ما شاء الله دوما متألقة بكتاباتك
عودا حميدا اشتقنا لك
يوميات رائعة و لهجة اروع
مـتـابعينك

والله ماني عارفة كيف اعتذر عن تأخري..

شمالية ..يا هلا ياعمري ..

رائدة ..كلماتك في غاية العذوبة ..اخجلتني كثيرا فما انا الا هاوية مشغولة ..اتمنى لو اتفرغ ولو قليلا

للكتابة ..ادامك الله لي اخت مساندة وصاحبة في الجنة باذن الله ..

صدى ..صادقة ياختي ..مافي احد يتكلم زي الناس ..الكل صار كلامه ملخبط اخد من هنا ومن هناك..

اتذكر الكرويتة ..(ان شاء الله تكوني عارفتها) ..لاتفكريني بالحلاوة اللبنية اموت فيها .

ام سهيل ..توقعت منك دا التفاعل..بس قولي ليش ركبت اليوم للغدا ..ورتبت العبش والا قاعد مكركب ومقربع ..

سراب الليل ..ان شاء الله ماشي معاك الحال ؟؟

الجمان سعيدة بتواجدك..

دراوشة ..الله يسلم قلبك يا اختي ..ان شاء الله تنال اعجابك هذه اليوميات.

a&a ..اظن هده المرة ماراح تكون محزنة ..حاولت اجمع مواقف اجتماعية وطريقة التصرف في مثل هذه المواقف..

تسلمي على المدح ..الله يجزيك كل خير..

ترتيل ..اتمنى ان تنال استحسانكم ....جزاك الله خيرا على الاطمئنان ..

صدى ..الله يسلمك ..

جات سلفتي الاخيرة بعد ماندرت هوازن ..سلفتي دي سبحان الله انا وهي

مانتفق ..ومدري ليش تختار يومي وتجي فيه ..

_ السلام عليكم .

_وعليكم السلام يا حنان .

_كيف حالكم؟

_الحمد لله بخير كيف حالك انتي ؟ وكيف حال النونو؟

_ الحمد لله النونو طيب .
_ خالتي في ؟

_ ايوة في ..

_ طيب الحمد لله ابغاها في موضوع مهم.

دخلت حنان الحامل في اخر الشهور على ام جوزي مبسوطة وشكلها طايرة

من الفرح ..دخلت معاها على نياتي وياريتني مادخلت.

_ كيف حالك ياخالتي فتو؟

_ الحمد لله ..يامَنة كيف حالك انتي ؟ وكيف النونو؟

_ ابشرك يا خالتي ..دوبنا راجعين من عند الدكتورة وقالت لنا انه ولد

ونبغى نسميه علي على اسم عمي الله يرحمو.

قالت اخر كلمتين وطلت فيّ بنظرة الله يعلم بيها .. طيب مو انا ولدي اسمو

علي والا لازم من الغلاسة ..وكمان جوزها الله يصلحه ليش اختار دا الاسم .

_ طيب يابنتي حسن مسمي علي .. الله يحفظو.

_ لابس ياخالتي حسن مو مسمي الكبير ..وطلال قال لازم الكبير عشان

يشيل اسم الوالد مزبوط.

حسبي الله ونعم الوكيل ..يعني غلاسة على مستوى وتقليب في الماضي

الدفين.مرت علي ذكريات ولادة احمد زي الزفت قد ايش اتنكدنا ايامها

..الله يسامحك يا حسن ماكان سميناه علي وخلصنا ..شكلو عشان كدا الولد حالتو حالة.

_ ايوة يامَنة يابنتي..بس خلاص اليي سار سار .. وهما الله يسامحهم ماسمو الاول علي لكن سمو التاني .

الله يكافيكي ياحنان .. مو سمينا علي وفضيناها سيرة ..منك لله ياشيخة.

كان نفسي اقول الكلا دا في وجهها لكن تذكرت عمرو خالد وكلامو

واستهديت بالله وقمت من الغرفة .

