قبل عدة أجيال، كانت المرأة لا تعرف سوى بيتها وأطفالها.. تضع فيها إبداعاتها ولمساتها الجميلة.. فيعود الزوج من العمل الشاق ليجد جنته الجميلة في بيته.. ويعود الأطفال من المدرسة لجدوا ذلك الصدر الحنون..

واليوم.. أصبحت المرأة تسير مع زوجها في ميدان العمل.. يدها في يده.. بعد أوصلوا طفلهم إلى أقرب دار حضانة أو إلى بيت أحد الوالدين.. أما بعد الظهر، فنجد الاثنين قد تعبآ بالإرهاق والتعب طوال اليوم.. والطفل المسكين ينتظر من يلعب معه..

لست هنا بصدد الحديث عن أهمية عمل المرأة خارج البيت أو تفرغها للبيت فقط، وإنما عن حاجتنا كنساء إلى التوفيق بين حياتنا العملية وحياتنا الزوجية.. فالعمل خارج البيت له مساوئه وله محاسنه بغض النظر عن الغرض الأساسي من العمل خارج البيت.. لكن علامات الخطر تظهر عندما يطغى العمل الخرجي على دور المرأة في بيتها..

ومن المؤكد أن كل واحدة منا عانت ولو لفترات بسيطة من الضغط النفسي والضغط العملي جرّاء خروجها من البيت.. ولأن الأغلب هنا عاملات وربات بيوت ومنكن من جربت العمل خارج البيت ثم توقفت أردت أن تكون لي معكم محطات قصيرة نقرأ في آراءكم وخبراتكم السابقة وتجاربكم الناجحة..

في انتظاركـــــــــن

يا سلاااااام ...
موضوع مهم يا صدى و ممتع زي كل مواضيعك يا عسل
بالنسبة الي انا حاليا عبارة عن امرأة عاملة و ربة بيت .. و ما عندي اطفال لحد هلأ """" الله يعينهم بس ييجو" ، و دوامي بخلص الساعة 4 العصر و حاليا بوصل عالبيت4:30 يعني قبل اذان المغرب ب10 دقائق بس
ومع اني منظمة وقتي من ناحية الطبيخ و ترتيب و تنظيف البيت و الزيارات ... بس بحس مرات اني رح اوقع من طولي ، و ان اليوم كله كان عبارة عن ركض من شغلة لشغلة .. ببلش اطبخ وانا بملابس الشغل يعني قبل ما اغير ، باكل وانا واقفة غالبا.. و بجلي و انا عم بعطي موعد لزيارة ، او بستقبل ضيوف و انا عم بحضر لطبخة بكرة او الغسيل في الغسالة ... و شو بدي احكيلك لاحكيلك عن الضغط يا صدووو
و المشكلة شغلي بدو تركيز مش طبيعي كله ارقام في ارقام و اي غلطة ...
يعني بروح عالبيت راسي رح ينفجر

الحمدلله على كل حال الحمدلله ..
طولت عليكم بالحكي .. عادتي ولا رح اشتريها

يااختى شكرا لك على هذا الموضوع ، والله انا كمان بعانى مثل الاخت دندونه بس انا عندي اولاد اثنين الله يخليهم وشغلي بخلص على 3.30 يعنى بوصل على 4 برجع بطعمي وبحمم وبغسل وبطبخ وبجلي وبدرس الاولاد ومش عارفه حياتى كلها ركض بركض وبحس دائما بضغط نفسي وجسمي رهيب .

مرحبا من جديد
فعلا موضوع مهم
بس يا ريت يا دندون تقوليلنا كيف منظمة وقتك بين البيت والطبخ والشغل برى عشان الخبرة ووين تحطين الاولاد??? صعب كتير اعرف بس كيف التنظيم اهم شي
وتسلمين يا الغالية على طرحك الموضوع

أهلين Dandoon
الله يعينك يا اختي..
اذا كنت تتغدي برة (أقصد في الشغل) طيب كويس على الأقل يخف الضغط
دوامكم ينتهي قبل المغرب بنص ساعة!! طيب متى تبدأوا؟؟
بما انك لك فترة بتشتغلي، طيب مافي حل بنظرك؟


اهلا اختي هدول
مع الأولاد المشكلة تزيد
طيب متى تلاقي وقت لتذاكري لهم وتقعدي مع حالك؟؟
الله يعينك يا اختي


اهلا بدور..
نفس سؤالي
وانت ما عندك تجربة؟؟

صدى حبيبتي انا ما بتغدى في الشغل .... و زوجي كمان ما بحب الاكل الجاهز .. مرات بنسلك حالنا بسندويشة الصبح ... بس الغداء " او العشاء" ما في منه مفر ...
الدوام من 8-4 ، و في الصيف الوضع عادي برجع ولسا العصر ما أذن ، بس في الشتا بصير الوقت ضيق جدا و متهيألي لازم نصوم كل الايام ما دام نا بناكل الا بعد المغرب

بدور يا عسل انا لهلأ ما عندي اولاد و مش عارفة اذا الله رزقني شو رح اعمل فيهم .. قصدي وين اوديهم .. و بالنسبة للتنظيم انا ولله الحمد بحب اصحى بدري .. يعني اكتر شي بغلب بالطبخة سلق الدجاج او اللحمة.. بسلقهم الصبح و خلال هالوقت برتب البيت و بنظف الحمامات تكرمو ،و بقطع الخضرة اذا بدها تقطيع .. و عاملة جدول للغسيل و التعزيل و ما بغير فيه اي شي لاني اذا غيرته يوم ... خلص راحت علي ..

