الله اكبر الله اكبر..
_ اصبحنا واصبح الملك لله ..

يوم جديد ..بدأنا على بركة الله .. كل يوم تمر علي الافكار والخواطر سبحان الله كيف

ننام وكيف نقوم !!..الحمد لله على الصحة .

ناديت حسن جوزي عشان يصحى لصلاة الصبح: حسن قوم صلي ادن الصبح.

_طيب ..طيب.

_دايما تقول طيب وبعدين تستنى الاقامة ..قوم الله يهديك.

قام يفرك عيونه ..وطل في الساعة ..وراح يتوضى.

كملت لفتي على البيت اصحي البزورة ..الله يهديهم متعبين مرة.

_رنا ..رنيم..قومو _الله يصلحكم _صلو…..

رحت اصلي انا كمان ..وارجع اشيك عليهم ..صحيو والا لا؟!

_صليت وخلصت صلاة وهدول لِساع نايمين..قومو يابنات ماتجو بالطيب..لازم من

المُناحلة ..قومو هيا بلا مجغنة.

اخيرا قامو ..الحمد لله اليوم ربوع يعني بكرة مافي نكد الصبح حق المدارس اليي راح يبدأ بعد شوية.

جاتني رنا في المطبخ وانا بأعبي الفطور : ماما ..ابغى بيض مطجن في السندوتش اليوم.

فرصعت عيني فيها استناها..!!

_:لو سمحت يا امي.

_ طيب من عيوني ياقمر.

_ ماما وانا ابغى جبنة بيضا ..لو سمحت.

_طيب يارنيم ..ياقمر.

رجع حسن من الصلاة ..جا من ورايا وسلم ..

_ ايش بها عيونك منفخة كدا ياعمري؟

_ مدري عنها ..ياربيعة شكلها الحساسية.

_لاتكون مسكت البسة مرة تانية…الله يهديك ياحسن.

ضحك وراح يلبس.

_ايش دا ياحسن بالله ؟ ايش تقول للبزورة .؟

_اقول الله لايجعلهم زي عندهم حساسية .

_ ايش تبغى تفطر؟

_شابورة وشاهي.

_وجبنة صفرا؟

_وجبنة كاسات كمان.

حطيت تبسي الفطور في الصالة ورحت بسرعة اساعد البنات في اللبس..وعبيت الفسح واخيرا وبعد ما انقطع صوتي قعدوا على الفطور.

_مــــــــــــــــــــــــــــامــــــــــــــــــ ـــــــا صحي احمد .

_الله يصلحك يابنتي.. ليش صحيتيه ..انا مو قلت لا تروحي غرفة اخوانك.

_انا مارحت ..رنيم اليي راحت ولعبت بالسيارة اليي تطلع صوت..

_ وانت خاتم بفصه وكل شي نرصه..كم مرة قلت لك بطلي لقلقة روحي افطري الله يهديك.

_تعال يا احمد روح الحمام ..وبعدين تبغى حليب وشابورة.؟

_ابغــــــــــــــــــــــــــــــى عصيـــــــــــــــــــــــــر ..اهئ

_تعال ياولدي اصبح..

_ يابنات هيا ..بسم الله خرجنا…وردو الاتنين بصوت واحد ..

_وعلى ربنا توكلنا.

_ في امان الله ..

درت وجهي على احمد اليي كان ماسك وصلة الشابورة ويزن ..

_متى تروح المدرسة انت كمان؟

يوميات رائعة..
أرجعتني 5 سنوات إلى الوراء..
على أرض مكة..
وأرجعتني 22 سنة أيضاً إلى الوراء..
إلى ذلك المكان الحبيب.. البلد حيث الأحياء القديمة..
وذكرتني بشخصية لطيفة أحببناها



ننتظرك

يا عيني يا عيني
شو هاليوميات الحلوة يا ام معين ..
بننتظر البقية لا تتأخري علينا

يوميّات رائعة....

بالإنتظار

**

رائعة ..
ننتظر البقية عزيزتي ..

احلى ساعات اليوم لما ينام احمد وافضى لشغل البيت شوية .. ما ادري ليش دا الولد نكدي كدا ..مو زي اخوه.

مالحقت اخد نفس بعد ماحط راسو على المخدة الا جرس الباب كأنو صاقعة .

جريت على الباب اشوف ايش ساير برة ..

طلعت جارتي الله يصلحها ..

نسيت اقولكم ..انا ساكنة في عمارة سكنية كبيرة مع سلايفي وام جوزي ..والعمارة

مليانة عجايب ..جارات من كل اصناف البشر .حتى اني مرات اقول كيف عايشين هدول الاوادم!!

المهم جارتي اليي على الباب من صنف الاوادم اليي مدري كيف عايشين.

_صباح الخير ياربيعة.

_صباح النور ياهوازن.

_ايش قاعدة تسوي ياحرمة امشي انزلي معانا عند نهى ..

_ لاشكرا عندي شغل كتير اليوم.

_كل يوم عندك شغل كتير متى يحن عليك حسن ويجيب لك شغالة.

_وانت كل يوم تجي تعزيمني على جمعة .

كملت في نفسي ولا عمرك عرضتي علي مساعدة.

_على العموم على راحتك كنت ابغاكي تتسلي بس.

_ لاشكرا انا مرة اتسلى في شغلي مالي بأشغال الناس.

_طيب مع السلامة.

سبحان حتى مابقت لي نفس ارد عليها. ماصدقت انها خرجت وفضيت للمطبخ ..

بسم الله ما شاء الله

يوميات أكثر من رائعة و لهجة جميلة

بأنتظار البقية

صدى ..اختي العزيزة ..

اشتقت لذلك الموضع من الارض مثلك تماما ..يظهر انا تغربنا في نفس الوقت.

وحشتني ستي ماعاد في غيرها يتكلم مكاوي قح ..في العيلة.

اسعدني مرورك..

يا مرحبا بالدنادن كلهم..كيف احولك ..اشتقنالك والله ..

لسة ماشفت شي اصبري علي اكمل ..

سمية ..عروبة ..انتظروني.

بوسي ..انت لسة شفت حاجة..بس اذا في اي كلمة مافهمتيها لايردك الا الكي بورد..

روعه روعه


متابعينك

ها قلم ام معين ...يعود علينا من جديد ...بيحله رائعه ...بيوميات اروع ...باسلوب جميل ... وبيلهجه اجمل ...

في كلمات وأحســــــاس يتملك القارىء...وهو صـدق المشــــــاعر النابعه من القلب....وكأننا نشاهدها بيشاشه

كبيره ...من هذا الابداع الرائع.... فدمت ودام قلمك المبـــــدع....وبصراحه لا اخفي ....اعجابي بكل ماتكتبي

لنا .... من خيالك الواسع ...ياأختي الغاليه ام معين ونحنوا في انتظارالبقيه احر من جمر ...