شكلي راح اقعد طول اليوم في المطبخ .. من كتر خبطان الدم اليي ساير

اليوم ..متى يجي حسن ونتغدى ونفضها سيرة .

يوميات جميلة جعلتني اتعايش معها ...بارك الله فيك وجزاك الله كل خير .

اقول ياحرمة والله ياستي اليوم البزورة تعبوني وما ركبت الغدا ولا العشا قلت لهم خلينا ناكل لبة وجبنة .

هههههههههههههههههههه
والله سلفة ربيعة قوية ومستوية .

كملي ياغالية .

من يوم ماوصل حسن حطيت الغدا زي المفجوعة ..ولميت البزورة وقعدنا

على السفرة ..

حسن استغرب وقال :

_ في شي ؟

_ منتو جيعانين ..هيا الغدا.

ابغى اكروت الموضوع بسرعة قبل لاتعصب خالتي وتفتح الموضوع ويرتفع

عليها الضغط.. حسبي الله ونعم الوكيل..هدا ربي جازاني عشان اسأت الظن

في هوازن ..جاتني حنان بالحكاية دي.

اكلنا بسرعة واخدت البنات على الحمام عشان نطلع بعد ما اخلص المطبخ
الا خالتي نادتني ..ياربي ايش تبغى ..والله بدي ابكي.

_ ربيعة تعالي يابنتي..

_ نعم ياخالتي.؟

_ سمعتي ايش قالت مَنة.؟ يبغو يسمو علي .. ايش رأيك؟

_ على راحتهم يسمو علي والا محمد هو ولدهم.

حسن بحلق فينا .. _ علي في عينهم .. مو انا مسمي علي دحين يسيرو

الولدين بنفس الاسم ايش الهبل دا.

قعدت اغمز له واشر له بس مافي فايدة لازم يفتح علينا فاتحة ..ياربي ليش

دا الرجال كدا مخو تخين بعض الاحيان!!

ما ادري كيف لفيت الموضوع وقلنا انو اهم شي سلامة الام والبزرة وحسن

فهم بعد ماطلع روحي انه في مشكلة ورا الموضوع قال الله يرزقهم ولد سليم

ويرزقهم الذرية الطيبة.. وطلعنا ننام .

من يوم ماصكينا الباب سألني حسن _ ايش في؟

_ انا ادري الحرمة جات وقالت انها حامل في ولد وتبغى تسمي علي ..

وانو طلال قال لازم يكون الولد الكبير اسمو علي مايصلح الصغير.

_ طيب ليش الغلاسة والتفتيش في الماضي ديحن مايكفي اليي سار ايام جا احمد.

_ ايش عرفني ..الله يهدي ماخلق.. الله يخيلك خليني انام لحسن راسي قد كدا.

اسيرة الغربة ..جزاك الله خيرا.

ام سهيل ..اسكتي ياشيخة المركب قايمة قيامتو ..وانا خلاص كل ما اشوفو اندر واسيبو يخبط يرقع ..(ترى مو من جد)..والا الاكل اقولهم مو لازم كل يوم تاكلو صابح خلونا ناكل بايت ايشبو برضو نعمة ربنا.

والا الغسيل يا اختي شي يفجع تقولي عمرنا مالبسنا ..كل يوم احط كم فم والا فيه فايدة طول الوقت الغسيل متراكم في السبتان..

انت لساع ماشفت شي ..على قول اخت جوزي تقول هوازن زي الملوينة ..طول الصبحية دايرة..

حمورة
ما زلنا نتابع قلمنا النابض





الله يعينك..
أشغال البيت ما تخلص

وه يااستيتة الله يعينك على الغسيل على قولتك كانه عمرنا مالبسنا , اقول لك اليوم البزورة نكتوا البيت فوقاني تحتاني , بس الله يعين .

والله صادقة اخت زوجك .
اكملي نحن معك .

حمرة الورد عسى المانع خير ....الله يفرج همك ويجعل لك من كل ضيق مخرجا

وما زلنا ننتظر باقي القصه المشوقه