمال او خياطة قماش رخيص ولكن الاختيار الجيد و الذوق الحسن
هو ما يظهرها
فالستائر لا تتعرض للاستهلاك الكبير
كالصوفات و المجالس التى نحتاج لها اقمشه غالية وتتحمل

ده فعلا حقيقة .. و اكثر ما لفت نظرى ان بالستائر خصوصا عند شرائها من محلات الأقمشة الخاصة بالمفروشات بلاحظ ان سعرها غالى مع ان نفس الأقمشة متواجدة فى محلات أقمشة الملابس بنصف السعر تقريبا
مثال قماش التفتا .. احياناً بنستخدمه فى الستائر الخفيفة و بيكون مطلوب جداً و غاية بالفخامة

و فى فرق سعر كبير عند شراءه من محلات اقمشة الستائر عن محلات اقمشة الملابس تقريبا وصل معايا لنصف السعر .. غير انى لقيت كل تدرجات الألوان اللى احتجت لها و ده ما قدرت الاقيه فى محلات المفروشات

و لى عودة لبقية النقاط

عند أختيارنا لأقمشة المفروشات .. ذهبت لمحلات أسعارها مرتفعة لحد ما و فعلا أعجبنا العديد من الأقمشة و كنا سنقوم بشرائها

ثم سمعت من ام رهف جزاها الله كل خير عن تجربتها فى انها وجدت معظم ما أشترته فى اماكن اخرى فنزلت و لقيت نفس الأقمشة منها بثلث السعر و منها بأقل من نصف السعر تقريبا و نفسها

فبالنسبة لأخواتى المصريات لأقمشة المفروشات

الأماكن التى اقصدها هى الوكالة .. و شارع الأزهر
و نفس الأقمشة وجدتها و أختلاف كبير بالسعر كما ذكرت
خدوا جولة فى المحلات الكبيرة و الراقية .. حتى تتعرفوا على احدث الأقمشة و بالتالى حيكون سهل تحديد ما تفضلينه بهدوء و بالتالى تتفادى اى أقمشة تكون منتشرة أو متداول شكلها

بالنسبة لأقمشة التنجيد .. او بعض الستائر لأخواتى المصريات

صادفت يوم الأحد بالوكالة .. بيقوموا ببيع اقمشة هى بواقى الأتواب الكبيرة للمحلات .. و بأسعار وهمية و الله ما صدقتش نفسى .. بس للأسف كنت اشتريت كل الأقمشة

و لكن وجدت أسعار مغرية للغاية ممكن تنفع لو محتاجة ستارة بحجم صغير او للتنجيد بالنسبة للعروس و طبعا بتكون تقريبا نصف السعر للمحلات اللى هى اصلا اسعارها ارخص كتير من محلات الاقمشمة و المفروشات

وعليكم السلام ورحمة الله وبركاته

ماشاء الله يابوسى موضوع جاء فى وقته الاحظ ان نسبة البنوتات فى الركن ماشاء الله زادت

موضوع فى غاية الاهمية وهو غير مرتبط بدولة معينة يعنى موضوع عام للجميع

فمنه تكتسب اى عروسة خبرة بالامكان المتواجدة فى بلدها بالاسعار التى تناسبها

ايضا الافكار الجديدة التى تناسب التجهيزات الاساسية ..

لى رجعة لموضوعك مرة اخرى للإفادة ان شاء الله

ولو اني عروس من تسع سنوات

ياربى بانت الفضايح على اصولها امال احنا نقول ايه

السلام عليكم ورحمة الله وبركاته
موضوع اكثر من رائع مشكورين عليه يا مشرفات ركن الديكور الغاليات واعتقد انه سيكون مرجع لكل عروس لان الكثير من الفتيات وانا احداهم قبل الدخول فى تجهيزات الزواج لم يكن عندى اى درايه باى شىء وكانت اهتمامتى بعيدة عن هذه التجهيزات سواء تجهيزات الشقة من دهان وسيراميك و كرانيش .........الخ او تجهيزاتى من اطقم للمطبخ او ملايات السرير وستاير الخ فبالتالى اشكرك يا مشرفتى الغاليه على طرح هذا المرجع لكل عروس وخاصة ان المشرفات هم اللى بدأو الحوار بتجربتهم الشخصية ولعل الكل يستفاد وجزاكى الله خير

