ღ♥ وصفة مصورة ღ♥ اسرار طريقتى فى صنع مربى الفراوله وبالصور
السلام عليكم ورحمة الله وبركاته
اكيد كلنا بنحب نستغل موسم الفاكهه او الخضار علشان نستفيد بسعرها المناسب وكمان تبقى حاجه عمايل ايديكى عارفه اولها من اخرها
يعنى نضرب عصفورين بحجر
ترضى جوزك وتوفريله وكمان تاكلى عيلتك منتجات نظيفه من صنع ايدك
اليوم حبيت اقدملك طريقه صنع مربى الفراوله
زمان كان ليه معاها حواديت
مره تبقى سايبه وعامله زى الشوربه ( فراولة اليومين دول بتنزل ميه كتييييييييييييير ) ومره سكرها عالى وتموع النفس
لكن من السنه الماضيه جربت طريقه والحمد لله ظبطت معايا وجربتها كمان السنه دى وبرضوا تمام التمام
قلت يبقى لازم انزل وصفتها الكل يستفيد
اولا المقادير
بنحتاج ثمار فراوله سليمه من اى عطب بعد الغسيل وازاله العنوق ( كيلو ونص )
كيلو سكر وربع ( كتير بيحط على كل كيلو فاكهه كيلو سكر ) صراحه انا مش بحبها مسكره
باكو جيلى فراوله
عصير ليمونه ونص
حله استانلس ستيل او تيفال ( امهانتا دايما ينبهوا ليها يمكن علشان الفراوله مليانه بالحديد بيخافوا الحلل العاديه تتفاعل معاها )
وطبعا ملعقه خشب او بلاستيك
الطريقه
بعد غسيل الفاكهه ونزع العنوق ووزنها
بقطعها الى قطع ( صراحه فراولة اليومين دول كل حبه مقاس ) كده احسن تتقطع
وتوضع فى الحله او علبه بلاستيك كبيره طبقات سكر وطبقات فراوله
تترك حوالى ساعه ونص الى ساعتين تنزل ميتها والسكر يدوب
هنا بعد ساعتين مع السكر شوفوا نزلت ميه كتير ازاى
ترفع على النار عاليه فى الاول حوالى نص ساعه ولما نلاقى السكر داب نضيف عصير الليمون
نقلب دائما اوعى تغطى حلة المربى فى اى مرحله من المراحل تفور وتبهدل الدنيااااااااااا
بعد النصف ساعه نصفى الفراوله ونتركها جانبا وناخد الصوص وعلى النار مره اخرى
( الخطوه دى علشان الفراوله متتهريش كتير )
دى الفاروله المصفاه
نضع الصوص على النار ونستمر فى التقليب مع مراعة ازاله الريم كلما احتاج الامر وفى نص المده نضيف الجيلى ونقلب
وتترك على النار حتى نشعر ان الصوص اغلظ القوام
بعدها نرجع نضيف الفراوله للصوص على النار وتترك تغلى نص ساعه كمان
ترفع من النار وتترك لتبرد
الصوره دى بعد ما تركناها تبرد
توضع فى البرطمانات النظيفه المعقمه
ونتاكد اناها بارده تمام وتغطى وتحفظ بالثلاجه
وبالف هنا وشفا
رد مع الاستدلال
كتبت بواسطة جَنى
الروابط المفضلة