السلام عليكم
مرحبا يا حلوات
بتتذكروا لما حكيتلكن من يومين عن رحلتي ل لبنان
صدقت حالهاأنه راحت..هههههه
مو قلت بالبداية إني كنت جايبة طبق لأم البنات و كانت نفسها مسدودة
و حكينا شو صار
ما حدا سألني شو كنتي جايبة لأم البنات
الصفيحة و المعمول جبتهن معي بعدين من لبنان
بس شو كنت جايبة بالأول
يلي صار يا حبيباتي
أني قلت لحالي يا بنت درت و فتلت بهالبلد..رحت المدينة و رحتي الريف
رحتي الفرات و رحت الجزيرة
مو لازم بهالحر و الشوب تطلعي شي رحلة عالساحل و تاخديلك غطة بالبحر..
أكيد بمنطقة الساحل في خبز و في عجين كمان
لا تصدقوا أنو في حدا عايش عاللحمة الفيليه و الخضر السوتيه طول عمره
المهم
توكلنا على الله و رحنا
و اختصارا" للوقت رحنا لمدينة اللاذقية عروس الساحل السوري
و أول ما وصلت و سألت عن أشهر شي بيعملوه لقينا خبز التنورو يلي هو قديم قدم التاريخ يعني من قبل الميلاد ...و وجدوا فيأقدم الأماكن التاريخية برأس شمرا آثار لفرن تنور قديم
و أصبح من التراث و الشعار القومي للمنطقة
و مازالوا محافظين عليه للآن حفاظا" على التراث
خبز التنور
فرن التنور بيكون مبني من الطين و تشعل النار على الحطب و الأغصان اليابسة
و دوقوا أطيب خبز و أطيب معجنات فيه
و هذا شكله ، ان شاءالله يكون واضح
و العجينة سهلة عبارة عن طحين+ماء+ القليل من الخميرة+ ملح
نعجن المواد حتى نحصل على عجينة طرية و نتركها تتخمرو ترتاح
كانوا زمان يعجنوا العجين قبل ما يناموا و يفيقوا بكير من صلاة الصبح .
مو متل هالأيام ما بتقوم الوحدة للضهر بيكون العجين حمض و فار
نرق العجين بالطحين و في له طريقة خاصة بيصيروا ياخدوا و يجيبوه بين ايديهمو يلصق بسرعة بحيط التنور من الداخل مو من برا
و بثواني بيكون الخبز الشهي جاهز
طيب بالبيت ما في تنور...ما هو الحل؟؟؟
في ناس بيستخدموا الصاج و لو مو متوفر متل حالتي نستخدم مقلاة التيفال
و بيطلع الخبز نوعا" ما متل الأصل
أولا" قطعنا العجينة كرات صغيرة.
تركناها ترتاح..
رقيناها
ثم خبزناها...
و هي الخبز جاهز لكل الحلوين
و طبعا" لما نحكي عن الأصل فأكيد نستخدم الطحين الكامل الحبة الأصلي
مو الأبيض يلي منستخدمه غالبا" و منفرح بلونه الحلو و هو ما في فائدة بالعكس بيضر
ألف صحة و هنا لكل الحبايب...
و من أشهر المعجنات بمنطقة اللاذقية بيعملوا,,,,
الترموسة
عبارة عن عجين محشو بالسلق
العجينة:
كيلو طحين
م ك ملح
م ك خميرة
ماء للعجن
الحشو:
سلق...بصل مفروم ناعم
ملح....سماق
الطريقة:
* نحضر العجينة و نتركها ترتاح
* نحضر الحشو:
نغسل السلق جيدا" و نفرمه، ما عندي صورته و هو كامل لأني جايبتو من الشام و مفرزته لوقت الاستخدام
نخلطه مع البصل و الملح و السماق الطازج الذي يزرع في هذه المنطقة
و و حبيتو تضيفوا شوية بهارات و حد
as you like
* نقسم العجينة نصفين و نفرد القسم الأول بشكل قرص دائري كبير
و نفرد الحشوة فوقه
القسم التاني من العجينة نرقه و نجعله غطاء للقرص
و الآن سنقوم بخبزه
طبعاط أهل البلد بيخبزوه بالتنور
بس يلي ما عند يا حسرة بيخبزه بفرن البيت
عادة يكون القرص أكبر
أنا عملت على قدنا
و بعدين نقطعه حسب الرغبةو نقدمه مع ألف صحة و هنااا
من الجنب التاني تحمر شوي
و عملت معه شوربة عدس
مممممممممم
******************
أيضا"من الأشياء التراثية هناك
الكبيبات
سهلة كتير
نصنع عجينة عادية بدون خميرة
طحين و ماء و ملح و نتسخدمها مباشرة بدون تخمير
و الحشوة أيضا" عبارة عن سلق و القليل من البصل
* نشكلها بشكل كرات بحجم البيضة
بيضة دجاج مو نعام
* نسلقها بالماء..
* عند التقديم نضع عليها السماق و الثوم
أنا عملتها بهالشكل و خبزتها عادي متل الفطاير
بناءا" علىرغبة الجمهور الكريم
ما حطيت الصورة النهائية لأني صورتها مع أشاء تانية و ما بينت منيح
المهم هذه هي
و ألف صحة و هناااا
*******************
و هيك رحلتنا بالساحل خلصت
و اذا الله راد و كتب نصيب بيكون عنا رحلة أخيرة لمنطقة تانية
الروابط المفضلة