** وصفة مبتكرة **لمحبي البيتزا تفضلوا ........ بيتزا من مطبخي
السلام عليكم ورحمه الله وبركاته
اليوم حابه اقدم وصفه البيتزا وهي طريقه معتمده عندي وما بغيرها وان شاء الله تنال اعجابكم وهاي اول مشاركه الي بركن المعجنات
العجينه :
طحين تقريبا 2 كيلو
ملعقتين خميره
ملح
سكر
ماء
زيت زيتون
زيت ذره
انا ما بستخدم معيار على البركه بعجنها ودايما بتطلع نفس العجينه
اول شي بنحط الخميره مع شويه سكر بكاسه وبنضيف الهم شويه ميه دافيه وبنحركهم وبنغطيها عشان تخمر
بعدين بجاط كبيره بنحط الطحين والملح وكمان شويه سكر عشان تخمر العجينه اسرع وبس ترتفع الخميره بالكاسه بنضيفها على الطحين وبنعجن بشويه ميه دافيه ما بنستهلك ميه كثير بس تصير عنا عجينه متماسكه بنضيف الزيت الزيتون وزيت الذره وبنرجع نعجن طبعا كل ما عجنتي اكثر كل ما طلعت العجينه معك احسن ونافشه وطريه
بعدين بنغطي العجين وبنتركها حتى تختمر
مقادير حشوه البيتزا:
بصله مفرومه ناعم
كيلو فلفل حلو اخضر مقطع دوائر
علبتين او ثلاثه فطر مقطر
كاتشب
نقانق
جبنه موزرايلا (انا استخدمت الخمس بقرات كثير ممتازه )
زيتون مقطع
بنقلي البصله المفرومه مع شويه زيت وملح وبهار وفلفل اسود وبس تذبل البصل بنضيف الفلفل الحلو والفطر بعد ما نصفيه ونغسله من ميته الي بالعلبه وبنقلبهم مع بعض وبنغطي الطنجره وبنتركهم حتى يذبلوا طبعا الفلفل راح ينزل ميه وما راح نحتاج نضيف ميه واحنا بس بدنا يذبلوا شوي
هسه العجينه بس تختمر بنقطعها الي دوائر حسب الحجم الي انتي حابيته وبنتركها ترتاح شوي عشان بنفردها براحتنا بالصينيه
بنفرد العجينه بصينيه مدهونه بزيت ذره وبندهن وجه العجينه بكاتشب وبنبرش الجبنه فوق الكاتشب وبعدها بنضيف من الخلطه الي عملناها الفليلفه والفطر
ونضيف فوقهم الزيتون والنقانق واخر شي بنضيف فوقهم كاتشب
بندخلها على فرن حامي وبش تستوي وتحمر من فوق بنطلع الصينيه وبنرجع بنبرش شويه جبنه من فوق
وبندخلها على الفرن الحامي بعد ما نطفيه هون بس بدنا الجبنه الي على الوجه تذوب من حراره الفرن المطفي
وبنقطعها وبنقدمها وصحتين وعافيه وان شاء الله الصور بتوضح الطريقه
هون العجينه قبل ما تخمر
وهون بعد ما خمرت
هسه صور البيتزا قبل الخبز
هون لما برشنا الجبنه وبدنا نرجع نخليها تذوب
وصحتين وعافيه
رد مع الاستدلال
الروابط المفضلة