يا صدى سكتيني و بعدين بدي اضل ابرم ؟؟؟

السلام عليكم ورحمة الله وبركاته
انا مش بس مولعة أنا بدي أشد شعري، ربنا يسامحك يا صدى على هيك موضوع، وما منت تخلي الجرح مقفول.
ياستي انا باشتغل من تقريبا عشرين سنة بس مش متواصل، يعني لما ربنا يرزقني بطفل استقيل واتفرغ لمدة ستة شهور، وهكذا ..... وبعد ان توقفت عن الانجاب لمدة عشر سنوات ورتبت أموري ربنا رزقني بنوته اللي هي وعد، وبعدها تفرغت لها سنتين وبحثت عن عمل جديد وربنا وفقني بعمل قريب من البيت.

عدنا لوجع الراس ، بدك تصحي من أذان الفجر وترتيب البيت واعداد الفطور على 3 مراحل للمدارس وللروضة ثم لسي السيد، ثم الجلي وترتيب البيت للمرة النهائية قبل المغادرة، وطبعا اللمسات الأخيرة على الطبخة وتفلفل الرز، وبعدين اخذ البنت للروضة، وبعدها العودة للبيت لتفاجئي بالانقلاب الرهيب اولاد شو بدك تحكي والبنت مشغولة بالدراسة ادعولها عندها السنة ثانوية عامة ربنا يوفقها وتجيب مجموع يارب
sid المهم يادوب اصلي العصر وارتب البيت واستراحة لثواني معدودة قبل مراجعة الدراسة واللي عنده امتحان وطلبات سي السيد ما تعديش. واحيانا بأنام بعد صرة العشا على طول وأحيانا بأصلي العشا بعد منتصف الليل، شو بدك بها الشغلة.
بس بصراحة لما باترك الشغل بأحس انه ناقصني شي ونفسيتي بتتعب وما برتاح الا لما ارجع الشغل. وبصراحة اكثر مضطرة للشغل الوضع في غزة زي الزفت وزوجي عاطل عن العمل منذ سنة يعني انا باتحمل كافة احتياجات البيت ربنا يفرجها علينا،
وساعات العمل عندي كل الاسبوع عدا الجمعة طبعا ومن الساعة 8 لغاية الساعة 3 .والحمد لله مرتاحة نفسيا وماديا وبكفي حكي ومع السلامة

Dandoon


اهلا وعود الخير..
ادري اني قلبت الجرح بس لازم نتكلم في اللي ما بدنا منه
الله يعينك يا اختي..
على الأقل بنتك كبيرة يعني بتساعدك في الاجازات
طيب ليش تعملي كل حاجة انتي? ليش شغل البيت ما يتوزع على كل الموجودين في البيت? خاصة انه أولادك اعتقد انهم كبار نوعا ما اقصد باستطاعتهم يعتمدوا على تفسهم وانت مجرد مشرفة عليهم في الأشياء الصعبة جدا..
هوني امرك وادعي الله يفرج عليك

سلام عليكم يا بنوتات يا حلوات
أنا ما بشتغل و لكن بدرس يعني الحال تقريباً من بعضه
وقتي كله مشغول , مرات كتيرة بحس حالي مثل الألة بس شغل من غير تفكير و أحياناً بحس إني رح أنهار و بعدين بتذكر أيام الفراغ الله لا يعيدها و بقول لأ ...... مهما كانت صعوبة الوضع في الوقت الحاضر بيبقى أحسن من قبلsid sid .
أما بالنسبة لتنظيم الوقت فهو شيء أساسي .
بفيق الصبح بكير بودي الأولاد للمدرسة و بعدين برجع يا إما بروح للجامعة و إذا مافي عندي دوام بقعد و بدرس .
لما بيرجعوا الأولاد للبيت على الساعة (1) تقريباً بقوم و برتب البيت أو بطبخ و بعدين بدرسهم ثم وقت الغداء على الساعة (5) و الساعة (7) بيروحوا للنوم و أنا برجع لدراستي .
زوجي متطلب جداً و ما بيصير شي ينقص و مرات كتيرة بطبخ و بعدها بروح للفحص !!!!
أما الحياة الإجتماعية فهي صفر و خصوصاً وقت التحضير للفحص يعني أحيلناً كثيرة ما بطلع من البيت مدة شهر كامل و لا حتى لعند أهلي .
و لكن الحمد لله أنا ماشية بدراستي تمام و حتى رفقاتي العزابيات رسبوا أكتر من مرة و أنا و الحمد لله ماشية كل سنة بسنتها و إنشاء الله فترة و بتعدي .

سلام

ماشاء الله عليك يا babymother
احس يومك حااااااااااااااااااااااااااااافل بالأشغال..

بس اتغربت من
___________________________________________
ثم وقت الغداء على الساعة (5) و الساعة (7) بيروحوا للنوم
___________________________________________

بتاكلوا وجبة وحدة في اليوم؟؟ ولا انت قصدك العشا؟؟