بسم الله الرحمن الرحيم
اتمنى لكم الافاده والاستفاده 000
للاماااااااااااااااانه الموضوع منقوووووووووووووووووووول

اليوم حابه اتكلم بالاراحه و اخلي البساط احمدي معكم .......

و راح ادخل بالموضوع على طول ...

مهما سوينا فيه شي ناقص ؟؟

ليالي رومنسية وشموع وحركتات سويناها وانبسطنا...

رومنسيات خفيفة يومية كمان ماقصرنا فيها...

بس في شي أهم و هو الي ناقص ...شي مهم لنا أولا ولأزواجنا ولتوطيد علاقتنا بأزواجنا...يعني شي لزوم الاستقرار...وأنا أشوفو من العشرة الطيبة...

الحركات الرومانسية...اختلفوا الرجال من ناحية تقبلهم لها...أما اللي راح أتكلم عنها اليوم...

مافي رجال مايتقبلها...ولها اثرها في التقريب بين الزوجين...


وهي اللفتات الزوجية...


وأقصد فيها انو الوحدة تشوف زوجها محتاج شي معين...وذأه الشي اللي هو محتاجه...مالو داعي ينطلب من الزوجة...بس هو مرة مهم للزوج...

وببعض الأوقات الزوج بنفسو مايعرف انو يحصل عليه من زوجته...و مايعرف انها هي السند والحل له...ومايجي ببالو انو يطلب منها...

وهنا يجي دور الزوجة انها تكون دقيقة الملاحظة وسريعة البديهة...وماتتأخر عن زوجها...

لأنكم عارفين...بعض الأشياء اذا طُلبت فقدت معناها...

يعني لو زوجك طلبها منك...ماحيكون طعمها وتأثيرها زي لو انتي من نفسك قدمتيها...

اتمنى تكونو فهتو علي ،،

وراح أذكرلكم بعض هذي اللفتات...وياريت تتحفونا بالمزيد...

## حبيب القلب جالس يقص أظافره...وأكثر الرجال يعانو بذأه الموقف...تشوفيهم لكأنهم بمصارعة حرة...تعالي عندو بهدوء...خذي القصاصه من يده...
وقومي بالواجب...عاد نحنا الحريم شاطرين بهذي الشغلات...

## خرج للدوام الصباح وهو تعبان أو مصدع أو مرشح...حلو انك تتصلي عليه بعد مايوصل بساعة...عشان تتطمني عليه...هو ماراح يقوللك اتصلي عليّا واتطمني...بس أكيد لو اتصلتي حتتركي أثررائع بنفسو...

## جالس ع النت...تعالي من وراه ودلكي أكتافه ورقبته لدقايق...أو حضريلو كوب نسكافيه أو كابتشينو أو كوفي عربي مع قطعة حلو أو تشوكليت...
بس لو كان ع التشات أو من حقون حركات النص كم...قصي رقبته خخخخههههههااااي
## حلو انك توفري بكل شهر مبلغ بسيط بلا ماتخبريه...ولو حسيتيه مزنوق ماديا قدميه له...أو لو كان نفسو بشي...تقدري تشتريه له...

## يتفرج ع التلفزيون ...ومتابع بحماس...أو يقرا كتاب أو جريدة...قدميلو مشروب يحبو بلا مايطلب...حسسيه انك مبسوطة بالشي اللي يبسطه...او حتى كاس مويه ....راح يفرح فيه

## لاحظتي انو متضايق والبوز شبرين ...اجلسي جنبه...امسكي يده...وسمعيه من الحكي اللي يرفع المعنويات...قوليلو حبيبي والله الدنيا ماتسوى
انك تزعل عشانها...حياتي انتا كلو ولا زعلك...الوسيم ذأه مولايق عليه التكشير....
بس كذا بدون تحقيق وشلة كونان...
هو مع الوقت راح يعترف من حاله ...

