اســــــئلة محيـــــــــــــرتنـــــي
السلام عليكم
بصراحة في كم مسألة شاغلين بالي و ان شاء الله بلاقي لها جواب عندكم.. بعرف انتو قدها
ما اكتر حكيي
اول و اهم مسألة هي اني بالشركة ما عم بقدر أصلي الا بغرفة مترين في مترين هي المستودع!! لانو ما في و لا غرفة ممكن تكون فاضية و حتى لو كانت فاضية ما بضمن ما يدخل رجال و انا عم بصلي فبضطر اصلي بالمستودع اللي فعلياً ما في مكان يوسع لسجادة الصلاة لانه مكدسة فيه الاغراض و الكراتين، بالتالي – و هون السؤال – بدال ما اصلي بشكل مستقيم متل ما هي القبلة بضطر اني احرف السجادة بزاوية خفيفة حتى تتسع لي و للركوع و السجود و القيام .. هل صلاتي جائزة مع التغيير الحاصل باتجاهي انا و السجادة؟
السؤال التاني كمان شغلة محيرتني تتعلق بفتاوى تحريم بعض الأمور لكونها تشبه بالكفار... اكيد انا مؤمنة تماماً ان التشبه بالكفار و ملابسهم و تقاليدهم لا يجوز و حرام و يجعلنا –و العياذ بالله – منهم، لكن سؤالي عن الحد اللي على اساسه بنقرر انه هاد تشبه او عدم تشبه بالكفار..
مثلا من فترة قريبة قرأت فتوى تفيد بتحريم لبس الدبلة لانها تقليد لكفار (اذا كان لابسها لا يؤمن بانها تطيل الزواج و تحافظ عليه).. طيب ليش مثلا ما تحرم تقليد لبس البدلة البيضاء في الزفاف و هي ايضا من تقاليد الكفار قديما.. ؟ و ليش حرام اطالة الاظافر و صبغها لانه من التشبه بالكفار.. لكن الروج و صبغ الشفتين مش حرام.. مع انه اكيد من اختراعهم؟؟
و الله مو قصدي التشكيك بحرمة شي او تحليله لكن فعلا شي بيحير ...
كمان شغلة ...
قرأنا فتوى نقلتها الغالية شمالية غربية عن تحريم زيارة قبور الكفار و المعذبين و مواقع سكنهم و ما الى ذلك.. و كان من امثلتها الأهرام.. و بنفس الوقت عم نشوف فتاوى تحريم السفر الى بلاد الكفار الا للضرورة... طيب الواحد لو حكى ما بدو يسافر و بدو يبقى في بلده و حكى يلا نعمل سياحة داخلية .. بيلاقي – انا عم بحكي هلا عن الاردن – ان بحرنا (البحر الميت) هو مكان عذاب قوم لوط، و ان أثارنا معظمها قبور للكفار (مثل الرومان) ..
معظم هالحكي بينطبق على كل البلاد تقريبا .. فالاثار اللي بنقصدها للسياحة اذا لم تكن مساجد فهي في غالبيتها العظمى آثار قديمة لرومان او فرس او حضارات كافرة .... او هي قبور مشرفة (مثل تاج محل و الأهرام) أو تماثيل (يا كثرها) ...
اللي محيرني هون انه تقريبا ما بقي خيارات للواحد يروح مكان بقصد السياحة و نية الترويح عن النفس .. هلا كل ما الواحد يفكر في مكان بيطلع انه في مخالفة شرعية ممكن ارتكابها .. ممكن تفيدوني بهالموضوع؟؟
و رجاءً لا تفترضوا اني معترضة مجرد عدم استيعاب للموضوع من طرفي
و الكم كل الشكر مقدماًً
الروابط المفضلة