اخواتي غدانا اليوم كان بيتزا الطبق المفضل للكبار والصغار والحمد لله بعد عدة تجارب بقيت اتقنها بفضل الله
انا هقولكم كل التفاصيل والتكااااااااااااااات الخاصة عشان البيتزا تطلع منك زي بتاعة برة بالظبط والله العظيم نفس الطعم والحمد لله العجينة طرية وزي الفل ومش بتطلع مفرولة

انا هكتب الشرح العام مع الصور وفي الاخر هكتب مقادير العجينة والحشوة

اول شئ هنعمل العجينة الخاصة بالبيتزا بتكون مختلفة عن عجينة الفطاير في حاجتين اولا مش بحطلها زبادي عشان الزبادي بيطريها اويييييي(احنا بنحب قعرها مقرمش شوية) ثانيا الزيت اقل من عجينة الفطاير

نسيب العجينة تخمر في مكان دافي لمدة ساعة علي الاقل انا سبتها ساعتين(انا بغطيها بكيس واحطها في الفرن من غير تسخين ولا ايييي حاجة)
هنا بعد ماخمرت شوفو ماشاءالله الله اكبر قد ايه

نكون جهزنا الحشوة

نفرد العجينة في الصاج او الصينية

وندهنها بالصلصة(انا بعملها في البيت وهقول طريقتها)

وهنا بعد ماحطيت الحشوة(البصل والفلفل الرومي والزيتون واللحم المفروم)

وهنا حطينا الجبن الموتزاريلا علي الحشوة

وبفضـــــــــــــل الله دي النتيجة

شوفو سمكها قد ايه

ودة طبـــــــــــــــــــــــــق صغنون

اولا المقادير:
5 كوب دقيق
6 م ك زيت
5 م ك سكر
4:5 م ك لبن بودرة
2 م ك خميرة
نصف م ص بيكنج بودر
م ك ملح
ماء دافئ حسب الحاجة

العجين ياجماعة تحطي عليه الماية الدافية شوية شوية وتعجني تعجني انا بعجن بايدي ولازم اعجن كتييييير لحد مالاقي العجينة لمت مني وملمسها نعم وبقي قطني كل ماتعجني كل مالعجينة تطلع احلي

الحشوة:
بصل مقطع مكعبات صغيرة
فلفل رومي مكعبات صغيرة
زيتون (نعصره كويس بايدنا لو فيه ماية واحنا بنقطعه وكمان قبل مانحطه عالبيتزا)
لحم مفروم يكون مبهر بملح وفلفل وقرفة وحبهان(ممكن اي حشوة تحبيها بس كله يكون ناضج)
الصلصة(انا بجيب معجون الطماطم بدوبه في شوية ماية صغيرين مش كتير بحيث يكون السمك تخين مش خفيف ابدا والا البيتزا هتعجن بحط عليها ملح وفلفل وكم فص ثوم والسر المهم جداااااااااا بقي هو الزعتر والريحان المجففين من غيرهم البيتزا هيضيع منها الطعم الاساسي)منكترش بنحط شوية حلوين كدة علي قد كمية الصلصة وبيهم مش هتفرقي بيتزا البيت عن البيتزا الجاهزة

ولو تلاحظوا انا مش بحط طماطم عشان بتنزل مايتها وبتعجن البيتزا لو بتحبي تحطيها قطعيها مع الزيتون في طبق لوحدهم والملح الي في الزيتون هينزل ماية الطماطم تروحي وتيجي تعصري فيها بايدك اوي لحد ماتنزل مايتها كويس جدا

وانا بحب احط البصل والثوم صاحيين عشان طعمهم بيقي قوي ورااااائع مش بحب اعملهم عالنار

بس كدة.......
الاول بنرش دقيق كتير ونفرد العجينة بالنشابة بسمك سم او حسب ماتحبي ونشيلها بالراحة علي الصاج ونحط الصلصة وبعدين البصل والفلفل والزيتون واللحم المفروم واخييرا الجبنة الموتزاريلا بكثره

ندخلها علي درجة حرارة عاااااااااالية والفرن يكون سخن وفي الاخر نولع الشواية من فوق شوية انا بتاخد معايا 25 دقيقة تقريبا او لحد مالونها من تحت يبقي دهبي

ولما تطلعيها وهي سخنة كدة اديها رشة خــــــــــــل كدة بسيطة بايديك بيديها مزازة وطعم حلوووووو

كدة انا خلصت(بفتح الخاء) وخلصت(بكسر الخاء)
وبجد بجد البيتزا طعمها خرافي

تسلم ايدك عزيزتي
وبالهنا والشفا

روووووووعة ماشاء الله تسلم ايدك

ما شاء الله ابدعتى يا غاليه

يعطيك العافيه وصحه وهنا على قلبكم

جزاك الله كل خير

واو ابداع
سلمت يداك

ماشاء الله
تسلم الايادي

ما شاء الله تسلم ايدك يارب
بتشبه طريقتي كتير ابدعتي عنجد
بس انا بحط باكنج باودر عالعجينة منشان تقرش شوي
وفعلا بحط زعتر ناشف بتطلع وااااااااااو

ماشاء الله يسلمو

مشكوريييييييين اخواتي الغاليات

بس لي منتدانا الحبيب صار هادئ كدة