رسالة إلى من كانت يوما حبيبتي
ياللي كنتي في يوم حبيبتي وكل دنيتي ... وأملى ويأسى وسبب شكوتي
بكتبلك مش عشان أجدد قصتي لا .... عرفت بداية حبك الجديد
بعدت ........... وقولت يمكن من بعدى يعيش قلبك سعيد
و النهاردة عرفت النهاية وقولت ليه أفضل أنا بعيد ؟
قوليلي ليه حيرانة وبتقضي ليلك سهرانة
بوحي وقولي عن سر عذابك أنا خايف يدبل زهر شبابك
و تندمي وبأية يفيد الندم لما يدق الألم بابك
إحـــــــــــــكي .... إحكي بس اوعي ف لحظة ضعف تبكى
أنا زيك كنت عاشق مسكين وكنت بقضي الليل حيران وحزين
وكلنا يا حبيبتي عشاق مساكين في الحياة عايشين
مش عارفين منين بدأنا ولا على فين رايحيين
دنيا ...... دنيا بتحير فينا ثواني تفرحنا وسنين تبكينا
فاكرة .........فاكرة لحظات جميلة كنا بنسلبها م الزمان
ولما مات ضميرك رميتيها في عالم النسيان
وروحتي إنتي للجنة و فوتيني أنا للهوان
كنتي فاكره الجنة باقية لا لا لا
يا حبيبتي الجنة عمرها مادامت لحبيب غدار
وأنا حبيتك وأخلصت إزاي تدوم ليا النار
حياتنا بعد ما فاتها الإخلاص صبحت مرار
علمتينى إزاي أحب واسهر واشتاق
علمتيني إزاى أدوب في قلبي الأشواق
بس معرفتيش تعلميني الأسية
ولا إزاي يهون حبك عليا
كنتي تقسي وأنا كل يوم بزيد حنية
مش غريب إن حبيبك هجرك
ولا اقدر أقول إن ده كان قدرك
قدرك يا غالية كان بين إيديكى
وبكلمة وداع رمتيه وهان حبك عليكى
إللي باعك .....إشترتيه
وإللي شاريكي ليه بعتيه
يا حبيبتى.... إللي باع حبه مرة سهل انه يبيع مرتين
بس إللي عاش عمر واحد إزاي يقدر يعيش اتنين ؟
مع أرق تحيـــــــــــــــاتى
الروابط المفضلة