اخواتى الحبيبات
اليوم بشرح لكم الدرس التانى لتعليم التطريز بالخرز (للمبتدئين )
وان شاء الله يكون سهل عليكم .تابعوا معايا بالصور والخطوات
الغرزة المرة دى سهلة خالص مجرد رص خرز بالعدد مع الرسمة المرسومة
اولا نرسم رسمة على الخامة اللى عاوزين نطرز عليها
تكون رسمة بسيطة علشان المبتدئين ما تكونش صعبة عليهم
نبداء نحددها باللون الاسود ( الطريقة )
نحط فى الابرة 4 خرزات ونقدر مسافتهم حسب طول الخرز على الرسمة ومن جنبهم نحط اربع خرازات تانى لحد ما تتحدد لنا الرسمة كلها والصور هتوضح اكتر ان شاء الله .
وبعد ما نحدد اول اطار نبدا بالحشو بنفس الطريقة بلون تانى .
هنفضل ماشيين صف صف لحد ما نملى المساحة كلها بالحشو ونراعى ان تكون المسافات ضيقة قوى علشان مش تبان فواصل\ تكون الخطوط كلها مترابطة كانهم قطعة واحدة
وكده نكون خلصنا حشو اول دائرة
شفتوا بقا الدرس سهل ازاى علشان خاطر عيونكم
ونكمل باقى الرسمة بنفس الطريقة
ونفس الطريقة فى الخطين اللى على الجناب نحددهم بالاسود وفى النص نعمل صف باللون الفاتح
كدا تكون خلصت الرسمة بتاعتنا
نبدا بقا نعمل الشراشيب فى اخر الدائرة
وطريقة عملها هنلضم خيط فى الابرة ونعقد الخيط عقدة متينة وكبيرة فى الاخر ونرص خرز بالترتيب باللون اللى احنا عاوزينه ونخيطها فى الرسمة واحدة ورا التانية ونراعى ان تكون المسافات متساوية والطول متساوى .
ده شكل الشراشيب
ونبدا نخيطها واحدة جنب واحدة وكل مرة نكرر نفس الطريقة
وده هيكون الشكل فى النهاية
اتمنى ان يكون الدرس سهل عليكم واكون قدرت اوصل لكم المعلومة بشكل مبسط
واى اخت عندها اى سؤال من عنيا .
واحب اضيف ان طريقة رص الخرز دى طريقة سهلة وتنفع فى كل الرسومات وتنفع فى التطريز على كل الاقمشة
بس اهم شىء ضبط المسافات وعدد الخرز
ونوضح اكتر بالصور وشكل رسومات علشان نستفيد اكثر
وبما ان طريقة لف الخرز دى سهلة
ازود لكم غرزة جديدة
اسمها الجدلة او المجدولة وهى بتكون زى الضفيرة هقول لكم فكرة عنها واشرحها بتوسع اكتر فى الدرس القادم ان شاء الله
(جدائل الخرز )
او ( سلسلة الخرز )
ده بيكون شكلها وهى انواع فى منها العريض ومنها الرفيع
فكرتها انك تعدى 6 خرزات فى الابرة وتخيطيهم فى القماش وتطلعى الابرة من جنب الخرزة رقم 3 فى النص وترجعى من جديد تعدى 6 خرزات . هى صعبة شوية بس ان شاء الله اشرحها لكم اكثر اذا ما كان شرحها واضح
دلوقتى هعرض لكم بعض الصور والافكار اللى متنفذ فيها الدرسين اللى اخدناهم
غرزة قشرة السمك وغرزة لف الخرز ونشوف الرسومات وازاى نفذنا عليها الغرز دى
علشان نوضح اكتر
دى طريقة رص الخرز ممكن تتنفذ باشكال وافكار كتير
ودى طريقة قشرة السمك الدرس الاول
مع طريقة رص الخرز الدرس التانى
يعنى كل ما نتعلم غرز اكثر نقدر نجمعها فى عمل واحد ونفذها بافكار كتيرة .
وكده وصلنا لنهاية الدرس التانى
واتمنى اكون افدتكم
وحابة تشاركوا معايا باعمالكم وتطبقوا الدروس
وانتظرونى ان شاء الله فى الدروس القادمة
واسفة على الاطالة
اختكم فى الله
poseecat
رد مع الاستدلال
السلام عليكم
الروابط المفضلة