●•°حلى متميز°•● الكعك الفلسطيني على طريقة حماتي
السلام عليكم و رحمة الله و بركاتهالله يسعد أوقاتكن يا أحلى صبايا
من يومين عملت كك طيب و وعدت الصبايا قدملهن اياه
من فترة الأخت mameto حطت الطرقة الأصلية للكعك بزيت الزيتون
حماتي بتعمله بطريقة مختلفة شوي بس كتيير بيطلع طيب و الكل بيحبه من ايدها و أولهن طبعاط زوجي لذلك تعلمتوا منها و دايما" بعملوا
نبدأ بسم الله و أول شي رح نشوف المكونات
9كاسات طحين ابيض
كاسة زيت زيتون
كاسة زيت نباتي( استعمل زيت دوار الشمس)
كاسة زبدة طرية..
المواد الدهنية المذكورة تكون الكأس ناقصة قليلا"
هيك التعليمات..وهي الكأس العادية تبع الشرب
5 ملاعق كبيرة حليب بودرة
3ملاعق حبة البركة
2ملعقة سمسم
3 ملاعق يانسون
3 ملاعق شمرة(شومر)
1 ملعقة صغيرة محلب
1 م ص خميرة
نصف م ص بيكنغ باودر
2 كاسة ماء للعجن
الحشو
كيلو تمر منزوع النوى و مطحون
نعجنه بالقليل من الزبدة و القرفةو لو حبيتو ممكن هيل كمان
الطريقة
بالنسبة للمحلب و الشمرة و اليانسون نطحنهم طحن خشن لحتى تبقى النكهة قوية
نخلط المواد مع بعضها ما عدا الماء و (الخميرة بدون نقع)
نفرك جيدأ حتى يتشرب الطحين المواد الدهنية
لو حبيتوا تغيروا بالمكونات الدهنية ممكن يعني تكتروا الزيت أو الزبدة المهم المجموع(3 كاسات مواد دهنية ل9 كاسات طحين)
نضيف الماء و نعجن جيدأ حتى نحصل على عجينة متماسكة..أخدت معي كاستين ماء
الآن نقطع العجينة كرات صغيرة
نفردها على صينية و نضعها بالبراد
و نصير نطلع شوية كرات و نشتغل فيهن و كل ما خلصوا نطلع غيرهن
لما بيكونوا بالبراد بيطلع الكعك أفضل
نجهز التمر للحشو و نقطعه كرات مناسبة للكعك
الشكل التقليدي للكعك هو الشكل المثلث متل فطيرة السبانخ
و ممكن نمد العجينة بشكل مستطيل و نفرد فوقها التمر و نلفه متل السويس رول و نقطعه
بيصير اسمها مقروطة
أنا عملت أشكال مختلفة
و كمان هيك
و بما أنو الصبايا عم يتوحموا عالقرفة ما هانوا عليي و عملت شوي بجوز و قرفة
نفس العجينة بس الحشو:
فرمنا جوز و خلطنا معه جوز هند و قرفة و ماء زهر و سكر لأنو العجينة ما فيها سكر.
نقطع العجينة دوائر ونحشها و نغلقها بشكل نصف دائرة
بعد ما انتهينا
نكون شاعلين الفرن مسبقا" وعلى الحرارة الوسط
نضع الصينية بالرف الأوسط وبس تتحمر شوي من تحت ما بتاخد بالكتير ربع ساعة منحمرها من فوق شوي
و هي النتيجة
و هي تبع التمر
لا تاكلوا و هو ساخن ما بيكون طيب كتير ننتظر عدة ساعات لحتى يبرد و ينشف تماما" بعدين بتكونوا عملتوا القهوة أو الشاي لو حبيتوا...و دوقوا شو طيب
ألف صحة و هنا لأحلى صبايا
رد مع الاستدلال
كتبت بواسطة السوسنة_السوداء
الروابط المفضلة