** وصفة مبتكره **حدوة سلطة دجاج غير شكل مين بحب يسمع الحكايه
مساء الخير
كم مره أعملنا اكله وزاد منها شيء
مثلا دجاج مشوي او شاورما او غيره؟؟
من يومين كنت عامله شاورما دجاج وفضل منها للحشوه شيء بسيط
يعني ما بكفوا سندويشه
فكرت شو اعمل فيهم
يعني شيء اكله اعملها ويطلع منها نصيب لكل السنافر الي بالبيت
مشان ماحد منهم ينط متل الزنبرك ويحكيلي انا ما اكلت منها
في النهايه قلت سلطه
الصغار عندي بحبوا كتير السلطات وهذا شيء نادر عند الاطفال
فتحت التلاجه وشفت شو عندي خضار
خس
بصل اخضر
طماطم
خيار
بقدونس ونعنع
وكرفس
خسلتهم وقطعتهم وحطيتهم بالجاط وفوقهم باقي قطع الدجاج الباقيه من الشاورما
وفي صحن صغير أضفت ملعقه خردل"ماسترد" وعصير ليمونه وشوية ملح وزيت زيتون
خلطتهم كويس حتى صاروا متل المستحلب متجانسين وفورا فوق الخضره والجاج
حركنا كويس كويس وجبنا الكام ولقطتا صورتين للصحن لانه شكله عجبني كتير وفرحت فيه
وبعدين على الكروش الصغنونه الي عندي بالبيت والف هنا وعافيه عليهم يارب
وتوته توته خلصت حدوة سلطتنا لليوم
رد مع الاستدلال
كتبت بواسطة ديدي الكن
الروابط المفضلة