انا بالنسبة لى ساعرض تجربتى التى لم تنتهى بعد لانى مازالت فى تحضيرات النهائية للزواج وادعوا لى ان يتم زواجى على خير وربنا يبارك فيه

1

شقة الزواج بتاعتى صغيرة جدا وبما انى مهندسة معمارية فقمت بهدم بعض الحوائط ودمجها مع الغرف لزيادة المساحة
فقمت بدمج البلكونة مع حجرة الليفنج وايضا مساحة المطبخ كانت صغيرة للغاية وكانت هناك طرقة بها باب المطبخ والحمام فدمجت هذه الطرقة مع المطبخ وغيرت فتحت المطبخ من المدخل وجعلت فتحت الحمام من الريسيبشن ولكن جعلت الباب من الالوميتال وكله مرايا حتى لا يلاحظ ولا يكون شكله سىء وكانها مرايا بطول الباب

2 بالنسبة للسيراميك

لان مساحة الشقة صغيرة فكان من الضرورى ان اجعل السيراميك بالوان فاتحة ويكون من النوع الامع حتى يعطى زيادة للمساحة فكان المدخل والريسيبشن وحجرة الليفنج اما غرفة النوم فجعلت لها شكل اخر ولكن بنفس الالوان ولكن سيراميك روستيك وده بدل من الباركيه والوانى كانت من البيج الفاتح جدا واللون العسلى او الهافان الفاتح والمدخل جعلت الحوائط سيراميك روستيك على شكل حجارة لعمل ديكور حجرى والعواميد جلدتها بالخشب واخدت نفس القشرة بتاعت باب الشقة وسوف تدهن بنفس اللون
وسيراميك الحمام والمطبخ جبتوا روستيك ولكن ملمسه ناعم اللى حد كبير جدا
أماكن شراء السيراميك بارخص الأسعار

اشتريت السيراميك من الفجالة ولكن سمعت عن بعض الاماكن فى عين شمس مخازن بتوزع بسعر اقل بكتير
والفجاله ايضا اسعارها ارخص من المعارض
وعلى فكرة انا اشتريت فى اخر العام يعنى زى اليومين دول شهر 12 وده كان كويس لان كان بعض الشركات منزلة عروض ارخص زى الجوهرة كانت منزاة مجموعة من السيراميك باسعار وهمية وانا اشتريت من كيلوبترا وبرده كانت اسعارها فى الوقت ده جنان
الكرانيش كان نفسى اعمل سقف ساقط ولكن لان المساحة غير كبيرة فاكتفيت بعمل بيت نور بسيط جدا من نفس شكل الكرانيش اللى اخترتها وعملت ده فى الليفنج والباقى كان كرانيش عادية ولكن شكلها حلو

الدهان اخترته من نفس الوان السيراميك فجعلت الحوائط باللون الكريمى الفاتح والعواميد فقط وهى مرتبطة مع بعضها بكمرة جعلتها باللون البرتقالى الداكن ما عدا حجرة النوم لسه ما اخترتش لونها وكنت عايزاها بلون مختلف فممكن تساعدونى فيه

