السلام عليكم ورحمة الله وبركاته
اخواتى الحبيبات كيف حالكم بكل اللغات بعد ردودكم الجميله على اعمالى فى الموضوع الاول احب اقولكم انكم شجعتونى جدا انى اصور شويه كمان وافرجلكم شغلى المتواضع ربنا يارب يباركلى فيكم جميعا كلماتكم لى شهادة تقدير
نبدأ ببسم الله الرحمن الرحيم
دى اباجوره باظة وكان شكلها حلو وكان صعبان عليا انى اركنها او ارميها قولت استفيد منها واعملها شمعدان بحيث انى احطلها شمعه كبيره من فوق واغير شكلها الخاريجى واعملها ديكوباج من الكلينيكس المناديل الورقيه .
ودى شنطه من الخيش ومن تصميمى من طقطق لا السلام عليكم
ودا شكل الشغل من قريب للورده .
ودى طبعا علبة مناديل زى ما انتم شايفين والمفاجأه برضو انها من اناملى طبعا العلبه فصلتها عند النجار رسمتهاله واديتلها مقاساتها وجيبت شرائح النحاس والرسمه بتاعت عنقود العنب والورق وواحده واحده لغاية ماوصلت للنتيجه دى معلش مش اوى بس عشان اول حاجه اعملها من اشغال الحفر على المعدن وطبعا زى ماقولتلكم كله من دورات المنتدى بتعلم منكم كل حاجه جزاكم الله كل خير كل اللى ليها موضوع مفيد فى المنتدى يجعله ربنا فى ميزان حسناتها .
ودى صوره تانيه اقرب شويه عشان انا الرسمه عندى كانت عباره عن ورقة العنب ملتصقه فى العنقود بس ففكرت انى ارسم على الشرائح النحاسيه عود يشبه ساق شجرة العنب عشان اكمل بيه المنظر فطلع شكله مش بطال يدل شويه على انه ساق شجرة العنب بجد هو انا تخيلته كدا ورسمته وزى ماتيجى تيجى.
وبالنسبه لدى انا اصلا مش بعرف من زمان من ايام التدبير المنزلى امسك ابرة الكيروشيه بس من كتر ماشوفت اعمال بتاخد العقل قولت اضرب نفسى على الابره الكبيره بتاعت الكيروشيه اللى بيعملو بيها الشنط واستخدمتها مع خيط الشنط وخلصتها الحمد لله بس لسه برضو ايدى مش قادره تتحكم فى ابرة الكيروشيه الصغيره بس معلش واحده واحده وربنا يسهل واقدر استعملها عن قريب.
ودى بقى شجرة من الخرز عملتها لماما هدية عيد ميلادها بس الصيف اللى فات قبل موضوع اختنا الحبيبه ست الحبايب اللى اللسان يعجز عن وصف جماله وابداعه يعنى الشجره دى فكرت فيها تحت بند او مثل الشاطره تغزل برجل ............. ههههههههههههه على راى ماما بقى
ودى عشان تشوفو القاعده شكلها ايه بالظبط
ودى واحده تانيه لاختى عشان ماتزعلش بس اصغر طبعا شويه من بتاعت ماما
ودى ورده بقى على الماشى كدا عملتها من الخرز وفى مجموعه تانيه بأشكال مختلفه وبرضو كلهم اتعلمتهم من دورات ومواضيع كل الاخوات فى المنتدى
يارب تعجبكم اعمالى ولو برضو عجبكم الشغل اصور التانيين وانزلهم تتفرجو عليهم وتقولولى رأيكم اكمل والا اقف على كدا وأسأل الله لى ولكم كل الاعمال الصالحه
والسلام عليكم ورحمة الله وبركاته
الروابط المفضلة