كتبت بواسطة kittygago

سلمها يا ربي و نجيها و نجي شنبيره هللي ما يعرف غيره ( خخخخخخخ أغاني زمزامات )

ربي يحفظكم لبعض يا روني و الحزارة حلوة من الراجل يا حبيبة .... سلملك هالحزار يا ربي

و ربنا حتى انتي يعطيك ما في بالك و يجعل رمضان مبارك عليك و على عيلتك و على كل أمة محمد يا رب و ربنا يعوده علينا بالخير و البركة و التوبة الى الله

و يا حبيبة بالنسبة للملف اللي بنفتحوه مش لازم تصور غير طلتك علينا تكفي يا سمحة .... و كانك قدرتي تكتبي شن درتي كل يوم تكوني مشكورة و ممنونين منك يا حبيبة .... ما دابينا بنستفيدو من الغاليات كلهم

و ربنا يحفظك و يحفظلك مولى بيتك

سلمها السمحة اللى لسانها يقطر عسل
ويحفظلك مولى بيتك ويجبر بخاطرك يارب
وخلاص وين مانتم وين مانى غر بيوجعنى الملف هذا لانه لو سيبناه حينتسى وخلاص بيبعد لهذا نوصيكم تفكروة مرة مرة حتى بكليمه لانه عزيز عليا هلبه هلبه عرفنى على بنات من خيرة الناس
وتتلاقوا على الخير ان شاء الله

السلام عليكم
كيف حالك ياجميلة الكون
أناأسفة ليا فترة طويلة مادخلتش المنتدي واليوم عرفت أنك تسألي علي طريقة عفسة القط
المقادير:كوب زبدة + نص كوب زيت + نص كوب نشا + نص كوب سكر ناعم +2ظرف B.B
+فانيليا + دقيق
الطريقة :نعجن كل المقادير السابقة حتي تكون عجينة متماسكة وناخذ حبة بندق ونلفها بالعجينة ثم نثبت كل 3 حبات مع بعض علي شكل مثلت وهكذا حتي تنتهي العجينة
ثم توضع في الفرن حتي يصفر لونها وبعد أن تبرد تغلف بالشوكلاته السوداء وتزين بالبيضاء أوالمكسرات المطحونه أو العكس
وبالهناء والشفاء

موفقين ان شاء الله يا ربي والله منورين اخواتي

باهية و الحمد لله وكيف حالك انتي
معليش وان شاء الله المانع خير بس وبارك لله فيك علي الطريقة و خليك مرة مرة طلعي علينا
مش تنسيا بكل

ماشاءلله على المنورات ربى يحفطكم ان شاءلله

السلام عليكم أخواتي

كيف حالكم ان شاء الله بخير و صحة و سلام

مبارك عليكم الشهر ان شاء الله غدوة نصبحو صايمين

ربنا يجعلنا من صيامه و قيامه يا رب

من فترة شوية تكلمنا على فتح موضوع نضمو فيه الصفرة الليبية في رمضان و اليوم راح نكتب الموضوع لكن في قسم المعجنات

لأني تفاجأت بالأخت لبنانية بجدة فاتحة نفس الموضوع و نفس الكلام اللي قلناه في هذا الملف في ركن الأطباق الرئيسية

الحق حسيت بخيبة أمل لما ريته ... المهم قلت نحطه في ركن المعجنات حتى باش الإدارة ما تقولش موضوع متكرر

و أرجو من الجميع و بارك الله فيكم المشاركة

أخواتي لقد قمت بوضع الموضوع في ركن المعجنات و أطلب من الله أن تشاركو في هذا الموضوع

http://www.lakii.com/vb/showthread.p...04#post8766404

بالإنتظااااااااااااااااااااااااار

كتبت بواسطة kittygago

السلام عليكم يا ريحان و على كل الأخوات

لقيتك تسألي عن الشمعة و سلة الدجاج و محل اماعين فيه تخفيضات كبيرة

راح نجاوبك وحدة وحدة

بالنسبة للشمعة ... لقيت الأمور نانا مدايرتها هنا في الموضوع على ما أعتقد و اني عندي نفس الطريقة لكن تتشكل بطريقة ثانية

الشمعة : دجاج مفروم مع توابل اللي تحبيها و نكون موتية كيمة عادية جدا طايبة ( لحم مفروم مقلي مع البصل و الملح و الفلفل الأسود)

ناخد طاسة الشاهي و ندهنها بشوية زيت و نحط فيها كمية دجاج مفروم و نحفره من داخل و نعبيها مفروم و بعدين نسكرها بالدجاج المفروم و نقلبها الطاسة و نستف في الطاجين و نطيبهم في الكوشة و بعد ما يطيبو نحط عليهم من فوق جبنة باش تسيح و ولي زي الشمعة

على فكرة راهو مش مجربتها الطريقة لكن عندي صحباتي معتمدينها و ان شاء الله نكون افدتك بالنسبة للشمعة


بالنسبة لسلة الدجاج :

دجاج مفروم ني مع البصل
بزار
ملح
بهارات اللي تحبيها
الحشو:
بطاطا مكعبات صغيرة مقلية
جزر مكعبات صغيرة مقلية
زيتون مقرض
شوية معدنوس مفروم

نخلط الحشو مع بعض و نحط عليهم بيض على حسب الكمية و بهاراتو فلفل أكحل و ملح و نخليهم على جنب.
نجي للسليلات اللي حجمهم كبير شوية الخاصة بالحار ندهنها بشوية زيت و دقيق

