كبيبة الرز المصرى
السلام عليكم ورحمة الله وبركاته
كيفكم يا حلوين
وحشتوووووووووووووووني
النهاردة جايبالكم الكبيبة المصري وحصريا
من مطبخ مامتي حبيبتي الله يخليهالي هيا وبابا يارب
ايوه عندنا كبيبة زي الشامي لكن دي بالرز
ان شاء الله تجربوها وتدعوا لست الحبايب وانا كمان بالمرة
علي فكرة يا بنات انا هيا هيا كليوباترة ب a او aa
عشان محدش يقول منقولة
انا مشتركة في اكتر من منتدي وبانزل مواضيع هنا وهناك والصور دي من مطبخ مامتي
عيزاكم يا قمرات تجربوها وتعرفوها للناس عشان تاخد شهرة هيا كمان
اشمعني الشامي يعني
الكبيبة دي مشهورة في المنصورة وميت غمر ودقادوس
واعتقد كل الدقهلية
ماما حبيبتي ورثتها اما عن جدة
وبالرغم من انها بقالها في القاهرة حوالي 50 سنة
الا انها لازم تكون من اكلات العيد وكل القرية نفس الموضوع كل البيوت بتعملها
وطبعا بنعملها علي طول لكن ست الحبايب ربنا يديها الصحة بتصر تعملها لينا بنفسها
وحبيت اعرفكم بيها لان اي قاهرية باعرفها بيها بتعجبها جداااااااااااااااااااااا
لانها مش مشهورة في القاهرة
ولو عاملاها في عزومة اول حاجة هيا بتخلص والكل بيشهد ليها
انا كنت عند ماما في العيد وعملتها وحبيت اصورها لكم بس اعذروني الصور مش كتيير
وان شاء الله انزل الفتة اللي عملتها معاها في موضوع منفصل
خلصنا حكاوي القهاوي وندخل علي المقادير الطريقة
المقادير مفيش اسهل منها
مقدار رز ومقدار زيه لحمة
يعني كيلو رز و كيلو لحمة
وبصلتين مبشورين وملح وفلفل اسود وبهارات لحمة
بيض وزيت للقلي
وبسسسسسسسسسسسسسسسسس
الطريقة
هنقلبهم علي بعض ونشكلهم شكل الكبيبة
ونرصهم في الحلة ونزودهم شوربة مغلية زي المحشي ونسويهم زي المحشي بالظبط
ولما تبرد احطها في البيض المضاف اليه ملح وفلفل اسود واقلي في الزيت الغزير
وبسسسسسسسسسسسسسسسسسس
ملاحظات
1- احتمال كبير تفك منك بعد التسوية لانك لسة مش متدربة
مفيش مشكلة شكليها تاني قبل القلي
المهم قللي الشوربة عن المحشي شوية عشان متكونش معجنة
2- ممكن تسويها بدون تشكيل ولما تبرد شكليها
اختي بتعمل كده
3- في ناس عندنا بصحنوا الرز خشن في المصحنة
ويضيفوا بقدونس ويسووها ويقلوها عادي
بس انا محبتهاش حسيتها بتسهبل
لاهيا كبيبة رز ولا كفتة رز
والاكل اذواق
في حاجة كمان انا مرة عملتها بعصاج ورز مستوي وكانت حلوة برده لكن بتاعة مامتي احلي لما بنسويهم مع بعض
انا اسفة يا بنات الصور اغلبها ضاع مني
بس لحقت الاتنين دول
هنا قبل القلي
انا عندي استعداد اكل الطبق ده بدون قلية وهيا دافيه طعمها خرافة
وهنا في البيض
وهنا الطبق النهائي
مقر مشة من برة وتحفة
الروابط المفضلة