للبحث في شبكة لكِ النسائية:
|
احلى تحية لكل الليبات ....كل العام وانتم بخير
آخر مرة عدل بواسطة اسيرة السهر : 03-09-2008 في 09:25 AM
سلامات لكل البنات الحلوات سلمهم ياربي ... رمضان مبارك عليكم جميعا وآسفة جدا يا جميلة الكون ويا نانا على التأخير ... انتم في بالي بس صدقوني ما عندي وقت وبذات توا في شهر رمضان ووصلتني رسالتك يا جميلة ونكرر اسفي على التأخير
عموما انخش في الموضوع علي طول
بسكوت البخور : كوب زبدة وبيضتين وكوب نشا تلت ارباع الكوب سكر ناعم ونص كوب فستق مقشر ومجروش ملعقة فانيليا و ملعقة B.Pودقيق علي حسب العجينة ...نخلط المقادير ونفرد العجينة ونقصصها بالكوب الى دواير وبعد ماطيب انجيبوا شعيرية رشوا عليها شوي زبدة او زيت ونحمسوها ونصفوها كويس وندششوها مش هلبة يعني شوية تكسير بس ونذوبوا شكلاتة بنية ونغمسوا الدواير في الشكولاتة وبعدين في الشعيرية
بسكوت الكسوف :واحد ونص كوب زبدة وتلات بيضات 2 كوب نشا , ملعقة فانيليا , ملعقة B.P , تلات ارباع كوب سكر ناعم دقيق شوكولاتة بنية للتغطيس نعجنوا جميع المقادير ونفردوا العجينة ونشكلوها شكلين بالطاسة امتاع الشاهي بعضها دواير وبعضها هلال وبد ماطيب نغطس الدواير بس في الشوكولاتة ونحط عليها قطعة هلال
بسكوت الكسترد:
كوب زبدة كوب سكر ناعم بيضتان كوب كاسترد(موز اوفراولة)كوب زيت طرفبيكنج باودر دقيق حسب العجينة....تعجن المقاديرثم تشكل بماكينة البيتي فور حسب الرغبة وبعد النضج تلصق با كريم أو مربى.
تاج الفستق : كوب ونص زبدة +بيضاتان +تلات ارباع كوب سكر ناعم +كوب ونصف نشاء +ملعقة كبيرةB*B +دقيق.شوكولاتة بيضا ومربى وفستق مقشر ومدشش يعني مش مرحي هلبة ...نخلط المقادير وبعدين نفرد العجينة ونشكلها على هيئة كعك ..بعد النضج نلصق كل كعكتين بالمبى ونغطسهم في الشكلاتة البيضا ونرش عليهم من قوق الفستق
بسكوت الكاكاو حبيييييييييييييييييييييييييييييييييييييبي : كوب زبدة كوب زيت كوب نشا كوب سكر ناعم نص باكو الكاكاو طرف بيكنج باودر وطرف فانليا بيضتين دقيق شوكولاتة بيضا للصق...نخلطوا كل المقادير ونفردوا العجينة ونشكلها دواير وبعدين نحطوها في الطاجين ونخرموها بالشوكة بشكل منتظم وبعد مطيب نلصق كل حبتين بالشوكولاتا البيضا ...علي فكرة فيه طروف يسكوت في السوق تعطيك شكل البسكوت الجاهز لو القيتوهم يطلع شكل البسكوت احلى واحلى زيكم يعني هههههههههههه
الاقماع : كوب زبدة كوب زيت كوب مازهر او عطر على حسب الرغبة طرف بيكنج باودر دقيق على حسب العجينة ماتكونش يابسة ...الحشو مكسرات مرحية عللى حسب الرغبة يمكن كاكاوية او غيرها سكر ناعو وما زهر نعملوا منهم عجينة ونشكلوهم بيضاوي ...عسل للتغطيس ....نخلوا مقادير العجينة ونفردوها تكون رقيقة شوي مش هلبة ونقصوها دواير وفي كل دايرة نحط الحشوة المعدة في السابق وبعدين ناف عليها الدارية من جهتين بس يعني من فوق تبدى الحشوة باينة نزين الاطراق بالمنقاش وبعد ماطيب نغسطها في العسل
انجي للمالح :
الكيكة الحارة ممكن اديرها بالتن او بخلطة اللحم المفروم يعني بعد مايطيب ...المهم المقادير : 4 بيضات وشوي بيكنج باودر و8 ملاعق دقيق وشوي معدنوس وبطاطا مقطعة حلقات ومقلية وجبنة الشرايح والهريسة الحارة وعلبة تن او مفروم لحم وبيض يكفي لتغطية الطاجين من 3 ل4 بيضات ملح
