السلام عليكم ورحمة الله وبركاته
انا صحيح اني ما اشارك كثير ...لكن صدقوني مااقدر افارق هذا المنتدى ..ودايم اقرا فيه صبح ومساء...واذا كنت طفشانه والا زعلانه احس انه يونسني واقرا كلام البنات واحس ان فيه احد زيي فتخف علي همومي
اليوم انا ضااااايق صدري...وقلت مالي الا الله ثم خواتي في المنتدى...دايم انا اقرألهم...خلوهم اليوم يقرؤلي ..ما بطول عليكم...لاني انا ما يمنعني من الكتابه الا سبب واحد وهو: إني إذا كتبت ماوقف (هرجي كثييير)
بس عارفين وش اللي ضيق صدري؟!! اليوم وحده من البنات مجمعه جاراتي....وما عزمتني(والمشكله اليوم طفشانه وودي بجمعه..وكل ما تصلت على وحده من جاراتي قالت معزومه!!!)..واللي مزعلني اني ماني داريه ليش سوت هالحركه...هل أنا ما اعجبها ..والا ايش تتوقعون...مع العلم إني دايم اناديها...في جمعاتي الصغيره والكبيره...وهذي مو اول مره تسويها ...وهذا اللي ضايقني ...مع اني قبل اسبوع طلعت انا واياها ووحده من البنات السوق...وبعد مارجعنا اتصلت على وحده من البنات وقالت لها (تصدقين الطلعه معاها مرررره وناسه وتحسين الوقت يروح معاها بسرعه وانا ما توقعتها كذا- هذا اللي هو أنا -) يعني من كلامها هذا قلت اجل مافي نفسها علي شي..
وانا ما احب اعطي احد قدر اكثر من اللي يعطيني...يعني ليه انا دايم احمل همها لا تزعل لو جمعت البنات وهي لا...وحرام البنات يطلعون وهي لا...وهي ما تفكر فيني...وانا ناويه الحين اذا صار عندي جمعات ما عاد اعذر عليها ابد...إذا ماهي حريصه علي ..بعد انا ما ني حريصه عليها....وعلى فكره انا صداقاتي كثييييييره وجمعاتي اكثر..وهي جديده...وعشان كذا ارحمها واعزمها ...اقول حرام ....لكن الحين خلاص ماشاء الله عليها كونت لها مجموعه على كيفها

بنات قولولي رايكم في الموضوع...هل قراري صح والا غلط...وهل لي حق ازعل والا لا
التمست لها الاعذار لكن الحين ما ادري وش عذرها؟؟؟
اتمنى تردو علي وردودكم بتسعدني

صراحة موضوعك مهم وبيسير كثير 00
عندي هرج كثير بس نعسانة اخاف مااجمع الافكار 00
بس ما حبيت ادخل على الموضوع وماارد00
الي جا في بالي دحين انت ليه ماتساليها او تخلي وحدة ثقة وهذا افضل تقولها غريبة جارتك فلانة ليه ماا شوفها عندك كثير00
لانه صعبة تقاطعيها اذا كانت تحترمك وتنبسط معاك 00
يمكن في اسباب مجهولة 00
احلى شي في الدنيا وجود جارات صالحات <<<وحدة معانية من عدم وجود الجارات 00الله يعين00
ان شاء الله لي عودة لموضوعك بس لما اصحى من النوم ولا لما افوق ماادري 00

عزيزتي :
اذا كانت تعز عليك واجهيها وشوفي ايش السبب

وانا عن نفسي ما احب كثر الزيارات يعني اذا ماقالت لي من غير سبب

ما اقولها الا اذا كانت الجلسه للذكر

بارك الله فيك أخيه .

اخيتى الحبيبة...يقول عمر بن الخطاب اتخذ لااخيك سبعين عذرا وان لم تجد فقل لعل له عذراً ...
فلعلها سهت ونسيت والله اخيتى تمر علينا مثل هذه الامور فى العزائم وننسى اقرب الناس وتكون فشيله..واعلمى ان تسعة اعشار حسن الخلق التغافل..
فلماذا لاتتحدثين مع اقرب صديقة لك وقولى لها انك مستغربة انك ماانعزمتى على الجمعه هذى وتوصل لها الكلام فلعلها نسيت...

