انت .. مش من حقك ..
مش من حقك ،تلغي شخصيتها وذاتها ..
مش من حقك ،تؤمر وتنهي وكأنها صلصال تشكلها زي ما انت عايز ..
مش من حقك ،تؤمرها ماتشتغلش وتقتل طموحها واحلامها.. وانت تشتغل وتكبر ..وتبقا هي الفليبينيه اللي بابي اشترهالك عايز ترجع البيت تلاقيها في استقبال حضرتك زيها زي اي انتيكة في البيت ..
مش من حقك ،تقولها البسي او ماتلبسيش لبسها يخصها ..لو عايزها تتغير يبقا بالمعروف والاقناع ..مش زعيق واوامر ولو ماعملتيش كدا هاتبقي كذا..
مش من حقك ،تمنعها من انها تخرج مع صحباتها وتشوف الناس..زيها زيك هي مش عار على فكره ..
مش من حقك ،تبعدها عن اهلها وتقطعها عنهم في حاجه اسمها صلة رحم اللي رجاله كتير ناسينها ..
مش من حقك ،تاخد الباسوورد بتاع الاكونت بتاعها..انت لو واثق فيها مش هاتفكر مجرد تفكير انك تطلبه منها..
مش من حقك ،تأيدها بافكارك انت وبس وانها لازم تكون تحت طوعك في كل حاجه..هي ليها كيانها وشخصها من حقها تحس بانها موجوده بانها ليها اهميه في حياتك مش مجرد آله تحركها على مزاج حضرتك..
مش من حقك ،تهينها مهما عملت..هي مش جارية عندك..
مش من حقك ،تعلي صوتك عليها..لمجرد انك شايف انك الراجل وبتستقوى عليها مع انك كدا بتبقا ولا حاجه وبتسقط من نظرها..
مش من حقك ،تضربها ..وتشوف نفسك كدا راجل وحمش اوي..لا فوق انت كدا مش راجل انت كدا ضعيف ومريض ومحتاج انك تتعالج..
مش من حقك ،تقولها روحتي فين وجيتي منين..هي مش ملزمة تقدم لحضرتك تقرير يومي عن حياتها ..
مش من حقك ،تتشرط وتقولها غيري في كذا في شكلك..انت لو بتحبها بجد هاتحبها زي ماهي..هاتحب روحها مش شكلها..
مش من حقك ،تقولها ادخلي كلية كذا عشان انت عايزها تبقا حاجه معينه..سيبها تختار اللي هي بتحبه مش اللي انت بتحبه وعايزه..هي برده عندها احلام نفسها تحققها..
مش من حقك ،تقولها تكلم مين وماتكلمش مين..زي ما ليك اصحاب هي كمان ليها ومش لازم يكونوا على مزاج حضرتك..وانت لو واثق فيها هاتثق في الناس اللي هي اختارت تكون معاهم..
مش من حقك ،تسالها عملتي دا ليه ودا ليه..ماتحسسهاش انك الحد اللي جاي يخنقها والرقيب اللي شغلته يسأل ويحاسب وبس..
مش من حقك ،تحكم عليها من لبسها..مش من حقك تحكم عليها من الاساس..
مش من حقك ،تبصلها بصه مش كويسه..اعتبر كل البنات زي اختك..اللي ماترضاهوش على اختك ماترضاهوش على اخت غيرك..
مش من حقك ،تعاملها على انها مخلوقه لسماع اوامرك وتقول حاضر وبس..
مش من حقك ،تعاملها على انها امينه ياسي السيد..
وانتي ..حافظي على نفسك وكوني انتي..انتي وبس مش زي ماهو عايزك ..اتمسكي بشخصيتك..ارفضي ..قولي لا ..ماتبقيش مجرد اله يحركها على مزاجه ..انتي احسن من كدا بكتير ..انتي انسانه من حقك تعيشي ..من حقك تدرسي وتشتغلي وتختاري شكل حياتك..وتعيشي الحياه اللي انتي عايزاها ..من حقك يبقا ليكي مساحه من الحريه زيك زيه ..مافيش حاجه اسمها الراجل راجل والست ست ..انتي مش اقل منه في حاجه ..بالعكس انتي افضل انتي اللي بتربي وانتي اللي بتبني اجيال ..لازم تكوني قويه ..قاومي وارفضي اللي يلغيكي ..ارفضي ..انتي ربنا كرمك ماتجيش تقبلي تقاليد تهينك ...



منقول للافاده