السلام عليكم ورحمة الله وبركاته
من زماااان ماكتبتش موضوع جديد كسل سامحوني
بس النهاردة بقى هعوضكم بحاجة مميزة للصيف والحر اوووووووف من الحر
كريم كراميل بطريقة جديدة جدا أطلب فيها براءة إختراع
ميزتها نفس طعم اللي معمول في الفرن بس من غير فرن
وطبعا أطعم من الجاهز بكتييييييييييييييييييييييييير
المقادير
3 بيضات
نص كيلو لبن أو 2 كوب كبير
السكر حسب الذوق بس طريقتى بضيف 5 ملاعق كبيرة
الحاجة الجديدة
ملعقة كبيرة جيلاتين مذوب في 3ملاعق كبيرة ماء
وطبعا فانليا كافية لتغطي على زفارة البيض الكمية تتوقف على نوع الفانيليا المستخدم سواء قوية او ضعيفة
وللكراميل
تحرقى كوب صغير من السكر ولما يتحول لكراميل ضيفيله ربع او اكتر شوية من الماء بحيث يمكنك أن توزعيه على القوالب اللي انتى عايزاها براحتك
(ده كمان اختراع من عندي عشان طبعا مستحيل تحطي السكر وهو سخن في القوالب البلاستيك والا هتسيح ولو استنيتى لما يبرد هيتجمد ومش هتعرفي تعملي بيه حاجة غير انك تسيبيه في نفس الإناء اللي عملته فيه)
الطريقة بقى ياحلوين نعمل الكراميل ولما يبرد نوزعه على القوالب بتاعتنا ونسيبه
نيجي للكريم
نغلي اللبن ونكون مجهزين التلات بيضات في شاف الخلاط ومعاهم السكر ال5 ملاعق والفانليا ونصب اللبن المغلي على البيض والخلاط شغاال اول مايدوب السكر اطفي علطوووول لاتطولي في الضرب عشان مش تتكون فقاقيع هواء في الكريم
نرجع الخليط مرة تانية على النار ونقلب بهدوء ونستمر بالتقليب حتى تظهر فقاقيع على السطح ويتخن المزيخ اول ماتشوفي فقاعة طفي النار ولا تطولي عليه
نستنى شوية مزيج اللبن والبيض يبرد حبة يعني بعد 3 دقايق كده بعد مانزل من على النار
نضيف الجيلاتين المذوب بالماء للمزيج بس نتأكد من ذوبان الجيلاتن كويس بس نقلب كويس ونوزعه على القوالب
بعد نص ساعة كده دخليه التلاجة
بعد ساعتين تلاته هتلاقيه تماسك وبقى زي الجاهز بالضبط
بس طبعا أطعم وانضف ومغذي أكتر
وبالهنا والشفا
شوفوا بقى الصور
الروابط المفضلة