السلام عليكم ورحمة الله وبركاتة
عندي مشكلة احتار عقلي وقلبي ودليلي في حلها
واتمني ان تساعدوني برايكم اخواتي
سامحوني هكتب بالعامية وباذن الله تكون واضحة
بداية
انا متزوجة من ابن خالتي
ولي اخت اصغر مني كانت تريد اخت زوجة (ابنة خالتي) ان تخطبها لابنها
وكلمت ماما وطلبتها منها وامي كلمت ابي ووافقو علي ان فية ظروف عندهم ومش هيقدرو يتقدمو وقتها فورا للخطبة
وتاجل الموضوع تقريبا سنة والبنت ماجاش لها حد تاني
المهم
كانت بنت خالتي قالت انهم هيجو بعد امتحانات الترم للخطوبة وبعدين حصلت الثورة وطبعا لان العريس ضابط الدنيا اتعكت واتاجلت تاني
بداية المشكلة
بعد التنحي تقريبا بـ 10 ايام كنت عند امي
وبدات تتكلم معي وبتقول لي زوجة اخوكي بتقول ان اخوكي بيقول هم مستنيين اية عشان يجو يتقدمة للخطوبة (امي بتقولها باسلوب يعني سخرية وضجر)
المهم انا رديت عليها وقلت لها ياماما الناس لسة مرتاحتش وهو في الشارع ليل نهار ولسة راسة مش فايقة لخطوبة ولا كلام في اي حاجة
المهم ماما اتضايقت من ردي وزعلت مني واتخانقنا يومها
وبعدين صالحتها وقلت لها انا اسفة
بس المشكلة ان ماما دايما بتحس اني بدافع عنهم(اخت زوجي وابنها ) حتي ولو علي حساب امي واختي
والله ودة ما بيحصل
المهم
ام العريس اتكلمت واتفقت مع ماما انهم هيجو يوم الجمعة للخطوبة العريس وابوة وجدتة وعمامة واخوالة
وبعدين امي اتصلت بزوجي بتقول له كلم اختي (العروسة) مصممة علي ان ابو العريس هو اللي يكلم ابوها ويستاذنة انهم يجو يوم الجمعة
زوجي رد علي امي وقال لها الاصول ان العريس هو اللي بيتصل وياخد المعاد ويوم الخطبة ابوة يروح لابو العروسة
المهم زوجي كلم اختي واقنعها
وبعدين المفروض ان الموضوع خلص
تاني يوم لقيت اخت زوجي بتتصل بية وبتقول له ان (اخويا) اخ العروسة مصمم علي ان ابو العريس يتصل بابوة عشان يستاذن
فزوجي قال لها خلي العريس يتصل بابو العروسة وياخد المعاد وهو مش هيحرجة
المهم
ابي طيب جدا ورجل كبير
المهم
العريس اتصل وكانت الكارثة ان ابي قال له ابوك يكلمني
ودة طبعا بعد الحاح من ماما واخويا علي كدة
ابو العريس مش معارض انة يتصل بس العريس له حق يفرح بنفسة وقال لابوة انا رجل وانا اتقدم لها وانت تصدق كلامي
المهم
طبعا احنا اتكبسنا كبسة شديدة يعني ماما كانت بتقول ان دي مش اصول اية اللي غير رايك
وبعدين زوجي طبعا عرف ان ابن اختة اتضايق واتكبس جامد وزعل من بابا
فقال لي انت روحي لامك واختك قبل الخطوبة بيوم وانا هحضر بكرة مع اخواتي
المهم
روحت يوم الخميس لوحدي
ماما سالتني مرة واتنين وثلاثة علي زوجي كنت بتحجج لها بانة مشغول وعندة مشاوير بكرة هيعملها ويجي
المهم لم تقتنع ابدا
اخر ما تعبت قلت لها انة زعل من اللي حصل انت سالتية وكنت بتقولي ان دي مش اصول اية اللي خلاكو تعملو كدة
المهم اخويا طلع وقال مالكم وقعد يزعق معايا
راح بابا اتصل بزوجي وقالة تعالي
زوجي جاء والمشكلة كبرت
بابا قالة اية اللي مزعلك قالو مفيش مكنش عايز يتكلم في اي شي عشان ميتعصبش
المهم حصلت طبعا مشادة كلامية بين امي وزوجي وامي تقول اصول وزوجي يقول مش اصول طلع اخويا يزعق ويقول له اللي مش يعجبة الاصول يشرب من البحر
جوزي اتعصب وقاللة احنا مش بنسمع غير (مراتك بتقول انك بتقول ) ودة اللي كان بيحصل كل لما امي تقول شي تقول مرات اخوكي بتقول انة بيقول كذا ودة كان بيضايقني طب تعالي اتكلم معانا احنا متخليش بنا وسيط
المهم اخويا قاله متجبش سيرة مراتي وكلام كدة
وزجي قاله احنا جوزنا 3 بنات ومشوفناش الاصول دي
راح اخويا قالو تبقو ملتزموناش
ماما اتعصبت راح اخويا قال لها هم يمشو -انا زوزجي- وانا هخلص لك الموضوع دة
راح زوجي رد علية قاله لو كدة يبقي خلص الموضوع بدري قبل ماتتحسب علي اختك خطوبة