## جاء بعد شفت ويوم دوام طويل...تعبان وحيلو مهدود...دخل يبغى ينام...ادخلي معاه...اجلسي ع طرف السرير...ودلكي رجوله بشويش...
خمس دقايق واخرجي...
تراها بالديا عنده و عمرة ما ينساها ...

## كان يبغى ينام...ادخلي عليه...وغطيه...أو عدلي اللحاف...زي ماتسوي للبيبي...وبوسيه ع جبينه...واتأكدي انو يكون صاحي...بس انتي سوي نفسك انك تفكريه نايم...حركات خخخخ

## خرج من البيت وهو زعلان...حتى لو كان زعلان منك لاسمح الله...اتصلي عليه بعد خروجه بفترة...اذا رد عليكي قوليلو بس كنت أبغى أتطمن عليك...
واذا اعطاكي مشغول...ارسليلو مسج...قوليلو فيه...كنت خايفة عليك...بس الحمد لله طمنتي لما اعطيتني مشغول ...

## زوجك يدرس وعندو اختبار...أو موظف وعندو شغلة مهمة...أو مدير وعندو اجتماع...أوبيزنس مان وعندو صفقة...
اتصلي عليه بوقت تكوني متأكدة انودوبو مخلص...واسأليه اش صار معاه؟؟؟اتطمني عليه وع خطواته...سوي نفسك انك دووووووبك صاحية من النوم...وانك صحيتي مخصوص عشان تتطمني عليه...و طبعا قبل ما يروح دعوتين منك على السريع بترفع معنوياته ....

مو انتي بوادي وهو بوادي...حسسيه انو اللي يهمه كمان يهمك انتي...

## كنتو جالسين...فجأة هو صار يدلك راسو وهو منزعج...أو حط يدو ع كتفه أو ظهره وكأنو يتألم...ع طول اسأليه وانتي خايفة عليه موت...قولي:
اش فيك ياروحي...تعبان...ياااااااااااق لبو انتا سلامتك....في شي يآلمك...حسسيه انو قلبك يتقطع عليه وانك خايفة عليه...
رغم انو كل الشغلة شوية صداع...بس حلو تحسسيه باهتمامك وخوفك عليه...
ترا فيه رجال كثير يسووا هذي الحركات بالقصد...يحبوا يلفتوا النتباه...يعني مجرد دلع...واللي يفقع القلب...انو الزوجة ولا هي هنا...

## كنتو تاكلو...أو تتفرجوا ع التلفزيون ...فجأة التفتي عليه...وركزي نظرك بعيونه...لثواني بس...بعدها ع طول ابتسمي له...كأنك جالسة
تستمتعي وتتلذذي بالنظر فيه...وكأنك تقوليله أنا معجبة فيك...أنا مبسوطة انك انتا زوجي من بد رجال الكون...

بدون كلام بالعيون و اذا سال خير قوليله مبسوطه بوجودك معايا ....


## روحتي المكتبة...افتكريه بكتاب يوافق ميوله...يعني هو اللي يصرف وهو اللي يوصل...مايستحق انك تفتكريه بشي...و اذا رجعتي السيارة قولي شكرا ترى بعض حريم تقول من حقي ليش اقوله شكرا ...
خليك ذوق معاه ديما راح يكون معاك بالمثل

## الصباح حاولي تجهزيله شي يفطر عليه لو بسكويت و شاي المهم يطلع من بيتك و هو فاطر ...

## لوجاب اغراض للبيت...وكان بينهم شي تحبيه حتى ولو تافهة...بينيلو الفرحة...مثلا:
انتي تحبي الكرز...وجاب بيوم أغراض للبيت وبينهم كرز...ع طول طيري عندو....والسعيه بوسة ع خده....وقولي وااااااااااااو حبيبي...حياتي انتا
لكأنك كنت عارف اني مشتهيتو...مهما كان الشي صغير وتافهة...بالغي في انفعالك في التعبير عن فرحتكي فيه...
راح تلاقيه كل شوي جايب الشي اللي تحبيه او يتعمد يجيبه ...

