السلام عليكم ورحمة الله وبركاته
إزيكم يابنات بجد وحشتوني ووحشني الكتابة في منتدايا المفضل بس بقيت كسلاانة موت
بتابع من بعيد واللي بتعجبني وصفتها بدعيلها
الموضوع ده عملته بعد فترة غياب طويييييييييييييييييييلة إهداء لحبيبة قلبي ماما دودو
بحبها من غير ماأشوفها ربنا يجمعني بيها في الجنة إن شاء الله
ويقومني أنا وهي بالسلامة
كفاية رغي بقى ندخل على الموضوع
أنا جبت من فترة ماكينة بيتزا ماركة برستيج ده اللي موجودة في مصر
وزيها بره مصر ماركة إسمها جيباس زي اللي عند أختنا أم مريم العراق
ربنا يباركلها ساعدتني في إستعمال المكنة
ده شكلها من جوة
وهي جهاز كهربائي مخصوص لخبز البيتزا
قطرها حوالي 28 سم
هحكيلكم تجربتي معاها وملاحظاتي عليها
جربتها أول مرة عجنت عجينتي العادية وفردتها بنفس المقاس وسبتها تريح شوية
سخنت المكنة 5 دقايق وحطيت فيها العجينة وفردت الصلصة بعدا الجبنة بعدها توبينج الخضار
إستوت في 7 دقايق تقريبا
بس الخضار لسة ني ولون أطرافها من فوق فاااااااااااتح بشكل غير مرضي
تاني مرة
جبت صواني فويل طبعا مقاساتها مش كبيرة نفس مقاس المكنة أصغر منها
فردت العجينة بمقاسها ودهنتها زيت وحطيت فيها العجينة وسبتها تريح ربع ساعة بعدين فردت الصلصة وتوبينج الخضار (مع كمية طماطم قليلة جدا في التوبينج ومقطعة صغير أوي )سويتها 10 دقايق ثم ضفت الجبنة وكملت 5 دقايق كمان
طلعت ممتازة ماشاء الله
وده كانت النتيجة
ده الصواني الصغيرة
وده صينية بنفس مقاس المكنة عملتها بنفسي من ورق فويل جامد كان عندي(الحاجة أم الإختراع)
التجربة التالتة بقى
لاقيت إني لما بعجن وأخمر وأخبز في نفس اليوم بيكون مجهد وبتضيع الفايدة اللي عشانها شارية المكنة وهي السرعة والراحة
قمت عملت إيه
كان عندي صواني ألومنيوم نفس مقاس المكنة بالضبط
عجنت عجينتي وخمرتها وفردتها في الصواني بعد مارشيت تحتها دقيق وريحتها ربع ساعة وخبزتها في الفرن فاضية بدون حشوة
ممكن تتخبز برضو في المكنة بدون حشو بس أنا أصلا كنت مشغلة الفرن فحبيت أستغله
المهم أصبح عندي أقراص بيتزا زي الجاهزة
شلتها في الفريزر لحد ماأحتاجلها
في اليوم الموعود
طلعتها تفك من الفريزر على ماجهزت الخضار والذي من لحمة فراخ زي ماتحبي
وعملت حركة كمان دبلت الخضار شوية على البوتاجاز
بعد مافكت(مابتاخدش وقت نص ساعة بالكتير في البرد ده)
فردت الصلصة وزعت الحشوة
فردت طبقة فويل في المكنة عشان تحميها من تحت وتاخد وقت شوية
حطيت البيتزا 5 دقايق وبعدين فتحت حطيت الجبنة وسبتها كمان 5 دقايق
طلعت ممتازة والنتيجة بيتزا مقرمشة من تحت والعجينة لذيذة ومحتفظة بطراوتها
عيوبها
مناسبة للعائلات الصغيرة يعني لو هتحتاجي صينية أو إتنين اوكي أكتر من كده يبقى ريحي دماغك وإعملي في الفرن
أنا أعرف ناس بيعملوا خمس صواني
مميزاتها
طبعا التعامل معاها ألطف من الفرن حاجة كده تكنولوجيا
رهيبة في التسخين
خصوصا الحاجات الرخمة في تسخينها
العيش من الفريزر
الفطير من الفريزر
المكرونة بالبشاميل
وفي تسخين البيتزا وااااو كأنها لسة معمولة والجبنة بترجع تسيح وتمط تاني
لما أجرب حاجة تاني فيها هقوللكم إن شاء الله
رد مع الاستدلال
الروابط المفضلة