كتبت بواسطة
ايور
مااااااااااااااااااااااا شاااااااااء الله عيني اعليك باردة وسلم ايدياتك اختي قوقو
بس انحب نسألك على اي رقم حليتي العجينه وادهنتيها بالزبدة
وتحياتي ليك وللكل
سلمها و نجيها يا ربي أيور ... كيف حالك ان شا ءالله تكوني بخير
بالنسبة للحلة ... حليها على آخر رقم عندك أني عندي آخر رقم 7 و بعدها ادهنيها بالزبدة أو السمن كيف ما تبي ... لكن لو تبيها حلوة زرقي شوية زيت للزبدة أو السمن يعني ما يقعدوش بروحهم و ادهني بيهم الورقات اللي عندك ... و هذا في حالة انك تبي اطيبي البوريك في الكوشة
و اي سؤال أني حاضرة
كتبت بواسطة
ماما الاء
يا عيني عليك حويجات من الاخير تهبل والله
عطيك الصحة يا روحي وما يحرمنا منك
عجبتني فكرة الكاخط في الابواق مع انهم قالولي لعيها قبل بس ما كنتش مقتنعة بيها
بس توة خلاص شفتها عيني عينك وطعت تهبل وناجحة باذن الله نجربها
المقروض حاجة مش عادية طلع مقروض رسمي ما يبصرش
اني شفته في الاول نسحاب مقروض بجديات بس مش معسل ههههههههههههه
عطيك الصحة كل ما يجي من ايديك يهبل
لو نعرف يا ماما الاء انه المقروض و الأبواق هما اللي بيدخلوك على الملف راهو درتهم من أول ما بديت نكتب في الملف هذا
نورتي يا حبيبة بهالطلة
و بالله عليك ما تغيبيش علينا و لو عندك حويجة حلوة أكرمينا بيها و انتي أهل الكرم
بالنسبة للمقروض هههههههههههههههههههه ضحكتيني يا عطيك السلامة ... لكن بنته حلوة
و بالنسبة للأبواق المهم تستخدمي ورق غليض شوية و تحاولي انك ما تضغطيش العجينة عليه هلبة باش ما تلصقش
كتبت بواسطة
ملكةالرومانسيه
ممكن وخيتتناالحبيبهطلب بسيط: ممكن المقادير المقروض الحار والبوريك ومقاديرالعجينه وبس ,,,,قولى شن خليتى
والمقروض حلو انا نقلى فيه انتى شكله فى الفرن والا لا؟
ومشكوره مقدما
الله يعطيك الصحه ويسلموووووووو
سلمها يا ربي .... بالنسبة للبوريك هذا هو
البوريك متاع الورق الحلة
هو شكله زي بوريك الجبدة ... غير طبعا بوريك الجبدة خير لأنه يقرمش هلبة
العجينة : بياض بيضة + شوية ملح + زيت أو زبدة أو سمن + ماء + دقيق
الماء هنا حطيه على حسب كمية العجينة اللي تبيها زيها زي الزيت و الا الزبدة و الا السمن و طبعا ما يعجنهم دقيق و تخليها ترتاح حتى نص ساعة.
أني الحشو المفضل لدي في البوريك و خاصة النوعية هذه :
بيضة مطبوخة + ( معدنوس مفروم + بصل مفروم + فلفل أسود + قرفة + ملح ) و دبليهم على النار في طاوا فيها شوية زيت و الا زبدة و الا سمن + بطاطا مقلية و تكون رطبة مش مقرمشة و مقطعة مكعبات + و تقدري تزيدي عليه طروف دجاج ... أني ما نحطش في الدجاج بكل + أي نوع جبنة تحبيه + بيضة نية
تخلطي الحشو كله و امرسيه بايدك و الا بالشوكة و يولي زي العجينة و اللي تحب تزيده بهارات تحبها تزيد
نحل العجينة بمكينة الحلة لأخر رقم و بعدها ندهن كل شريط بالسمن و الا الزبدة و الأحلى انك تخلطي واحد منهم بالزيت و تدهنيه و تحشيها و تسكريها زي الحجيبات و الا صوابع و تدهنيها من فوق و ستفيها في الطاجين و طيبيها مش عادية
و لو تبي تقليه ما تدهنيشي احشي الشريط على طول و اقليها
و بالنسبة للمقروض أني نقلي فيه مرات و مرات في الكوشة و هذه طريقته
المقروض الحار :
3 بطاطا متوسطة مطبوخةو مهروسة ناعمة + 2 بيض + خبزة مرحية + ليمون + بيكنج باودر + لحم مفروم + بصل مفروم + معدنوس مفروم + فلفل أسود + ملح +قرفة + سمن
الكيمة : لحم مفروم و بصل و معدنوس و فلفل أسود و ملح و شوية قرفة و السمن و خليهم يطيبو زي الكيمة العادية .
تخلط البطاطا مع الخبزة المرحية و الليمون و البيكنج باودر و البيض و إذا كانت العجينة طايبة زيديها دقيق و معصميها لين تولي سهلة التشكيل و بعدها حطي فيها الكيمة و سكريها و معصميها زي المقروض و قصيها و نقرشيها زي المقروض و ضعيها في الفرن لين اطيب و تتحمر و ممكن تشكيلها مثل الفطائر و تحشى و تسكريها بالشوكة و تحطيها في الفرن أو تقليها و خودي معدنوس مفروم ناعم و رشيها بيها بعد ما اطيب
و تفضلي أني جاهزة أسئلي اللي تبيه
كتبت بواسطة
مغتربة 2
السلام عليكم
ماشالله زعمةقداش غبت عليكم ؟؟؟؟؟؟؟؟؟؟؟؟؟؟؟؟؟
خشيت بنسلم لقيت الملف عامر يعطيك الصحة كيتي منورة ماعنديش خلوق للكتيبةالحق يادوب انخزن وربي يستر ماحديلعبلي في الكمبيوتر
فكرةملف رمضان حلوة عجبتني علي بركةالله
سلمها ياربي المغتربة .... يا ريت تورينا و تتحفينا بإبداعك يا غالية
أما فكرة رمضان الحق اني عاجبتني و راح نستفيدو منها و لكن عندي سؤال في أي ركن نفتحوه في ركن المعجنات و الا ركن الأطباق الرئيسية
النجم الذهبي
أعضاء قرؤوا هذا الموضوع: 0
الروابط المفضلة