بابا زعق لاخويا وقال له انت هتطرد اختك وزوجها من بيتي
ماما قالت لو هم منزلوش انا هسيب البيت
بابا قال مش هيمشو قامت لبست وهتمشي
جري جوزي واخويا وراها علي السلم وقعت واغمي عليها وجالها تشنجات
وهم بيفوقوها اخويا سبني واهاني امام زوجي واخواتي وزوجتة
المهم امي فاقت
زوجي طلع وبعدين قاللي انا غلطت انا هنزل اعتذر رغم ان هو كمان اخويا غلط فية وطردة وغلط في اهلة
نزل زوجي اعتذر لاخويا وابويا وامي وزوجة اخويا
وقال لاخويا اتعاتب عشان نخلص الموضوع وقلوبنا تصفي
اخويا قالو خلاص
تاني يوم نزل اعتذر له وقبل راسة وقاله احنا اخوات وقول اي شي عشان القلوب تصفي اخويا قاله خلاص
وانا اعتذرت لامي وابويا واخويا والمفروض ان الموضوع يكون خلص
المهم جات مرات اخويا بتتكلم مع زوجي وبتقول له
اية اللي حصل دة
رد عليها وقال لها
(لحد امبارح انا ومراتي بنقول ان انتم السبب وانا متاكد انكم بتقولو اننا السبب) في كل اللي حصل دة
يوم الخطوبة نزلت لامي عند اخويا قبلت راسها واعتذرت لها
وقلت لاختي العروسة تعالي عشان نشوف هتتزيني ولا تلبسي وكدة
وزوجي نزل يجيب الجاتو والامور ماشية تمام
والناس جات والخطوبة تمت علي خير الحمد لله
الكارثة
بعد الخطوبة
امي مش بتكلمني
ولا اخويا
ولا العروسة
ولما اختي الكبيرة قالت خلاص الموضوع انتهي والي غلط اعتذر امي بهدلتها وقالت لها انت مش حقانية انت متوطاة معاهم
انا جوزي بيسافر لشغلة وكنت متعودة اروح وقت سفرة عند ماما
انا كنت بكلمها كل يوم اسال عليهم هي ترد علي قد السؤال وحتي ولا تسالني عننا وعن احوالنا
جوزي سافر وقعدت في البيت لوحدي ولو انا متصلتش بيها هي متتصلش
المهم بعد 10 ايام قالت لي تعالي
طبعا ماصدقت روحت
طبعا مقابله اقل من العادي منها ومن اختي العروسة
ومرات اخويا طبعا هم في نفس البيت مسلمش عليا خالص
فانا استغربت المفروض ان الموضوع خلص
يوم كان زوجي مع زوج اختي الكبيرة بيتكلمو وقالة ان اخويا بيقول ان انة سمع زوجي بيتكلم مع زوجة اخويا وبيقول لها( انتم السبب في كل اللي حصل ) واصل الكلمة اللي زوزجي قالها (لحد امبارح انا ومراتي بنقول ان انتم السبب وانا متاكد انكم بتقولو اننا السبب)
وللاسف ما كان فية شاهد علي كلامهم والكلام اتحور طبعا من مرات اخويا لانة استحاله يسمع وهو في الخلاء اعزكم الله
بتكلم مع اختي العروسة -ياريتني ما اتصدرت لها في شي-
وبقول لها مرات اخوكي بتقابلني وحش
قالت لي عندها حق ماانتم كنتم السبب في شتيمتها ووووووووو
قلت لها كدة قالت لي اة
قلت خلاص
بتكلم مع امي عشان اوضح لها ان فية كذب بيوقع بننا طبعا كان صد جامد
لما امي تعبت زوجي راح زارها وانا روحت لها
اختي الصغيرة مش بتكلمني خالص وحتي لو روحت عند بابا مش بتخرج من حجرتها ولو شافتني مش بتسلم عليا خالص وامي مش بتقول لها كدة عيب
امي عايزة عشان ترضي عننا
ان زوجي يروح يعتذر تاني لاخويا وزوجتة
رغم ان زوجي حاول انه يخلي اخويا وهو يقعدو في اي مكان ويتعاتبو اخويا كان بيرفض
بصراحة انا خلاص تعبت وعمري ما هقبل لزوجي اهانة تاني هو غلط واعتذر
وهم غلطو فية وبيكابرو
سامحوني طولت عليكم بس ترددت كتير قبل الكتابة وحاسة اني خلاص تعبانة مش قادرة اتحمل قسوة امي واخواتي
ومش هقول لزوجي اعدم كرامتك عشاني
قولولي اعمل اية واية الحل
انا خايفة من قطع الرحم
انا بتصل بامي كل يوم هي برضة السؤال علي قدر الاجابة
وبروح لها تقريبا كل شهر اقضي ليله حرقة دم واروح علي بيتي
انا كدة اكون قطعت رحمهم
وطبعا اخويا بيشوفني بيسلم من تحت الضرس مراتة ولا كانها شايفاني
اختي الصغيرة مش بتحاول حتي تكون في المكان اللي انا فية عشان متسلمش عليا
سامحوني طولت عليكم انا اسفة
وادعولي كتير
الروابط المفضلة