بسم الله الرحمن الرحيم
حبيباتي اليوم حابة اشرحلكم طريقة المسخن بالعجين
يعني انتي رح تعجني وتحضري كل الوصفة:
المقادير :
*دجاجتين مقطعين و مسلوقين منيح
(طبعا الكل بيعرف كيف يسلق الدجاج مي وملح وحب هيل وقرفة
وشوية فلفل اسودما تكتري
* 4 بصلات متوسطين ومقشرين ومقطعين جوانح
(بعرف رح تبكي من ريحة البصل بس الله يكون بعونك)
* 3.5 كاس طحين مرشوش عليه شوي ملح ومعجون بكاس
ونص ماء وشوية حبة البركة(الماء حسب ماتمسك معك العجينة
مو ضروري كاس ونص)
* ومتل العادة ملح وفلفل واي بهار بتحبي
* وكاس زيت زيتون
* وسماق (مو ضروري بيعطي لون وشوية حموضة)
الطريقة:
ركزو معي منيح
*اول شي نعجن العجين ونتركو يرتاح شوي لحتى نحضر
الحشوة (طبعا اذا لاحظتوا العجين بون خميرة ابدا )
*بعدين بنقلي البصل اللي مقطع جوانح بزيت زيتون كمية
منيحة لانا رح نستخدمها مع العجين ورح تعطي طعمة طيبة
وبنرشلو شوي ملح وفلفل اسود وبنتركو ليستوي شوي
وبنحطلو السماقاللي مو ضروري بس للي بحبو
*بعد هيك منقسم العجين لقسمين الاول بنفردو بارض صينية
الاحسن تكون تيفال مدهونة بشوي زيت من الزيت اللي
قلينا في البصل(بس زيت بدون بصل)
*بنحط على وجه العجين طبقة بصل تقريبا تلتين البصل
المقلي معنا
*وبنقطع الدجاج بدون العظم والجلد ونفردو على وجه البصل
ونحط بقية البصل والزيت على الدجاج (بس خلو شوية زيت
لندهن طبقة العجين التانية)
* اخر شي نفرد العجينة الباقية على جنب طبعا بحجم الصينية ونغطي فيها الدجاج والبصل ونسكرها من الاطراف على قد ما بنقدر وبندهنها بباقي الزيت
* بندخلها الفرن مش رح تاخد وقت ديري بالك اذا كان الفرن حامي لا تنحرق عليك بعد التعب كلو يعني من 10 دقائق ل20 دقيقة
* وحمريها من فوق وقطعيها والف صحة وعافية
حبيباتي اذا عجبتكم لا تحرموني من ردودكم
واذا ما عجبتكم انا بتقبل اي انتقاد لانكن متل اخواتي
بس للاسف بعد الشغل كلو ما عرفت انزل صور
رد مع الاستدلال
[
الروابط المفضلة