اهلين mof منورة الملف ويلا ايدك معانا واعطينا ماعندك نراجوا فيك
علينا وعليك يا منيبة شرفتينا يلا مادامك قلتى اني نبي اللي عندك كله واحدة مش طماعة بكل حلو حار
وطلب صغير من كل ليبية تعرف اي نوع من الموالح اللي ينداروا في العراس تساعدنا زي ماتعرفوا رمضان جي و مادبينا نوعوا ونشكلوا واني عارفتكم ماتقصروش

انى كتب تعليق شورنى كتبته فى مكان تانى ... معليش نعاود نكتبه مره ثانيه

انى نبى نشكر هلببببببببببببببببببببه نانا79 على مجهودها و نقوللها ربي ان شاءالله يحقق ما فى بالك و يرزقك بالدريه الصالحه و يفرج كربك و يفرحك يا رب العالمين قولو معاى أمييييييييييين

و نبى نشكر رونى و نقوللها الله يرحم و لديك شكل الكوب كيك مش عادى ناويه بنديره فى رمضان انشاء الله ... شكرا شكرا هلبه

سورى يا بنات عرفت غلطى وين على العموم رمضان مبروك عليكم كلكم ...

انى نبى نشاركم بحاجه انشاء الله تعجبكم انى تجينى ميه ميه خفيفه و مناسبه لقهوة رمضان. الاسم اختاره انتم

المقادير: كوب زبده +كوب زيت+ 4/3 كوب عطر او زهر او ماء ورد و ملعقه صغيره BP و ما يعجن دقيق.
الحشو : اما معجون ثمر أو معجون الاناناس او حلقوم.

الطريقه: تخلطى الزبده و الزيت مع الدقيق اللى فيه BP و بعدين لمى العجينه بالعطر غير ردى باللك الدقيق صبي بشويه بشوه و تكون رطبه. بعدين خودى شزيه من العجينه و حطى فيها شويه من الحشو و بعدين كركبى و انقشى و بعدين حطى فى الكوشه بعدين فى السكر المرحى و صحتين و عافيه ..

أدعولى بالنجاح و الستر و الهنى ... رمضان مبارك عليكم

مشكور وبارك الله فيك
وربي ان شاء الله ينجحك ويفرحك يستر حالك ويبعتلك ولد الاحلال لهنيك ويسعدك
ونتتظر منكي المزيد من الاكلات الليبية حلو والحار
ورمضان مبارك علي الجميع

ويرحم ولديك يا mof وربي ينجحك ويعطيك مافي بالك امين
وصدقينى غر جربيها راهي حلوة وردي عليا وقوليلي

يا جميلة
ان شاء الله ما تضحكيش علينا
وتطلعي جميلة الكون المعروفة في ليبيا كلها

كتبت بواسطة روني الحلوة

ياسلم هاللمة ومحلاها
نانا97 صحيتى حتى انت الباين عليك فالحة وبالنسبة للبعثة لالا ماناش ماشيين لامريكا توا ماشيين لماليزيا وكان حصلنا كيف نبوا نحولوا لبريطانيا ولكن نقدروا نديروا كوبانيا حتى بالنت ولا انت شنوا رايك

سلمها ياربي انشاء الله يحفظك على العموم ماليزيا ختي تشكررررررر فيها هلللبة هي موجودة غادي تحضر في الدكتوراه
مشاشاء الله العقبة ليراجلك ياخد الشهادة العليا ياربي

سودلهداب7 في الصفحات الاولى نانا97 مدايرة طريقة وردات الشام تعرفي بنتهم روعة ويعزوا عليا هلبة ويجوا خفيفات علاخر وحتى الغريبة اليونانية شكلها حلوة ناوية بنجربها انشاء الله
وفي عندي حاجة معسلة ساهلة بكل وخفيفة ومش مكلفة مقاديرها : كوب زيت ، كوب زبدة سايحة، كوب حليب، ظرف بيكنج باودر، ملعقة كبيرة سكر ، دقيق مايعجن
تعجنى المقادير مع بعض وبعدين تشكليها حلقات وادخليها الكوشة وبعدين تعسليها وتمرمديها في جوز الهند
وعندك الكنافة تقدري اديريها بالقشدة ولا عشيشات باللوز وتتفنني فيها كيف ماتبي وتوا انزيد نشوفلك حاجات تانية

كتبت بواسطة mof

نانا79 بارك الله فيك و رزقك الدريه الصالحه و يعطيك ما تبي يارب و يفرج كربك و ينصرك ....اكلات صح و من القلب بارك الله فيك

و حتى انت يا رونى بارك الله فيك يا على كوب كيك مش عادى باين عليه مشطوره هلبه.

موف انشاء الله يارب انت ينولك الي في بالك ويسعدك ويعليك علي من يعاديك يارب

كتبت بواسطة جميلة الكون

مشكورين جميعا وبارك الله فيكم
والله هي اكلات صح ونتظر منكم المزيد من الحلويات والاكلات الليبية
نستنوا فيكم

وانت يا جمولة وييين حلوياتك واكلاتك نستنوفييييك

كتبت بواسطة منيبة

اهلا بيكم كل اخواتي انا ليبية واللي نقدر عليه نعطيهولكم انتم اطلبو وبس
وان شاء الله رمضان مبارك علي كل العرب والمسلمين

يلا منيبة يلا ورينا الهمممممممممة نحن في انتظار ابداااعاتك
ومرحببببببا بيك وسطناااا ويسعدك بتواجدك معناااا

تحياتي للجميع

و الله رفعتولى معنوياتى بالدعوات الصادقه اللى نفتقدوها فى الحياه اليوميه .. تعرفوا يا بنات و بالرغم انى ماعنديش وقت بكل بكل و لكن من دعواتكم الحلوه راجو منى اكلات او فكرات او اى شى يفيد ما نبي شى غير الدعاء بس و ربي ينول كل وحده ما فى بالها.

و يا جميلة الكون انى عندى اربعه صغار و طلبت الدعاء بالنجاح لانى نحضر فى الدكتوراه.

بالمناسبه تفكرت فكره كويسه لليحبو البتنجال المقلى.

طبعا تعرفو القلى كل ما تتجنبوه كل ما احسن و المشكله نحتاجو للقلى مره مره و المشكله فى البتنجال يشرب زيت هلبه لهدا عندى طريقه صحيه و من غير قلى و تطلع محمره من فوق و من لوطه.

خودى البتنجال و جريريه و خودى على غير طريق صوينيه حطى فيها ملعقه او تزيد شويه زيت
و حطى عليها شويه ملح و ابشرى فص ثمومه و شويه فلفل اسود و بعدين خودي البدنجال ادهنيه بالخليط و ستفيه فى الطاجين و حطيه فى الكوشه من فوق و من لوطه يطلع بنه و صنه و اهم شى صحى . بالصحه

بسم الله الرحمن الرحيم مشكورة يا روني من زمان ندور في الطريقة لأني درتها في عرسي وراحت مني الطريقة وغدوة ان شاء الله بنشري الكورن فلكس والاكواب0 ونديرها قبل مانمشي ليبيا باش كان صار منها نديرها في 000 العيد

0باقي البنات مشكورات علي المجهود وان 0شاء الله ربي يعطي كل وحدة ما تمني ومبروك عليكم رمضان