تسلمي يا منال...كانك حاسه اني في حاجه اني اسمع ردود في هالوقت
بالنسبه للمقاطعه ابدا ما طرت علي
يعني عاااادي باكلمها وما راح تتاثر علاقتنا الا اللهم بالعزاييم

واشكرك ايضا يا اخت ام نور على المشاركه
وهذا الشي اللي راح يخليني ما احرص عليها...بصراحه الجمعات اللي انا احضرها غالبا لا تخلو من النقاش الطيب والتذاكر..ومجالسة الاخوات الصالحات...لكن هي مجرد حاضره في الجلسه يعني ماراح يكون لوجودها او عدمه فائده بالنسبه لي...لكن انا كنت اعزمها لتحصل هي على الفائده
اما بالنسبه للمواجهه ...فانا ما احس ان فيه داعي لاني انا ماني حريصه عليها....لكن زي ماقلتلكم...ما احب يكون قدري اقل من غيري

الكروان غنى...جزاك الله خير
ضحكتيني بنسيت؟!! المره اللي راحت نسيت...والمره اللي قبلها نسيت...وهالمره بعد نسيت؟
واما بالنسبه للسؤال...انا لازم اسأل اللي وصلت الكلام وقالت انها مدحتني ومدحت مجالستي.. إنها تجس النبض بالنسبه لهذي النقطه
واسعدتني مشاركتك(:

عزيزتي ...لا تحملي عليها كثيراً ززفكما قالت الكروان غنى كثيراً ما تحصل هذه المواقف ..

وكما يقال التمس لأخيك سبعين عذر ..فان لم تجد فقل لعل له عذراً لا اعلمه !!

ومن الممكن كما قلتي ان تسألها احدى الأخوات لماذا لم تعزمك ؟؟

ولكن كوني خير منها واحسني اليها حتى لو اسائت اليك ..

وبالتوفيق : )

هلا فيك يا امنيه
انا هذا الموضوع اللي ابغى رأيكم فيه...هل اعاملها بالمثل؟ أو انه غلط والمفروض اني مهما يكون... اكون احسن منها...وهل تتوقعون انه بهذا الشي بكون احسن منها؟
انا برأيي ما اتوقع ان في هذي الاشياء لازم اكون احسن منها...بالعكس احس انه زي ما تقدرني اقدرها...لكن لوكانت صديقه عزيزه علي..كان قلت ايه افوتها لها وعادي وانا ما اقدر استغني عنها لكن هذي...من مجرد المعارف واللي هم كثيرين
قال احدهم:قد يكون لك معارف كثيرون لكن القليل من هم اصدقاء..والاصدقاءقليل والأقل منهم الاخوه...فالأحمق من وجد له اخ ويتركه

أختي الغالية انا في رأيي تكوني أحسن منها وتستمري تعزمينها وتشوفين وزي ما قالوا الاخوات خلي احد يجس نبضها ويشوف الي في خاطرها
على فكرةانا يصيرلي مواقف مشابهه لموقفك كثير ..ومره وحده زرتها في ولادتها مرتين ولم ولدت ما زارتني لما ولدت مره ثانيه ما حاسبتها جمت زرتها وأهديتها بعد ولا عاتبتها ولا شي
لما ولدت مره ثانيه جت وزارتني والله كانت فرحتي فيها كثيره رغم كثر زواري وصديقاتي
وعلى قولتهم خليك أطيب منها وإلا ...!!

عزيزتى تقولين إنك لست حريصة عليها وهى من مجرد المعارف فما عليك إلا أن تعامليها بالحسنى و صباح الخير يا جارى إنت فى حالك و أنا فى حالى
ولا تحملى نفسك التفكير فى هذا الموضوع كثير وإن كان لابد من شىء فالمواجهة أقصر الطرق فى هذة المواقف ولكن بوجود أحد الأصدقاء حتى تتدخل فى الوقت المناسب لو كان الموضوع مقصود و بداخلها شىء منك و أولا و أخيرا لازم التماس الأعذار
وإذا أردت أن تعيش فعليك بالتطنيش فطنش و أبتسم هأ هأ هـــــأ