## راح الصالون...أوكي...بعد مايرجع...علقي ع شكله....أو لوكه الجديد...قولي:ماشاء الله حبيبي تجنن...شكلك مرة حلو...حلوة قصتك الجديدة...نعيما ..
تذكري انو نحنا لما نروح الصالون...كيف ننبسط لما أزواجنا يعلقوا ع اللوك الجديد...حتى لو عملتي ماسك...تحبي انو زوجك يلاحظ ويعلق...
والدليل انتبهوا لأغلب مواضيع العناية بالبشرة...لما وحدة تبغى توصف ماسك انو روعه غيرها...ع طول تقول حتى زوجي لاحظ...
معناه انو الملاحظة دليل الاهتمام...صح؟؟؟

## لبس واتأنتك...وطلع عريس لؤطة...قوليلو انو مرة شيك...وانك فخورة باهتمامه بأناقته...ومن ذأه الحكي اللي كلو ضرب فراشي...

## وصلك بيت أهلك مثلا بالويك اند...بعد كم ساعة من جلستك عند أهلك...ارسليلو مسج...خبريه فيه...انك اشتقتيله وانو وحشك موت...
وانو مهما كثروا الناس حولك...فيظل هو الأهم...هو اللي تفتقديه...حتى لو بعدتي عنو ثواني...باختصار...انتا كل الناس وكل الناس منّهم انتا...بس الله يستر لا يرجع ياخذك و يردك البيت خخههههااااي

مو ماحسبتي على الله...جاتك من السما الفكة من شكلو...

## عوديه انو وقت خرجته...توقفي معاه عند الباب وتجسلي توصيه...مثلا: انتبه حبيبي لاتبرد...لاتسرع قلبووالله سلامتك بالدنيا...حياتي انتا طمني عليك......ومن هذي التوصيات اللي تبين اهتمامك له...وخوفك عليه...


ترا هذي اللفتات كلها أشياء صغييييييرة وبنظر البعض تافهة بس والله تحتاجلها قوة ملاحظة ...تلاحظي هو اش يحتاج...
حتى تلاقي الكبار يقولو فلان رمة أو أهبل...يعني انك تلمحي ع شغلة قدامه ولا يبادرهوبتقديمها...
أو تقولي فلان خسيس...يعني تكوني بموقف يستلزم انو هو يبادر بالمساعدة بس لاحياة لمن تنادي...لازم تقوليها له صريحة...
ونحنا مانبغى نكون كذا مع أقرب الناس لنا وأحبهم ع قلوبنا...أزواجنا ربنا يسخرهم لنا و لا يحرمنا منهم ياااااااارب ...
أرجوكم...أبغى تفاعل......بس حابة انكم تنبهوا ع لفتات ممكن الزوجة ماتنتبهلها بالرغم من حاجة زوجها لها...
و حتى اللي زوجها جاف او ما يعطيها وجه و الله لو سويتيله هذا كله غصب عليه يستحي على دمه و يعاملك بالطيب ...
و تذكري ((( عاملي الناس كما تحب ان يعاملوك ))))
سامحوني على الاطاله ...و لكن رغبتي فالفائده و حماستي غلبتني .....


منقول__________________

مشكورة على هالموضوع
تعرفي اختي الزوجين ال بينهم حب ومودة صدقيني كل ال حكيتية يطلع تلقائي من الزوجة
بدون تدبير وتخطيط لانة اللهفة والحب ال بقلبها عليةتخليها تتصرف مثل ما حكيت
انا الحمد لله كثير من كلامك بعملة من نفسي لا شعوريا00
موضوعك مهم وحلو وممكن يفيد بنات كثير
جعلة الله في ميزان حسناتك

كلامك درر وانا اسوي الي اقدر عليه
والله يعين
مشكوووووووووووووووووووووه

نقلك للموضوع جدا حلو

عين الصواب ، مشكورة