مسااااااااااااااء الخيييييييييييييير
عملت توست ...... عملت توست ...... عملت توست......
معلش أصلى فرحاااااااااااانه اوى
ابنى بيموت فى سندوتشات التوست والنهارده التوست خلص وابتدى يزن عاوز يتعشى قلت والله لأعمل توست وزى ماتيجى.... واللى حايطلع حاقنعه إنه توست وياكله وخلاص وقلت باسم الله ابتدى وطلع تووووووووووستتتتت
حتى شوفوا معايا واحده واحده
أولا المقادير :
عملت كمية صغيرة علشان أجرب وكمان القوالب بتاعتى صغيرة حبتين
1 كوب ماء دافىء
1/2 م ك خل
قطعة خميرة صغيرة
1/3 كوب سكر
1 م ص ملح
1/3 كوب سمن
3 كوب دقيق
ثانيا الطريقة :
الأول خلطت الخميرة مع الماء والسكر وسبتها تتفاعل
وبعدين حطيتها فى العجانة بعد مانفشت ومعاها السمن والخل
ثم يضاف كوب دقيق ويعجن مدة 3 دقائق
ثم يضاف باقى الدقيق وتعجن جيدا بالعجانة ثم باليد وبعدها توضع فى اناء مدهون بالزيت جيدا
تغطى وتترك مدة ساعة تقريبا فى مكان دافىء وده شكلها بعد ماختمرت
وبعدين نعجنها تانى باليد ونفردها ونبرمها ونحطها فى القالب المدهون زيت ومرشوش دقيق وأنا قسمتها اتنين علشان القالب صغير
وبعدين نغطيها ونسيبها تخمر تانى مدة ساعة تقريبا وآدى شكلها
نشغل الفرن ياقمرات ونزق القولب ونقعد ندعى جنبها إن ربنا يسترها معانا ويطلع توست وشوية كده ونروح ملمعين السطح بشوية زيت بالفرشاة ونستنى أما الوش يحمر
نقلبه على الشبكة ونغطيه شوية علشان يهدى ويطرى
وإدى أول تقطيعايه للتوست اللى عمايل إديا بس معلش أنا قطعته وهو لسه سخن علشان كده شكله مش مظبوط
وآدى أول سندوتش للأستاذ عز عبارة عن جبنه بيضا ولانشون وتوست فظيع من عمايلى
وألف هنا وشفاااااااااا......... يم يم
الروابط المفضلة