صباح الخيرات ع الحلوات

لعشاق أشعار الأمير خالد الفيصل

أتمنى اني أخترت الجميل من أشعاره كي تطرب أسماعكم....



الله أكبر كيف يجرحن العيون
******كيف ما يبرى صويب العين أبد
أحسب إن الرمش لى سلهم حنون
******اثر رمش العين ما يأوي لاحد
يوم روّح لي نظر عينه بهون
******فزّ له قلبي وصفق وارتعد
لفّني مثل السحايب والمزون
******في عيوني برق وبقلبي رعد
نقّض جروحي وجدّد بي طعون
******قلت يكفي قالت عيونه بعد
وانعطف هاك الشعر فوق المتون
******وانثنى عوده وقفّى وابتعد
أشغلتني نظرة العين الفتون
******حيرتني بالتوعد والوعد
هي تمون العين وإلا ما تمون
******لى خذت قلبي وقفّت يا سعد

****************************

خذاك الزمن مني وترك لي أشواقي
ليته خذا ذكراك من كل أوراقي
الصهد ولّع حياتي ليتها لمعة قمر
تذكر أيام القمر؟كيف السمر أصبح سهر؟
كيف الأماني.. أصبحت شكوى عمر؟
ليه انطفى فيك الزمان؟
ليه اختفى فيك الأمان؟
خذاك الزمن مني
يا روعة أيامي ولوعة حاظري
يا بهجة الخافق ومتعة ناظري
تذكر الحب الأمل ؟
قبل يصبح ذكريات
تذكر الفرحة.. ولهفاتي عليك؟
أسبق الموعد إليك
ولحظة الشوق الكبير
والخفوق اللّي من الفرحة يطير
ورقصات الدقائق عند الوعد
وهمسات الحقائق قبل وبعد
ليه انطفى فيك الزمان؟
ليه اختفى فيك الأمان؟
خذاك الزمن منّي

***************************

أستطيع أمنع لساني لا يقول
******وأستطيع أمنع عيوني لاترى
وأستطيع أمنع يديني لا تنول
******وأمنع أذني عن سواليف الورى
لكن المشكل أنا وشلون احول
******دون فكري لو خيالي به سرى
شارد أفكاري على رغمي تجول
******كل ماعنّ الهوى وإلا طرى
كل نجمٍ للخيال أصبح ذلول
******بالفلك طوّاف لى ضاق الثرى
شاغلي يا راعي الطرف الخجول
******باع حبك في خفوقي واشترى
يا ربيع القلب في كل الفصول
******ورد حبك فاح عطره وأزهرا
مرّني طيفك على العادة عجول
******عز طيفك مثلما عز الكرى
ما نفع تحذيري القلب الجفول
******يرقد الخالي وعيني تسهرا
بسألك قلّي- ولو فيها فضول-
******كيف تذبح من يشوفك ما درى؟

******************************

تعال أسهر معك يا اسمر عشيّه
*****تعال أسلّي خاطرك يا عيوني
تهنّ وخلّ عيني بك هنيّه
*****أنا وإياك والدنيا تهونِ
ترى الدنيا لياليها شقيّه
*****حذاريِ تستبد بك الظنونِ
نويت وكل قلبٍ فيه نية
*****على إني لك وفي روحي تمونِ
هواك بخاطري سوى سوية
*****تركني بين أياديك معنون

********************************

يا وش بقى بأعطيك منّي ولا جاك
*****ما باقي إلا روحي أحيا بها لك
أوصف جمالك كل ما أنشدت وأهواك
*****وازيّن أيامي بجلسة خيالك
يا الغايب الحاضر بقلبي ولا ألقاك
*****أقرب من عروقي وصعبٍ منالك
شالك زماني عن عيوني ووداك
*****لا شك وثّق في ضلوعي حبالك
يا حاجبٍ شمسي ورى ليل جفواك
*****ما بالعهد بك قاسيٍ في دلالك
وش غيّرك يا منوة القلب و أطغاك
*****على حبيبٍ ما تخيّر بدالك
دنياي ما تصلح بلا شمس دنياك
*****والليل يوحش لو تغيّب هلالك
ما ينقطع ظما الهوى إلا على ماك
*****ولا يهوّن حره إلا ظلالك
ولا تشوف العين زينٍ بليّاك
*****ولا يطرّب سمعي إلا مجالك
ولا انتفض قلبي من الحب لولاك
*****ولولاك ما يبدي علي مابدالك

****************************

ما هو صحيح القلب للقلب شاهد
****لو هو صحيح أصبحت مفتون فيني
بيني وبينك حب من قلب واحد
****ليته يجيك من الهوى ما يجيني
وليتك تعرف الشوق لى صار واجد
****وليتك تعرف أوجاع كثر الحنينِ
ما قد شكيت الحر والجو بارد
****ولا سهرت بليل طول السنينِ
ولا مشيت العمر والحظ قاعد
****ولا تحديت الألم والونينِ
أضحك وأنا لجروح الأحباب جاحد
****أداري المكنون عن كل عينِ
ما ودي أفرّح على القلب حاسد
****وإلا عذابي في عيوني يبينِ
شيٍ يهون وشي بالحيل كايد
****يا كود تجريح الخفوق الحزينِ
من عانده وقته وقلبه يعاند
****مالت به الدنيا يسار ويمينِ
غرّتني أمثال العرب بالشواهد
****يبيك قلبي وأحسب إنك تبيني

