السلام عليكم ورحمة الله وبركاته
تورتايه حلوه اكلها مفيش اسهل منه
وقفتها اتقطم ظهرى فيها
نتيجتها كأنى داخله امتحان سنويه عامه والحمد لله اقدر اقول ان نتيجتى كانت فى الطعم 100 %
وفى التزين للمرحله اللى قبل الاخره كانت عاليه جدا وجت فى الاخر اتشحورت
وفى طريقة الاداء 98 %
الوقتى اقولكم ان التورته ده هى تورتة موس الشوكولاته من محل الحلوانى مباشرة اليكم
اولا عدد الطبقات اربع طبقات
اول طبقه هى السبونش كيك
المقادير
4 بيضه
3/4 كوب سكر
3/4 كوب دقيق
1/2 باكت بكنج بودر
الطريقه
خفق البيض والفانيليا جيدا
ونضيف الالسكر مع الخفق الى ان يصبح غليظ ويضاف الدقيق والبكنج بودر والتقليب الخفيف ونضعه فى القالب بعد دهنه بزبده ودقيق
الخطأ اللى عملته
انا كنت عايزه اعمل تورته على شكل قلب وخطئى انى سويت الكيكه فى قالب القلب ونسيت تماما انها ليها كشه
يعنى حتكش عن مقاسها
فكان ممكن اعملها مدوره عادى خالص
وبعد السوا والتبريد اقطعها بقالب القلب
وهى ده الصوره
ثانيا الطبقه التانيه والتالته والمكونات الاساسيه وحده
وهى طبقة الموس
8 اصفر بيض
150 جرام سكر
2 م ك ماء
2 م ك جيلاتين
1/2 كوب ماء دافىء
الطريقه
نخفق الصفار لمدة 10 د
وفى اثناء الخفقان اضع السكر والماء على النار الى ان تصبح كرمله خفيفه بيضه وانزل بيها على الصفار زى السرسوب والغرض منه تسوية الصفار
واخفقهم جيدا
واكون مجهزه الجيلاتين المذوب فى الماء الدافىء واضعهم على النار غلوه وانزل بيهم على الخليط السابق واخفق جيدا
ممكن اقول حاجه
كان ليا خطأ تانى انى استخدمت ملعقه واحده جيلاتين مش 2
ويتم تقسيم الخليط الى قسمين
واخذ كل قسم اضيف عليه
350 جرام شوكولاته مذوبه مع التقليب السريع
وبعد ذلك اضيف 500 جرام كريمه فريش مخفوقه على كل نوع الشوكلاته البيضه والسوده
واخفقهم بالسلك على الخفيف
وكه اصبح الموس الابيض والاسود جاهز
احضر القالب بتاعى واضع به اول طبقة كيك بنشربها سيرم خفيف
ومكوناته 1 كوب سكر
1 كوب ماء
1 م ك عصير ليمون
وبعديها الموس الابيض
والمفروض المفروض ادخلها التلاجه شويه واحط الطبقه التانيه من الكيك
وعليه الطبقه الشوكوكلاته الغامقه
وادخلهم التلاجه ليله كامله
وانا استعجلت على النتيجه وخرجتها وشلت القالب
شلته ليه معرفش
سألتونى ليه بأه مكنش المفروض اشيل القالب
لانى زوقتها من فوق بجيلى على البارد وده بيتشرى جاهز وشوكولاته موروار
وده انا عملتها
والتنن دول سماكتهم تقيله فقاموا وقعوا حروف الموس وطلسمتها بالمكسرات
نرجع للموروار
200 جرام عسل جلوكوز
200 جرام سكر
200 جرام شوكلاته غامقه
200 جرام كريمه
الطريقه
يوضع العسل والسكر على النار الى ان يذوبوا
واضع فوقهم الكريمه المغليه مسبقا وبعدين الشوكولاته مع التقليب الى ان ينسجموا جيدا
ولا اطيل فى الغليان حتى لا تختفى لمعة الشوكولاته
واضع منها مغرفه مع مغرفة جيلى بارد على وش الموس
واتمنى ان تكونوا استفدتوا من تجربتى ومن اخطائى
الروابط المفضلة