نخلط البيض والدقيق والملح والبيكنج باودر وشوي معدنوس يعني رشة مش هلبة وندهن الطاجين ونحط فيه الخلطة هادي ونستفو فوقها جبنة الشرايح لين تغطي الخلطة ممكن نخلط الهريسة مع التن او المفروم وبعين انحطها علي الجبنة او نمسح الهريسة على الجبنة وونحط فوقها التن او المفروم وبعدين نستف عليه حلقات البطاطا ونغطيه بما يكفي من البيض المخفوق وعلى طول للكوشا
السوسرول المالح : 4 بيضات دقيق ملح بيكنج باودر معدنوس مفروم بهارات تخلط المقادير وتكو ت سايلة زي عجينة الكيك ونحطها في طاجين مدهون وتكون رقيقة زي فكرة السويسرول وبعد ماطيب طبعا مش حتاخد هلبة وقت لانها رقيقة شوية اول مانطععوها ندهنوها بالهريسة ونستفوا عليها جبن شرايح ونلفوهه كويس وبعد ماتبرد انقصصوها حلقات ممكن مع الجبنة انحط حشو تاني حسب الرغبة
لفايف التوست : شرايح توست مزال منه الجوانب للحشو مفروم وبيض وخبزة مرحية للتغطية ....انبوخوا شرايح التوست في الكسكاس وبعدين نفردهم بالماكينة ونحشيهم ونلفهم كويس ونغطس في البيض ثم في الخبزة ونقليهم
الاقماع : 3 كوب دقيق كيشيك صغير خميرة كشيك سكر طرف بيكنج باودر طاسة الشاهي الاخضر زيت كوب حليب وربع كوب مية ملح ....تعجن المقادير ونخليها تخمر ونولوا نعجنوها مرة تانية ونخلوها تخمر ..نشكل العجينة باليد على هيئة سيور بعد دهن اليد بالزيت ونجيبوا طروف الاقماع ونلف كل سير او حيل من العجينة عليه طبعا بعد دهنه بالزيت ثم ندهن بالحيب ونرش السمسم وندخله الكوشا وبعد مايطيب انحولوا العجينة من القمع ونحشيها تن بالهريسة وشوي جبنة ونحطوا من فوق زيتونة
وصحتين وهنا نتمنى تكون هالاكلات عجبتكم
آخر مرة عدل بواسطة اسيرة السهر : 03-09-2008 في 09:30 AM
مساااء الخير كل سنة وانتم بخيير
اني اليوم جايبتلكم طريقة المشوكة اني من عشااااقها
المشوكة :
2 بيض + كوب زبدة + كوب زيت + كوب سكر + 5 ملاعق نشا + ملعقة صغيرة بكن باودر
كوب لوز + كوب كورنفلكس + مايعجن دقيق
الطريقة :
يخلط تم تكركب تم تطيب في الكوشة وتغمس في الشكولاطة البيضاء تم تغمس في لوز مكسر كبير كبير مش صغير ...
جربوها وادعوللللي ان يرزقني ربي الدرية الصالحة
الشامية :
كوب لوز ابيض امهروش امزلط _ كوب حليب نيدو _ كوب لوز احمر امهرروش
كوب دقيق+ شكلاطة بيضاء + كوب شامية امفترشة( الحلوة الطحينية ) للي مايعرفهاش باليبي زبدة سائحة مايعجن .
الطريقة : يحمس حليب النيدو مع الدقيق حتى يسمر لونها على ناااار هاااادئة جداا حتى لا تحترق...
تم يخلط مع الشامية واللوز الابيض والاحمر المهروشين ويخلطو معااا مع الشكولاطة البيضاء بعد دلك تطرح في السفرة تكون غارقة شوية فيها حواشي زي سفرة البقلاوة
ملاحظة : يجب تكون السفرة مفروشة عليها نايلو قبل مانطرح عليها المقدار وتبتبت زي البسبوبسة
ونساويها كويس على الصفرة بعدين اندوب الشكلاطة ونطرحها عليها وهي ساخنة وناخد الفستق امحمس ومهروش انرشششه من فوق على الشكلاطة
ونخليها تجمد اما في التلاجة او برا على راحتها وبعدين نقصها مربعات مربعات
ويمكن تحفضيها حتى في الفريزر
بالصحة والهنا والشفاء
اسيرة السهر الله يرحم والديك ويباركلك شكلهم حلوااات تسلمي ايدياتك
لي عوووووووووووووووودة يا البنات
مشكورة وبارك الله فيك يااسيرة السهر والله شكلهم حلوات هلبا
وكل سنة وانتي طيبة
ديما هلي علينا بي حلوياتك واكلات اليبية
آخر مرة عدل بواسطة جميلة الكون : 03-09-2008 في 02:44 PM
جزاكي الله الف خير يانانا 79وربي ان شاء الله يرزقك بالدرية الصالحة يارب
الروابط المفضلة