****************************

يا قصيدة عمري الّلي تكتبيني
***** كل يومٍ حرف من نغمة هواك
ارحميني بالهوى وإلا اذبحيني
***** لا تخليني معلّق في سماك
كل ما خذتي عمر منّي عطيني
***** لحظةٍ من ساعةٍ داخل حماك
الحياة أشوفها والموت فيني
***** واعذاب الّلي بغاك ولا لقاك
يسهر الليل وقمر طيفك بعيني
***** والشّعاع الصبح يوقظ بي رجاك
إن حدا حادي تولاني حنيني
***** وإن عرض طيفك على طرفي بكاك
كيف هذا من هوى قلبي يجيني
***** يا أرقّ الناس قولي وش دهاك
لو تماديت بملامي سامحيني
***** كم تماديتي بذبحي من طغاك

*****************************

مرتاح أحبّك ولا علّمت
****** حتى انت عيّيت أبين لك
والبارحة يوم أنا سلّمت
****** شكّيت لو عيني تدلك
برقٍ لمع بالعيون وخفت
****** مواجع القلب توصل لك
عساك في ناظري ما شفت
****** كيف المعاليق يومن لك
من خوفتي لا احترق جنّبت
****** هربت من شمسك لظلك
أخشى عليك الهوى لو طحت
****** ما تلني يمّك يتلّك
أبي قليلك ولا حصّلت
****** بعضك تركني مع كلّك
ما ادري صواب أو خطا ما قلت
****** إنّك حبيبي وأنا خلّك

***************************

يا مدور الهين ترى الكايد أحلى
***** أسأل مغنِّي كايدات الطروقِ
الزّين غالي لكن الأزين أغلى
***** ولكل شرّاي بضاعه وسوقِ
النّو عالي والسما فوقه اعلى
***** لى فاق علمٍ جاه علمٍ يفوقِ
الصّعب هلّى قلت يا صعب سهلا
***** دامك تبيني فانت يا صعب شوقي
أحب أعسف المهرة الّلي تغلّى
***** وأحب أروض كل طرفٍ يموقِ
وأحب أسافر مع سحابٍ تعلَّى
***** وأحب فوق الغيم لمع البروقِ
وأحب أساهر بدري الّلي تجلّى
***** وأرسم شعاع الشمس عند الشروقِ
يا من على ثاير فوادي تولّى
***** خلّك على قلب الكرامة شفوقِ
أكرم عزيزٍ بالعمر ما استذلاّ
***** يسوق عمره للمشاريف سوقِ
إخترتك من الناس للقلب خلاّ
***** يا حيثك مرادي وكيفي وذوقي
ما رحت أدوّر كل زولٍ تحلّى
***** لولاك تسوى ما عطيتك خفوقي

******************************

يا عيونه بس يكفيني عذاب
****** بالذي ودّك تقولينه دريت
كل ما قلتيه عندي له جواب
****** إقري عيوني مثل ماني قريت
يا ذهاب العمر عمري في ذ هاب
****** القوي الله فلكن ما قويت
ما بقى لي قلب منك القلب ذاب
****** بيّن حالي ولوني ما حكيت
كل ما قلت انفتح لي فيه باب
****** دار حظّي وانقلب عمّا نويت
دوك شيبي لاح في حل الشّباب
****** كلٍ بحظه وأنا بحظّي شقيت
*********************************

مشكوووووووووووووووووووووووووووووره اختي قيلوله
احب اشعاره مررررره وكل شعره رووووعه خاصة هالبيت له ذكرى حلوه ..
إخترتك من الناس للقلب خلاّ
***** يا حيثك مرادي وكيفي وذوقي
ما رحت أدوّر كل زولٍ تحلّى
***** لولاك تسوى ما عطيتك خفوقي

وكمان هالبيتين اعيش جو معاهم ..
وأحب أسافر مع سحابٍ تعلَّى
***** وأحب فوق الغيم لمع البروقِ
وأحب أساهر بدري الّلي تجلّى
***** وأرسم شعاع الشمس عند الشروقِ
يا من على ثاير فوادي تولّى
***** خلّك على قلب الكرامة شفوقِ

*****************************
مرتاح أحبّك ولا علّمت
****** حتى انت عيّيت أبين لك

*يالله رووووووووعه
تسلمين ياقيلوله على هالابداع ..

قيلولة هادئه ما عندك اشعار ل عبدالرحمن المساعد او حامد زيد

مشكوووووووووووووووووورة عالموضوع

مشكوووووووووووووووره ...................قيلوله.
صح لسان الشاعر.
لكِ تحياتي