لا حول و لا قوة إلا بالله العلى العظيم
ليه بس كدة الأمور وصلت للمرحلة دى
دى حتة لزقة من الصيدلية بتخلى المناخير ترتاح و ما تشخريش
ليه خليتيه من الأول يسيب غرفة النوم و ينام برة؟؟؟
زوجك لما بياخد بعضه و ينام لوحده و الناس موجودة فى بيتكم ده مالهوش غير معنى واحد بس
و هو إن إنتى مش واخدة بالك منه
هو بيوصل رسالة غير مباشرة ليكى و للضيوف الموجودين إنك مقصرة فى حقه
عشان كدة هو طفشان من غرفة النوم
و لما بيسألك بتحبيه كل يوم ولا لأ ...
برضو بيوصلك رسالة إنه مش ملاحظ الحب فى عيونك و أحضانك
و ده بسبب فترة ما بعد الحمل و هى فترة نفسية سيئة لينا كلنا
لما يسألك كدة قوليله مش هجاوبك بالكلام ،
أنا هجاوبك بالأفعال اللى عمرك ما شوفتها قبل كدة و ده أول فعل منهم ..
و على طول ضميه فى حضنك جامد جدا و طبطبى عليه
و قوليله ده أقل فعل عندى .. نفسك تشوف الأكتر ؟؟؟ ....
على طول هتلاقيه بيبادلك نفس مشاعرك و أحاسيسك يا أم ريان
و لما بتواجهيه و يسكت
ده معناه إنه مش عاوز يجرحك بكلام و عاوزك تفهمى لوحدك رغبته فيكى
أختى الكريمة أم ريان ....
خمس حاجات لازم تبدأى تعمليهم و فورا :
1- إذهبى للطبيب و شوفى حل لموضوع الشخير.
2- إبنك عمره 8 شهور يعنى لازم ينام فى سريره اللى هو المفروض يكون قريب من سرير نومكم
و ماينامش جنبكم و لا وسطكم.
3- جهزى نفسك كل يوووووم ، أنا بقولك أهوه كل يوم مهما ساب غرفة النوم و خرج برة ينام لوحده
أحلى لبس و أحلى برفان و أحلى ميكب ،
إبعتيله رسالة كل يوم قبل ما ييجى من الشغل قوليله
وحشتنى ، مشتاقالك كتير ، إمتى يجمعنا الحب سوا ، و كدة
و أول ما يدخل البيت قابليه بحضن دافى سريع و قوليله ثوانى الغدا هيكون جاهز ،
ومن قبل ما يوصل ، إنتى عارفة طبعا ميعاد وصوله
تكونى مرضعة البيبى رضعة كويسة و مشبعة عشان ينام
و تعرفى تقابليه بلهفة دون إزعاج البيبى و عشان تتفرغى ليه
و قبل النوم مافيهاش حاجة لما تتمايلى قدامه و تتدلعى ليه
و لو أظهر رغبته فيكى قوليله حبيبى أنا أكتر شوق منك
و على ما تجهز حالك أكون رضعت إبننا عشان يبقى الموضوع على رواقة
و فعلا رضعى البيبى تانى رضعة مشبعة و نيميه بعيد عنك شوية
أو روحوا إنتم فى غرفة تانية ،
المهم الموضوع يتم فى جو رومانسى تكونى مجهزاه سواء فى غرفة نومكم أو فى غرفة تانية
خليه يحس إنك مهيأة كل الأمور ليه هو لوحده.
4- لو ظروفكم المادية تسمح حاولى تاخديه و تسافروا تقضوا كام يوم لوحدكم و تغيروا جو ،
و تكسروا الروتين اليومى للحياة الزوجية.
5- لو ليكى حد من أقاربك قريب منك (أمك أو أختك ،، أمه أو أخته)
حاولى تبعتى إبنك عندهم يوم أجازة زوجك بحجة إنك بتشبعيه من أهله ،
و لما تقربى من زوجك أكتر و تحسى إنه كل شئ تمام إبقى روحى هاتيه من عندهم.
ما تسيبيش الأمور تتفاقم لحد ما تلاقيه راح مننك و إتجوز ،
و حلى الأمور بهدوء و إوعى تحسسيه بالتقصير
أو
تحلى الموضوع بالزعيق و الخناق و النكد.
و قبل كل ده إستعينى بالله إنه يهديه ليكى و يقربه منك
، لأن الدعاء هو أقوى سلاح.
و ربنا يهدى سرك و يكرمك بالخير يارب و يردلك زوجك و يحافظلك عليه.
رد مع الاستدلال
كتبت بواسطة س أم ريان
الروابط المفضلة