و نكون مخلطة الدجاج و البصل مع البزار و البهارات و الملح و ناخد منهم شوية و نطرحها في السلة لين نغطي جوانبها و ناخد شوية من الحشو و نحطه فيها و نضع عليها جبنة أو يمكن بعد وضع الحشو و الجبنة نسكرها من فوق بطبقة من الدجاج نفسه يعني نسكرها و نحطها في الكوشة اطيب من لوطة و بعدين من فوق و ما تاخدش وقت طويل في الكوشة

لكن بنتها روووووووووووووووووووووووعة مجربتها أكثر من مرة و معتمدتها الطريقة



هههههههههههههههههههههههههههههههههههههههههههه

أما بالنسبة للمحل امتاع الماعين و لكل البنات اللي في طرابلس و سامحوني يلي برى طرابلس و اللي في الغربة ....
فيه محل اماعين في طريق السور و ان شاء الله تكوني تعرفيها اللي فيها شركة البريد .... و انتي خاشة من طريق القيادة لطريق السور تقعدي ماشية طول طول طول و تفوتي الجامع اللي يجيك على ايدك اليمين و تقعدي ماشية لين توصلي جامع يجيك على ايدك اليسار بعده بشوية بس تلقي محل اماعين واضح و عارض من بضاعته البرى و هو قريب هلبة للجامع امشيله راح تتفاجئي بالأسعار

يومه اامشيناله ما صدقناش اللي قالونا عليه لين شفنا و اشرينا و الحق عنده حاجات روعة و النساوين هات ما عندك طايحين عليه ما شاء الله زي الرز و انتي تعرفي النساوين و الماعين بيناتهم قصة عشق مستحيل تنتهي

و ان شاء الله انكون أفدتك و افدت البنات

و راجوني بس راح انزل حاجة قنينة انحبها موووت ... غير نزلها على الجهاز و تكون جاهزة ما بين ايديكم

السلام عليكم كيتى كيف حالك وبارك الله فيك تعبتك معاى وربى يفتح عليك يارب وووسامحينى رديت عليك توا تعرفى بعد ماقريت طريقات ايلى اعطيتيهملى قداش

لى اندور فيهم باذن الله حانجربهم وانقولك وقريت على محل الماعين المهم امشيت ثانى يوم وماشاء الحق رخص مش عادى اشريت ايلى نبيه وتوا مرة ثانية بنولى المهم ثالث يوم امشيت الى الشرق امشيت بنغازى

والابيار وراس هلال وسوسة وشحات ماشاء الله مناظر اتهبل تقولى مش فى ليبية سبحان الله قعدت سبعة ايام وروحت حتى نبى نشكرك القيت الرصيد تم وسامحينى على التأخير الله يدوم

عليك صحيحتك وربى يعطيك مافى بالك وبوركت على الملف الذى افتحتيه على شهر رمضان احبيبة وتوا انخش فيه نعطيك رأى وانى شفت سفرتك ماشاء الله عليك ورمضان مبارك عليك

وعلى اسرتك وعلى جميع المسلمينأسأل الله أن يعيننا على الصيام والقيام وبارك الله فيك مرة اخرى

السلام عليكم
اخواتى كيفكم كلكم كلكم ورمضان مبارك أعهاده الله عليكم بالخير والبركة خلاص عاد معاش بتخشوا فى هذا الملف عندنا ملف جديد المهم ماتنسوشى مرة مرة خشوا فيه

نانا كيفك انى روحت من الشرق امشيت مناظر تهبل الصراحة مش عادية المهم حالك باهى شينوا حولتى ام مازال ورمضان مبارك وان شاء الله ربى يفتحها عليك

كتبت بواسطة ريحان

السلام عليكم كيتى كيف حالك وبارك الله فيك تعبتك معاى وربى يفتح عليك يارب وووسامحينى رديت عليك توا تعرفى بعد ماقريت طريقات ايلى اعطيتيهملى قداش

لى اندور فيهم باذن الله حانجربهم وانقولك وقريت على محل الماعين المهم امشيت ثانى يوم وماشاء الحق رخص مش عادى اشريت ايلى نبيه وتوا مرة ثانية بنولى المهم ثالث يوم امشيت الى الشرق امشيت بنغازى

والابيار وراس هلال وسوسة وشحات ماشاء الله مناظر اتهبل تقولى مش فى ليبية سبحان الله قعدت سبعة ايام وروحت حتى نبى نشكرك القيت الرصيد تم وسامحينى على التأخير الله يدوم

عليك صحيحتك وربى يعطيك مافى بالك وبوركت على الملف الذى افتحتيه على شهر رمضان احبيبة وتوا انخش فيه نعطيك رأى وانى شفت سفرتك ماشاء الله عليك ورمضان مبارك عليك

وعلى اسرتك وعلى جميع المسلمينأسأل الله أن يعيننا على الصيام والقيام وبارك الله فيك مرة اخرى

كيف حالك يا ريحان ان شاء الله بخير و رمضانك مبروك و كل عام و انتي بخير حبيبة

الحمد لله اللي عجبوك الحاجات و سترني معاك ربي .... و قداش فرحانة انه المحل عجبك و لقيتيه كيف ما قتلك

و بالنسبة للموضوع اللي فتحناه جديد ... راهو نراجي فيك تورينا صفيرتك يا حبيبة و نتمتعو بإبداعك

و بالنسبة للملف هذا مستحيل ننسوه لأنه ورانا حاجات غير عادية ما شاء الله