3 بالنسبة للاثاث

انا اشتريت العفش من دمياط واشتريتوا خشب البيض وانا هدهنوا واشطبوا ووقف عليا بالشكل ده اقل من نصف التمن بس المهم يكون فى حد معاكى من دمياط وتكونى واثقة فى وجبت الغرفة بمقاسات مناسبة للغرف عشان مضايقش المساحة وجعلت السفرة والنوم والانتريه من نفس تدريجات الالوان وهو بنى داكن بندقى مع درجات افتح لان الغرف بها قشرتين خشب وخليتوا مط وهابقى احكيلكم عليه لما يخلص
وطبعا الاقمشه بتاعت تنجيد الصالون والانتريه والمفارش اللى على السراير والستاير هخليها فتحة اوى عشان تنطق الغرف
والصالون طبعا مدهب واحسن دهب هو الفرنساوى او يسمى دهب فينو وعلى فكرة الصالون بالذات بيبقى ارخص اوى لو جبتوه خشب ابيض وانتى تدهنيه
بالنسبة بقى للديكورات فجبت مجموعة فضيات عشان احطها على البوفيه وجبت مجموعة اخرى بالنظام الستيل عشان احطها فى المدخل لانى مخليه النظام كله كلاسيك

4 جهازى بتاع المطبخ والنيش والشقة

جايباه من حمام التلات هناك الحاجة حلوة اوى ورخيصة بس تبقى شطرة وتفاصلى كويس وبعض المفروشات جبتها من المعرض
وطبعا اى سؤال خاص بالحاجات دى انا مستعدة اقولكم

5 السجاد

انا لسه مجبتوش بس اختى جابت من معرض السجاد بتاع النساجون الشرقيون اللى بيتعمل على شهر 3 وكان طبعا رخيص والستاير انا غالبا هجيبها من الوكاله لانها فعلا ارخص

وعلى العموم ده اللى عملتوا ولما اتجوز هاقولكم بقى ايه اللى طلع وحش وايه اللى كويس
واتمنى برده منكم انكم تنصحونى لو لقيتوا حاجة مش هتبقى حلوة
وادعولى ربنا يتمم لى بخير واى خدمة

أجمل ما يزين عش الزوجيه من بين هذا كله ألا ننسى طاعة الله ورسوله وأن أساس

البيت من اواجب أن يكون على تقوى الله فا للهم ارزقنا تقواك التى بها سعادة القلوب

الحكاية حلوة انا لسة بنت و مصرية بس شكلي حستفاد منكو جدااااااااااااااااااا



بارك الله فيك يا اخواتي الغاليات

سبحان الله هو كل المصريات بيفكروا في مواضيع شبه بعضها كده في نفس التوقيت لولا ان النت عندى فصل كنت حطيت موضوعي بنفس التوقيت
بس انت موضوعك احلى هيفيد كل البنات لكل الاقطار

وموضوعي
.•:*¨الى بنات مصر المقبلات على الزوااااااااج¨`*:•.
لبنات مصر فقط واهو نفيد ونستفيد من بعض

الاكسيسوارات اهتممت بها قبل زواجي و كلما كانت تعجبني

تحفه او مفرش او اكسيسوار كنت اخزنه

لذا عندما تزوجت لم ارهق كثيراااا لاني كنت اختار التحف القيمة

التى لا يتاثر موديلها بالزمن

ووفر عليا هذا كثيرااا من المال والجهد

فعلا تجميع الاكسسوارات بيوفر فى وقت تجهيز الشقة كثيرا جدا من الجهد و المال

لكن طبعا أحيانا بتكون ألألوان متعددة

تجربتى مع الشموع و الأكسسوارات و التحف .. أننا جمعناها كلها و قسمناها لالوان متقاربة

و كان سهل فى النهاية استخدامها و تكملة التحف و الأكسسوارات الناقصة فى كل غرفة

نصيحة لاخواتى المصريات للأكسسوارات

و من المحلات الرائعة سعراً و معظم اكسسواراتها مستوردة و بأسعار مناسبة جدا بدون مغالاة عن السعر الحقيقى

محلين فى المنيل خلف لارين للحلويات

أسمه كراكس .... و ... سيد

فعلا من المحلات الاكثر من رائعة و دائما بيها معظم الاكسسوارات المميزة و المستوردة

اتمنى ان اعوض هذه الاخطاء في الفيلا التى نقوم ببناءها ..

و انفذ ما اكتسبته من خبره في الديكور

بيت مبارك ان شاء الله و تعمروه بالهنا و السعادة حبيبة قلبى
و بانتظار خبراتك من اول مراحل البناء حبيبتى