لعيون أم عزو ..... تارت السبانخ.... مشاركتى فى الأوراق الخضراء
علشان أنا قلبى طيب وحنينة
ونزولا على رغبة أم البنات
وما تفتكروش إنه خوف لا سمح الله
من العض ولا العصاية بتاعة ام عزو
قلت الطيب أحسن
وخلينا ننزل التارت فى ركنى الحبيب
ركن التسمين السريع
ورفع شعار لا للتجويع ههههه
كلاكيت تانى مرة
تــــارت السبانخ المورق اللذيذ
اللى بالمناسبة مليان زبدة لعينه
أولا: عجينة الباى المورقة
راااائعة فعلا بعد الخبز بتكون
العجينة عبارة عن طبقات مورقة
وده طبعا لإحتوائها على الزبدة
اللى بتعطيها طعم خياااال
المقــادير:
2كوب دقيق
1/2 معلقة صغيرة ملح
1 معلقة صغيرة باكينج بودر
12 معلقة كبيرة زبدة أو ما يعادل
1.5 ستيك زبدة
2 بيضة كبيرة
العجينة دى ممكن تتعمل فى الفود بروسيسور
الطــريقة:
نضع الدقيق مع الملح والباكينج بودر
فى الفود بروسيسور ونديهم ضربتين
على الماشى علشان يتخلطوا كويس
نضيف الزبدة مقطعة قطع ونديهم برضه كاام
ضربة كده لغاية أما يكون شكلها كده
ثم نضيف البيض ونضربهم مع بعض لغاية لما
نحصل على عجينة كورة كده
نطلع العجينة ونكورها على سطح مرشوش دقيق
وتبطط براحة اليد ثم تلف بالبلاستيك
وتوضع بالثلاجةلمدة ساعة مثلا أو إثنين
وممكن تفضل بالثلاجة لمدة 3 أيام
ثم نخرجها من الثلاجة ونفردها
هتلاقى صعوبة شوية الاول فى الفرد
وعلشان كده فيه طريقة بسيطة
فى الأول تديها ضربات متلاحقة بالرول
وتلفى العجينة 30 درجة وضربات متلاحقة أخرى << شريرة
وتلفيها 30 درجة وهكذا علشان بس تطلع مستديرة
يا رب الصورة توضح المقصود
ما تقلقيش لو الأطراف شققت كده
هتتعدل واحدة واحدة معاكى
ثم توضع فى صينية التارت
وتوضع بالثلاجة حتى الإنتهاء من عمل الحشو
ملحوظات هااااامة بالنسبة للعجينة:
مهم جدا إن الزبدة تكون باردة وكمان
مطلوب الحفاظ على الزبدة بداخل العجينة باردة
قبل وضع العجينة بالفرن وده علشان عايزينها
تسيح فى الفرن وتخلى العجين يعمل طبقات
علشان كده كل شوية بنحطها فى التلاجة
فحاولى تعمليها والمطبخ بااارد
من الضرورى جدا جدا وضعها بالتلاجة قبل الفرد
وبعده علشان نقلل من الإنكماش بتاع العجينة
الحشــوة
1/2 كيلو سبانخ مقطعة أو الجاهزة
1 بصلة مفرومة
ممكن إضافة فراخ قطع أو لحمة مفرومة لو حبيتى
ملح وفلفل
1 ونص كوب كريمة طبخ
1كوب جبنة شيدر أو أى نوع ( إختيارى)
3 بيضات
نضع البصل على النار
ثم نضيف الفراخ وعند قرب السوا
نضيف السبانخ ونقلب
نضيف الكريمة ونقلب وتترك قليلا على النار
حتى تتخن الكريمة
( ممكن الإستعاضة عنها بكوب من اللبن مع الزبدة والدقيق زى ما قلنا فى البدائل )
نضع الجبنة
ثم البيض ونقلب سريع علشان البيض ما يستويش
ويعمل لنا تكتلات بيضاء فى الخليط
نضيف الملح والفلفل
ثم يوضع الخليط السابق فى التارت
بعد ما نطلعه من التلاجة
نكون مجهزين الفرن على 375 فهرنهايت
تدخل الفرن حوالى ساعة إلا ربع
أو حتى تحمر الأطراف
تترك حتى تهدأ
ثم تقطع وتقدم بالهنا والشفا
بتكون رووعة وطعمها جميل جدا
يا ريت يكون باين العجين
قد إيه هش وعامل رقائق
حاولت أصوره علشان يبان
جربوها وإن شاء الله هتعجبكم
أتمنى أن تكون نالت إستحسانكم
رد مع الاستدلال
كتبت بواسطة moon and stars
الروابط المفضلة