صباح الخير صبايا حمعة مباركة للجميع
امبارح رحت على السوق وجبت معي كلاج نابلسي معتبر
بمناسبة انه اولادي الحمد لله جابو الاوائل على صفوفهم
وحبيت احلي الكل بهاي المناسبة
طبعا بدي احكي شغلة انه الكلاج النابلسي بختلف كليا
عن الكلاج الا بدول الخليج
لانه الكلاج النابلسي بنعمل من السميد
والكلاج اللي البنات بستخدموه معمول من الطحين
واحنا العجينة اللي بتنعمل من الطحين اسمها عجينة بقلاوة
وبتنحشى مكسرات
وبصراحة امبارح استحيت اصور متل مابدي لانه كانو عنا اهل زوجي
حتى مالحقت اصور الطبق النهائي من كترهم ماشاء الله
لانه عنا افواه وارانب هههههه
كلهم بحبو الكلاج عنا كبير وصغير
انا بحشيه دايما جبنة نابلسية
بس في ناس بتحشيه لوز وجوز وصراحة انا ما حبه الا بجبنة
هلأ حتى الكلاج نفسه لازم تجيبيه من محل معروف
وانا ما بجيب الا من محل كلاج عمر يا ام ماهر خخخخخخ
عشان ما شاء الله عنها ام ماهر كانت ساكنة بنابلس
وعارفة وين المحلات المنيحة
هاد الكلاج بضل طري كتير ومتل الحرير
بينما في كلاج بكون يابس ولما تلفيه وتقليه بتفتفت وبتكسر
اسفة طولت عليكم واتفضلو هاد شكله الكلاج شوفو كيف مبين
انه معمول من سميد
وطبعا بيجي مدور وانا بقسمه لارباع وكل ربع بقسمه من النص
شايفين كيف انا بقصه بمقص المطبخ وبصير شكل العجينة متل الكروسان على شكل مثلث وبحشيه جبنة نابلسية منقوعة طول الليل وبعدين بعصرها وبحط شوية سكر وبفركها بايدي
طبعا ما تنسو تدهنو الحبة بشوية سمنة بالفرشاية عشان تسكر وتطلع طرية
وهاي صورتهم بعد ما خلصت لفهم اسفة الصور مش واضحين لانهم سرقة ههههه
طبعا في ناس بتشويه انا بصراحة بحبه مقلي بطلع كتير طيب
بس ازا عاملة كمية كبيرة شوي اريحلك لاني امبارح راح ضهري وانا واقفة
وهون صورتلكم صحني لانهم ماشاء الله كانو ملحقين علي وانا بقلي [/CENTR]
وهون كنت عاملة اكم حبة اصابع محشية فستق حلبي ومية ورد وحطيت عليهم معلقة قطر من اللي عملته وهاي العجينة عجينة البقلاوة
صاره يعملوها الحلونجية بنابلس ويبيعوها ببكيتات وبتكون مقسمة مربعات صغيرة
وبصراحة طعمها كتير زاكي وبتقرش بس غلبتني شوي لانه رقيقة كتير وبدها انتباه
هلأ بدي اعطيكم مقادر قطر مزبوط مية بالمية وبكون لا جامد كتير ولا خفيف
3 كاسات سكر
كاستين ماء
وشوية عصير حامض
هيك بطلع تمام
وانا جايبتلكم صور حلو مشهور كتير بنابلس اسمه زلابية (الحلاوة الموسمية)
هاد الحلو انا بموت فيه لانه كتير كتير زاكي
وهو معمول من القرع العسلي
وبكونو معاه خبز مقلي اسمة زلابية
وبصراحة نفسي اعرف كيف بنعمل
بس مرة وحدة من الخوات المصريات اعطتني طريقة لمربى القرع
بس صراحة ما بعرف ازا هيك بعملو بنابلس ولا لأ
وعلى فكرة في ناس بحكو للعوامة زلابية
بتركم مع الصور وان شاء الله باقرب فرصة بجبلكم الطريقة
شوفو ما احلى شكله هاد صورته عند الي عمله امبارح
وهاد هو الزلابيه وبنتحط الحلاوة(القرع) بقلبه وبلفوه متل الشورما
[CENTER]وهاي جبتلكم اياها من احد المواقع
بتمنى موضوعي يعجبكم
في امان الله
ღ♥ وصفات متميزة ღ♥ الكلاج النابلسي من مطبخي ومعاه شوية حلويات نابلسية اتفضلو ......
رد مع الاستدلال
كتبت بواسطة أم مــــالــــك
الروابط المفضلة