مــا شـــاء الله أمـــانى مصحف جميل فعلا وخطه كبير
تعرفوا مشكلة القراءة من المصحف إن الحروف بيكون شكلها غريب يعنى الألف ساعات ما بتتكتب وتكون مكتوبة فوق الحروب وده بيلخبط الطفل بالذات اللى بيكون لسه ببداية القراءة
أولادى كنت ماشية معاهم تمااام وبعدين تعبت وزهقت لأنى خرجتهم من مدرسة الجامع لأنها بقيت عرب على باكستانيين وصوماليين وبقت لغة التدريس الأولى هى الإنجليزى ... طبعا مفيش مشكلة إنهم يتعلموا بالإنجليزي المهم يتعلموا دينهم لكن أنا حبيت أعمل فيها قد المسئولية وقلت خلاص بأدرس لهم لوحدى علشان أحتفظ باللغة العربية
المهم لما حملت وولدت خلاص كله راااح فى الباى باى ولا بقوا يعرفوا عربى ولا قرآن وإبنى الكبير كان حافظ أكثر من نص جزء عم خلاص كلع راااح فى الهوا .. ولا بقى يعرف الغين من العين والصغير بقى فى الطرااااوة
ولما روحت على مصر الصيف اللى فات ربنا هدانى للشيخ اللى بيعلمهم على الإنترنت وعمل حاجة غريبة جدا جدا جدا
بقى يخلى حسن - إبنى الكبير ٩ سنوات- يمسك جزء عم ويحفظ معاه من المصحف ... قلت له يا شيخ الولد مش بيعرف يقرأ العربى بسهولة قال لى ما لكيش دعوة أنا عارف
ولما جينا فى رمضان حسن قال لى عايز أصلى التراويح قلت له ماشى فهمته بنصبيها إزاى ولاقيته بيآخد المصحف ويقرأ من سورة عم !!!! ما صدقتش نفسى هو طبعا فى الأول بيقرأ السور اللى عارفها وبعدين بقى يحاول يقرأ فى السور اللى ما أخدهاش .. مش هأقول لكم إنه بيقرأ بسلاسة زى الولاد للى فى مصر لكن ده تقدم بالنسبة لى كان مذهل
بأحاول بقى أخليه يقرا القصص - حاجات بسيطة - وبنراجع القرآن دايما .. وعبد الرحمن دلوقتى بيكتب أسد بطة وكده وبيحفظ - أهه عبد الرحمن ده ما كانش منه أمل نهائيا - والحمد لله بيحفظ مع الشيخ طبعا أصعب من حسن لكن بيحفظ وما صدقتش نفسى برضه لما حفظ سورة العاديات!!!!! ألفاظها صعبة جدا عليه لكن ربكم قادر على كل شئ
وزى ما قلت لكم قبل النوم بأحكى حكايات لتثبيت العقيدة والعبادات ومعجزات الرسول ... أو قصص الأنبياء وهكذا والأ٣كار وتصبحوا على خير
وربنا يجازينا يا رب خير الجزاء على تعبنا مع أولادنا ... وربنا يحفظ علينا ديننا ويحفظ أولادنا من كل سوء
الروابط المفضلة